﻿Irmiya.
49.
X ayt n Ɛammun “Ammu i iqqar SIDI: ‘Ma Israil war ɣares bu iḥenjiren? Ma war ɣares bu awrit? Mayemmi xenni iṭṭef ujeǧid nwem tammurt n Jad d řwart i yixef nnes u mayemmi izeddeɣ řgens nnes di tneddam n Jad? 
S uya, xzar, ussan ad dd-asen, ammu i iqqar SIDI, ad jjeɣ ad ttwasřen iɣuyyan n umenɣi x tendint n Rabba n ayt n Ɛammun. Ad tedweř tendint d ict n řgeɛɛdet n řxarbet u tineddam i ɣares dd-iqqnen ad tent qqden s tmessi. Israil ad iwart ɛawed min zzayes kksen d řwart, ammu i iqqar SIDI. 
Ru, a Ḥacbun, maɣar tandint n Ɛay tᵉttwareddeǧ, sɣuyyent, a kennint yessis n Rabba, ḥezzment s txuncay n wecḍan, ceḍnent uca uyurent ɣar da d diha ɣar uɣezdis n icbaren, maɣar ajeǧid nwem, Milkum, ad ittwandeh di lmenfa, ikehhanen nnes ak-d řḥukkam nnes.’” 
“Mecḥař tᵉttfeyyced s řewḍat n teɣzurin nnem, s ufeyyeḍ n řewḍa nnem n teɣzurt, a cem yeǧis ikfaren, tenni ittcařan x wagřa nnes, teqqar: ‘Wi dd ɣari i ɣa iqarrben?’ 
Xzar, ad xam dd-ɣeḍreɣ tiggʷudi zi marra iɣezdisen nnem, ammu i iqqar Sidi inu, SIDI n řɛeskarat. Kenniw ad tᵉttwaɛarrnem, kuř ijj nican ɣar zzat, uca war din uřa d ijjen wenni i ɣa issmunen inni yarewřen. 
Maca awarni as ad ssenqeřbeɣ tameḥbast n ayt n Ɛammun, ammu i iqqar SIDI.” 
X Idum “Ammu i iqqar SIDI n řɛeskarat: ‘Ma war teǧi ɛad tiɣit di Tiyman? Ma ibḍeř ccwar n imiɣisen? Ma tḍeyyeɛ tiɣit nsen? 
Arewřem, dewřem, ffarem deg imucan yuǧɣen, kenniw imezdaɣ n Dadan, maɣar Necc ad xas awyeɣ aḍeyyeɛ n Ɛisu, řweqt nni di ad t ɛaqbeɣ. 
Mařa usin-dd ɣarek imeřqaḍ n uḍiř, ma xenni war ttejjin ca awarni asen? Mařa usin-dd ixewwanen s ǧiřet, ma xenni war ttḍeyyiɛen ař ɣa jjiwnen? 
Necc maca qeccareɣ tammurt n Ɛisu, ɛarriɣ x imucan nnes innuffaren ařami war izemmar ɛad ad innuffar. Tarwa nnes ttwareddǧen, uřa d aytmas d jjiran nnes, aqa netta war iǧi ɛad. 
Ejj iyujiřen nnec, Necc ad ten ḥḍiɣ ad qqimen ddaren, tijjař nnec ejj i-tent ad xafi ttecřent.’ 
Maɣar ammu i iqqar SIDI: ‘Xzar, inni war t issdiheǧen ad swen zi řkas, ad zzayes swen. U cek wenni t issdaheǧen, ma ad tᵉttwabarrid? War tᵉttwabarrid ca ɛemmarṣ, ad zzayes teswed s uɣiř! 
Maɣar Necc jjuǧeɣ ɣar ixef inu, ammu i iqqar SIDI, aqa Buṣra ad idweř d ict n řqecɛet n unexřiɛ d řḥegra, uřa d ict n řxirbet d nneɛřet, uca marra tineddam nnes ad dewřent d řxirbat i řebda.’” 
“Necc sřiɣ ijj n řexbar zi SIDI, aqa ittwassekk-dd ijj n ureqqas jar řegnus ḥima ad yini: ‘Smunem, sgeɛɛdem xas, kkarem ɣar umenɣi!’ 
Minzi xzar, Necc ssemẓiyeɣ cek jar řegnus, tᵉttwasseḥqared jar iwdan. 
Řeḥkamet nnec issaggʷaden tɣarr i cek uřa d zzɛamet n wuř nnec, a cek wenni izeddɣen deg ifeǧiqen n řejruf, wenni ittcebbaren di tqiccet n tewririn! Waxxa teggid řɛucc nnec sennej qaɛ am t ittegg ugider, Necc ad cek dd-ɣeḍřeɣ ssenni, iqqar SIDI. 
Idum ad idweř d ict n řqecɛet n unexřiɛ. Kuř ijj wenni dd as i ɣa ikken, ad innexřeɛ u ad iṣeffar s wesrubi x marra jjɛayef nnes. 
