﻿Izřan s Igejduren.
4.
Alif. Mammec igga ibbarcen wureɣ ammu, mammec ibeddeř wureɣ icna qaɛ ammu! Mammec ttwabezzɛen iẓra n Zzawect Iqeddsen x tɣemmura n ibriden! 
Bit. Iḥenjiren iɣřan n Ṣihyun ttwaḥesben am wureɣ iqquren. Mammec d asen tteggen řexxu am yiɣarrafen n třaxt, am řxedmet n bu-třaxt! 
Gimel. Ɛad tuccanin n řexřa i dd-issuffɣen tibbicin, ssuṭṭuḍent imeẓyanen nsent, maca yeǧis n řgens inu tedweř tewɛar, am nnɛamat di řexřa. 
Dalit. Iřes n weḥḍiḍ iřṣeq ɣar waneɣ nnes s ufadi, iḥenjiren imeẓyanen tᵉttaren aɣrum, maca uřa d ijjen war d asen t yebḍi. 
Hi. Inni tuɣa ittetten zic macca iředden, ɣacan deg ibriden, inni ittwasseymen deg warruḍ azeggʷaɣ iḥedqen, ḥennḍen řexxu di řeɣbar. 
Waw. Řmuɛṣiyyet n yeǧis n řgens inu d tameqqrant x ddnub n tendint n Sadum, tenni inqeřben deg ijj n umur, břa ttsaxxur n ifassen. 
Zayin. Tuɣa tarwa n taṣiřet nnes ṣfan x wedfeř, d icemřařen x uɣi, arrimat nsen zewɣen x řmarjan, addud nsen yareqq am ṣaffir aziza. 
Xit. Řexxu ibeddeř waddud nsen, idweř d abarcan x taǧest, war ttwaɛqiřen deg ibriden ɛad. Tiřmect nsen teřṣeq x yeɣsan nsen, tuẓeɣ, tedweř am ukeccuḍ. 
Tit. Iḥřa inni ittwanɣen s ssif, x yinni ittwanɣen s řaẓ, maɣar nitni ad fesyen, ttwařeqfen s wenqas n ṣṣabet n yeyyar. 
Yud. Ifassen n temɣarin nni tuɣa ittḥinnan qbeř, ssnennan i iḥenjiren nsen. Nitni dewřen asent d macca, zi ssibbet n treẓẓit n yeǧis n řgens inu. 
Kaf. SIDI yarxu i wesɛar nnes, issfarreɣ řḥaduq n weɣḍab nnes. Netta issarɣ timessi di Ṣihyun, timessi tenni iccen dsusa nnes. 
Lamid. Ɛemmarṣ war tᵉttɣiř i ijeǧiden n temmurt d imezdaɣ n ddunect, aqa aɣrim d řeɛdu ad dd-adfen ɣar tewwura n Urcalim. 
Mim. D man aya di ssibbet n ddnub n inabiyyen nnes, di ssibbet n řmuɛṣiyyet n ikehhanen nnes, inni issizzřen idammen n imseggaden di řwesṭ nnes. 
Nun. Tettliɛen amecnaw idarɣařen deg ibriden, mesřen s idammen, ařami war izemmar uřa d ijjen ad iḥada arruḍ nsen. 
Samix. “Aggʷejem, aqa idammen xemjen!”, řaɣan asen: “Aggʷejem, aggʷejem, war t ttḥadam!” Uca xenni arewřen, qqimen weddaren. Ittwanna jar řegnus: “War iɛeddeř ad qqimen din ɛad ktar am ibarraniyyen!” 
Pi. Aɣembub n SIDI yareyyec i-ten, War iqqim ad daysen ixzar ɛad. Tuɣa war ɣarsen aweqqar i ikehhanen, iwessura war d asen ssecnen aḥinni. 
Ɛayin. Řebda ttefciřent tiṭṭawin nneɣ, umi xzarent ɣar twiza. Tuɣa-t baṭeř! Ɣar marra axezzar nneɣ nettraja ijj n řgens i war izemmaren ad issenjem. 
Tsadi. Nitni ḥṣaren aneɣ, ařami war neqqim nzemmar ad nuyur x wazzayen nneɣ. Qeṭṭu nneɣ tuɣa yiweḍ-dd, ussan nneɣ qḍan, wah, qeṭṭu nneɣ yusa-dd. 
Quf. Inni d aneɣ iḍeffaren tuɣa fsusen x igidaren deg ujenna. Nitni uẓẓřen xaneɣ x idurar, ggin aneɣ ijj n řfex di řexřa. 
Rix. Nnefs n wenzaren nneɣ, lmasiḥ n SIDI, ittwaḥebbes di iḥufar nsen, wenni x nenna: “Ad neddar jar řegnus di tiři nnes!” 
Cin. Sřiwřew u farḥ, a yeǧis n Idum, tenni izeddɣen di temmurt n Ɛuṣ! Maca uřa d cem ad ɣarem dd-yas řkas, cem ad zzayes tescared, ad tᵉttwaɛarrid. 
Taf. Ɣar řmuɛṣiyyet nnem ad yiři uneggar, a yeǧis n Ṣihyun! Netta war i cem ittḥewwis ɛad. Maca Netta ad zzayem ixeǧeṣ řmuɛṣiyyet nnem, a yeǧis n Idum! Netta ad iɛarra x ddnub nnem. 
