﻿Ḥizqiyal.
21.
Yusa-dd ɣari wawař n SIDI, inna: 
“A mmis n bnadem, egg udem nnec ɣar ljanub, ejj awařen nnec ad udumen jjihet n ljanub uca nabb ḍidd i wezɣar n yeyyar di Temmurt n Ljanub. 
Ini i wezɣar n Temmurt n Ljanub: ‘Seř i wawař n SIDI: Ammu i iqqar Sidi inu, SIDI: Xzar, Necc ad ssarɣeɣ dayem ict n tmessi, tenni i ɣa iccen kuř tacejjart tazizawt u kuř tacejjart yuẓɣen. Aceɛɛař n řɛabuq war ittwaxessi u s uya ad ttwacemḍen marra iɣembab zi ljanub ař ccamal 
uca marra iwdan d řmař ad ẓaren aqa Necc, SIDI, d wenni issarɣen timessi. War tᵉttwaxessi ca.’ 
Nniɣ necc: ‘A, Sidi inu, SIDI, ɛad nitni qqaren xafi: ‘Ma war issiweř netta s tḥuja n twafit waha?’!” 
Yusa-dd ɣari wawař n SIDI, inna: 
“A mmis n bnadem, egg udem nnec ɣar Urcalim, ejj awařen nnec ad udumen ḍidd i tzawiyyin Iqeddsen uca nabb ḍidd i temmurt n Israil. 
Ini i temmurt n Israil: ‘Ammu i iqqar Sidi inu, SIDI: Xzar, aqa ɣarem, Necc ad dd-jebdeɣ ssif inu zeg ufurru n weɣřaf nnes uca ad qeḍɛeɣ am umsegged am uɛeffan. 
Minzi ad qeḍɛeɣ am umsegged am uɛeffan zi řwesṭ nnem, s uya ad dd-iffeɣ ssif inu zeg ufurru n weɣřaf nnes, ḍidd i marra inni ɣarsen arrimet n weysum, zi ljanub ař ccamal, 
uca marra inni ɣarsen arrimet n weysum ad ssnen, belli Necc, SIDI, jebdeɣ ssif inu zeg ufurru n weɣřaf. Ɛemmarṣ war ɣares dd-iddikkwiř.’” 
“Maca cek, a mmis n bnadem, sɣunfa, sɣunfa zzat i tiṭṭawin nsen s tejɛinnatin ttwarẓent d tarzugi. 
Ad imsar xmi d ac i ɣa inin: ‘Maɣar tessɣunfid ammu?’, aqa cek ad tinid: ‘Zi ssibbet n min sřiɣ, maɣar ad dd-yas uca kuř uř ad ifsi u marra ifassen ad heyyfen u marra buḥbeř ad yarxu u marra ifadden ad ardben am waman. Xzar, ad dd-yas uca ad yiři, ammu i iqqar Sidi inu, SIDI.’” 
Yusa-dd ɣari wawař n SIDI, inna: 
“A mmis n bnadem, nabb uca ini: ‘Ammu i iqqar Sidi inu, SIDI!’ Uca ini: ‘Ssif, ssif, aqa ittwasseqḍeɛ u ittwassuyda. 
Ittwasseqḍeɛ maḥend ad iɣarṣ tiɣarṣa, ittwassuyda maḥend ad ilellec.’ Niɣ ittxeṣṣa i neccin ad nfarreḥ, ad nini: ‘Azeǧaḍ n řeḥkamet n mmi isseḥqar kuř akeccuḍ nneɣni?’ 
‘Immewc maḥend ad ittwassuyda, maḥend ad t ṭṭfen deg ufus. Ssif ittwaqḍeɛ u ittwassuyda, maḥend ad ittwagg deg ufus n uqettař. 
Sɣuyy uca trud, a mmis n bnadem, maɣar ad yiři x řgens inu, ad yiři x marra řḥukkam n Israil. Aqa mmewcen i ssif munen ak-d řgens inu. S uya, wwet x tmeṣṣaḍt nnec.’ 
‘Wah, ssif ittwaqeǧeb. Maca mana, mařa azeǧaḍ nni isseḥqaren marra akeccuḍ war dd-ittiři ɛad?’, ammu i iqqar Sidi inu, SIDI. 
‘Cek, a mmis n bnadem, nabb, uca wwet ifassen ijj deg wenneɣni, maɣar ssif ad iwwet tnayen, wah, třata n imuren. Aqa-t d ssif n yinni ittwanɣen, ssif n umeqqran nni ittwaneɣ, ssif nni ɣarsen ittadfen, 
ḥima xenni uř ad ifsi uca ad mmarenyent tɛenkrifin. Řeqḍeɛ n ssif ggiɣ t x marra tiwwura nsen. Ay, aqa ssif iwjed maḥend ad ilellec, aqa ittwajebb-dd zeg ufurru n weɣřaf maḥend ad iɣarṣ. 
