﻿Ḥizqiyal.
3.
Netta inna ayi: “A mmis n bnadem, min tᵉttwařid danita, ecc i-t! Ecc adlis-a ittwannḍen uca uyur, siweř ak-d taddart n Israil.” 
Necc arzmeɣ aqemmum inu u Netta issecc ayi adlis nni ittwannḍen. 
Inna ayi: “A mmis n bnadem, ɛřef aɛeddis nnec, ccur takrict nnec s wedlis ittwannḍen nni i d ac ɣa wceɣ.” Xenni cciɣ u tuɣa-t d amiẓid deg uqemmum inu am tamment. 
Xenni inna ayi: “A mmis n bnadem, uyur, adef ɣar taddart n Israil uca siweř awařen inu akidsen. 
Minzi war dd-tᵉttwassekked ca ɣar ijj n řgens s ijj n yiřes iwɛar u s ijj n wawař iqseḥ, maca ɣar taddart n Israil, 
war iǧi ɣar řegnus aṭṭas s ijj n yiřes iwɛar niɣ s ijj n wawař iqseḥ, i zi war tzemmared ad tfehmed awařen nsen. Mařa sekkeɣ cek ɣarsen nitni, s tidett ad ac sřen. 
Maca taddart n Israil war ixs ad ɣarek iseř, minzi war xsen ad dd-sřen ɣari, minzi marra taddart n Israil, aqa nitni ɣarsen azeǧif iqseḥ u ɣarsen uř yezleg. 
Xzar, Necc ggiɣ udem nnec iqseḥ am wudmawen nsen, u tanyart nnec ggiɣ tt teqseḥ am tenyarin nsen. 
Necc ggiɣ tanyart nnec am yijj n umesmir i iǧan iqesḥen x ict n txedmect n weẓru. War zzaysen tteggʷed ca u war ttnexřiɛ ca zeg wudmawen nsen, minzi nitni d ict n taddart iɣewwɣen.” 
Netta inna ayi: “A mmis n bnadem, ḥḍa marra awařen inu nni i ɣa ssiwřeɣ akidek deg wuř nnec uca seř ɣarsen s imezzuɣen nnec. 
Uyur, adef ɣar ayt n lmenfa ɣar tarwa n řgens nnec uca siweř akidsen, ini asen: ‘Ammu i iqqar SIDI inu, SIDI!’, ma ad sřen niɣ ad semḥen di man aya.” 
Xenni issgeɛɛed ayi Arruḥ uca sřiɣ awarni ayi ict n tmijja teddardiḥ aṭṭas, teqqar: “Ad ittwabarek uɛuǧi n SIDI zeg wemcan n tzeddiɣt nnes!” 
Sřiɣ i řḥess n wafriwen n imuddaren nni iřeqqfen ijj i wenneɣni uřa i řḥess n tjarrarin zzat nsen u i řḥess n ijj n udardiḥ imɣar. 
Xenni issgeɛɛed ayi Arruḥ uca iksi ayi. Necc uyureɣ, d amarzag, itteḥduduq buḥbeř inu dayi u afus n SIDI tuɣa idqeř xafi. 
Ammu i dd-usiɣ ɣar ayt n lmenfa di Tal-Aviv, inni izeddɣen ɣar yeɣzar n Xabur. Necc qqimeɣ din mani tuɣa zeddɣen, wah, qqimeɣ din sebɛa n wussan ttbehteɣ řami d ayi tuɣa jar asen. 
Imsar awarni řami ɛdun sebɛa n wussan, aqa yusa-dd ɣari wawař n SIDI. Inna: 
“A mmis n bnadem, Necc ggiɣ cek d aɛessas x taddart n Israil. Xmi ɣa tesřed i yijj n wawař zeg uqemmum inu, ittxeṣṣa cek ad asen tɛeřmed zzayi. 
Xmi ɣa iniɣ i uɛeffan ‘S tidett ad temmted!’ uca cek war d as teɛřimed ca u war tessiwřed ḥima ad tɛeřmed aɛeffan di ssibbet n webrid nnes aɛeffan maḥend ad t teḥḍid ḥima ad iqqim ad iddar, xenni ad immet uɛeffan nni di řɣecc nnes, maca idammen nnes ad ten ttareɣ zeg ufus nnec. 
Maca mařa tɛeřmed i uɛeffan u netta war ibeɛɛed ca x tuɛeffna nnes u x webrid nnes iɛeffnen, xenni netta ad immet di řmuɛṣiyyet nnes, maca řeɛmar nnec ad injem.” 
“Mařa amsegged ibeɛɛed x tsegda nnes uca igga řmuɛṣiyyet xmi ɣa ssarseɣ ict n ssibbet zzates ařami ɣa ixḍa, xenni ad immet. Minzi cek war d as teɛřimed, ad immet di ddenb nnes uca timegga iseggden i yegga war daysent idaren ɛad. Maca idammen nnes ad ten ttareɣ zeg ifassen nnec. 
Maca mařa tɛeřmed i umsegged, ḥima war ixeṭṭi umsegged u netta war ixḍi, xenni ad iqqim iddar s tidett minzi tuɣa ittwaɛřem, u cek tfekked řeɛmar nnec.” 
Yusa-dd din ufus n SIDI xafi uca inna ayi: “Kkar, ffeɣ ɣar řewḍa n teɣzurt, ad kidek ssiwřeɣ dinni.” 
Kkareɣ uca ffɣeɣ ɣar řewḍa n teɣzurt, xzar, aɛuǧi n SIDI tuɣa ittbedda dinni am uɛuǧi i ẓriɣ ɣar yeɣzar n Xabur uca wḍiɣ x uɣembub inu ɣar temmurt. 
Xenni yudef dayi Arruḥ uca issekkar ayi x iḍaren inu uca issiweř akidi. Netta inna ayi: “Uyur, belleɛ ixef nnec daxeř di taddart nnec.    
U cek, a mmis n bnadem, xzar, ad ac ggen iseɣwan u ad cek carfen zzaysen. War tᵉtteffeɣ ca ḥima ad tadfed jar asen. 
Ad ssřesqeɣ iřes nnec ɣar waneɣ nnec. Ad tdewřed d azinun uca war tᵉttiřid d aryaz jar asen wenni ten i ɣa iwebbxen, minzi nitni d ict n taddart tɣewweɣ. 
Maca Necc, xmi kik i ɣa ssiwřeɣ, ad arzmeɣ aqemmum nnec ɛawed uca ad asen tinid: ‘Ammu i iqqar Sidi inu, SIDI! Wi ittesřan, ad iseř, uca wi isemmḥen di man aya, waxxa ad dayes ismeḥ!’, minzi nitni d ict n taddart tɣewweɣ.” 