Smun jjehd nnec, qess ɣar ufusi, bedd, qess ɣar uzeřmaḍ, arr řeqḍeɛ nnec mani ma texsed.’ 
‘Uřa d Necc ad wteɣ ifassen inu ijj deg wenneɣni uca ad ssareyyḥeɣ asɛar inu. Necc, SIDI, aqa ssiwřeɣ.’” 
Yusa-dd ɣari wawař n SIDI, inna: 
“Cek, a mmis n bnadem, egg tnayen n ibriden zi mani dd ɣa yas ssif n ujeǧid n Babil. Zeg ict n temmurt ad ffɣen nitni s tnayen idsen. Nqec ijj n uciyyar ɣar ubeṭṭu n webrid, nqec i-t ɣar ubeṭṭu n webrid ɣar tendint. 
Ad tneyyced abrid s manis dd ɣa yas ssif ɣar Rabba n ayt n Ɛammun u ɣar Yahuda ař daxeř di tendint ittwassjehden: Urcalim. 
Minzi ajeǧid n Babil ad ibedd ɣar mani farqen ibriden, ɣar ubeddu n tnayen n ibriden nni maḥend ad iɛezzem. Ad izzerz fřitcat n řqewṣ, ad isseqsa řexyařat n l’aṣnam, ad ixzar tsa. 
Deg ufus nnes ufusi yusa-dd wectab n ‘Urcalim!’, maḥend ad din yegg řeqcuɛ n wedham, maḥend ad yarzem aqemmum nnes s iɣuyyan n wenɣi, maḥend ad issgeɛɛed tmijja nnes s iɣuyyan n umenɣi, maḥend ad igg řeqcuɛ n wedham ḍidd i tewwura, maḥend ad yegg acbar, maḥend ad igg lbarajat. 
Maca man aya ad ɣarsen yiři am ugezzen iɣeccen di tiṭṭawin nsen, maɣar nitni aqa ɣarsen tijaǧatin imetnen, maca Netta ad isseɛqeř x řmuɛṣiyyet nsen, maḥend ad ttwaṭṭfen nitni.” 
“S uya, ammu i iqqar Sidi inu SIDI: ‘Minzi tesseɛqiřem x řmuɛṣiyyet nwem umi iɛeddiyen nwem ttbanen nican, xmi ttwaẓarren ddnub nwem s marra min tᵉtteggem, wah, minzi tsseɛqiřem x řmuɛṣiyyet nwem, s uya ad kenniw ṭṭfen s ufus.’ 
U cek, aɛeffan iyezzmen i řmewt, cek, a řḥakem n Israil, wenni ass nnes ad dd-yas di řweqt n řeḥsab aneggaru n řmuɛṣiyyet, 
ammu i d ac iqqar Sidi inu, SIDI: ‘Kkes areẓẓet nni, kkes ttaj nni. Ammu war ittiři ɛad. Min issehwan, ad ittwassuɛřa, u min issuɛřan, ad dd-ittwassehwa. 
Ad arreɣ aya d řxarbet, d řxarbet, wah, ad t arreɣ d řxarbet. Maca marra aya war ittɣimi ɛad, mɣir ař dd ɣa yas wenni ɣar iǧan řḥeqq uca Necc ad as t wceɣ.’” 
“U cek, a mmis n bnadem, nabb uca ini: ‘Ammu i iqqar Sidi inu, SIDI, x ayt n Ɛammun u x useḥqar nsen!’ Ini: ‘Ssif, ssif ittwajebd-dd, ittwassuyda maḥend ad yecc, maḥend ad ilellec, ... 
- waxxa nitni ttwařan i cek ijj n řewḥiy war iǧin, waxxa nitni ttgezznen i cek ijj n ugezzen issxarriqen - ... aqa ssif ittwajebd-dd maḥend ad cek yarr ɣar irawen n iɛeffanen ittwassnuqqben nni zi dd-yusa wass nsen di řweqt n řeḥsab aneggaru n řmuɛṣiyyet. 
Arr ssif ɣar ufurru n weɣřaf nnes. Deg wemcan mani dd-tᵉttwaxeřqed, di temmurt n ř’aṣeř nnec ad cek ḥekmeɣ. 
Ad xak zeǧɛeɣ wesxeḍ inu. S tmessi n uduqqez inu n ufugem ad xak suḍeɣ uca ad cek ggeɣ deg ufus n ayt n bu-ɣezzu nni issnen ad deǧen. 
Ad tiřid d macca i tmessi, idammen nnec ad ten ssizzřen di řwesṭ n temmurt. War tᵉttiři qaɛ řidaret dayek, maɣar Necc, SIDI, aqa ssiwřeɣ.’” 