Am ɣar uneqřeb n Sadum d Ɛamurra d dcurat nnes yudsen, iqqar SIDI, war dinni izeddeɣ ɛad uřa d ijj u war dayes ittɣimi ɛad uřa d ijj n mmis n bnadem d abarrani. 
Xzar, am yijj n wayrad ad dd-igeɛɛed zi cbarq iqqnen n L’Urdun ḍidd i tzeddiɣt ijehden, xenni deg wermac n wabřiwen ad t arreɣ ad azzeř ssenni, u wenni umi farzeɣ, ad xas t areccḥeɣ. Maɣar man wen iǧan am Necc, man wen xafi i ɣa iřaɣan i ddeɛwet? Man wen d ameksaw wenni i ɣa iqqimen zzati ibedd? 
S uya, sřem i ucawar n SIDI nni iqḍeɛ x Idum, u sřem i inwayen nni ixarreṣ x imezdaɣ n Tayman: ‘S tidett, inni imeẓyanen aṭṭas zeg wuǧi ad ten jarren, s tidett, tazeddiɣt nsen ad tᵉttwassnexřeɛ!’ 
Tammurt tᵉttenhezza s řḥess n uweṭṭu nsen, s tɣuyyit i zi ɣa ittwaseř řḥess nnes ař Řebḥar n Telga. 
Xzar, ittgeɛɛad am yijj n ugider ɣar ujenna, itteḥrara, ittbezzaɛ afriwen nnes tiwa n Buṣra. Deg wass nni ad yiři wuř n ayt n bu-teɣruḍt n Idum am wuř n ict n temɣart s řeḥriq n tarwa.” 
X Dimacq “Ḥamat d Arfad seḍḥan, maɣar nitni sřin i wareqqas d aɛeffan, fecřen. Ɣar řebḥar tᵉttwaf řeḥṣaret, bnadem war izemmar ad yarsa din. 
Tarxu tendint n Dimacq, tenneqřeb, maḥend ad tᵉṭṭef di tarewřa. Imneɛ i-tt uqdiddes. Řeḥṣaret d řewjeɛ am n ict temɣart ittarwen ṭṭfen tt. 
Tandint icennɛen, ma war teggi am tenni ittwajjen, tandint n řefraḥet inu? 
S uya ad wḍan iḥudriyyen nnes deg wazzayen u marra iɛeskariyyen ad ttwaseɣden deg wass nni, ammu i iqqar SIDI n řɛeskarat. 
Necc ad ssarɣeɣ timessi di řḥiḍ n Dimacq, ad tecc řeqṣur n Binhadad.” 
X Weɛraben X Qidar d tgelditin n Ḥaṣur nni iɣřeb Nabuxadraṣṣar, ajeǧid n Babil. “Ammu i iqqar SIDI: ‘Kkarem uca hejmem x Qidar uca areddǧem ayt n ccarq. 
Nitni ad asen kksen iqiḍan nsen d wuǧi nsen, tijartiřin n uqiḍan nsen d marra řqecc nsen. Uca uřa d iřeɣman nsen ad ten awyen akidsen. Ad xasen sɣuyen: Asiggʷed mani ma! 
Arewřem, beɛɛdem, ffarem deg imucan yuǧɣen, kenniw imezdaɣ n Ḥaṣur, ammu i iqqar SIDI, maɣar Nabuxadraṣṣar, ajeǧid n Babil, iqḍeɛ xawem acawar uca ixarreṣ deg ijj n wenway xawem. 
Kkarem, geɛɛdem x ijj n řgens nni izeddɣen di řhudnet u di řaman, ammu i iqqar SIDI, ijj n řgens war ɣares bu tewwura uřa d zzenkrun, wenni izeddɣen weḥḥdes. 
Iřeɣman nsen ad ttwaḥewwsen uca abarru n tḥimriwin nsen n řmař ad ttwacarent u Necc ad ten zuzzareɣ ɣar marra iɣezdisen n usemmiḍ, marra inni ittḥeffan acuwwaf ɣar ṭṭrufa, . Necc ad xasen dd-awyeɣ aḍeyyeɛ zi marra iɣezdisen, ammu i iqqar SIDI. 
Haṣur ad idweř d tazeddiɣt i wuccanen n řexřa, ict n temmurt ittwareddǧen i řebda. War dayes izeddeɣ ɛad uřa d ijjen uca uřa d ijj n mmis n bnadem ad din iqqim ɛad am ubarrani.’” 
X Ɛilam Awař n SIDI i unabi Irmiya x Ɛilam, deg umezwaru n tgelda n Ṣidqiya, ajeǧid n Yahuda, inna: 
“Ammu i iqqar SIDI n řɛeskarat: ‘Xzar, Necc ad arẓeɣ řqews n Ɛilam, amezwaru n tzemmar nsen n ayt n bu-teɣruḍt. 
Necc ad dd-ssehwiɣ x Ɛilam arebɛa n isemmiḍen zi arebɛa n tɣemmura n ujenna u ɣar marra tiɣemmura n isemmiḍen ad ten zuzzareɣ. War ittiři bu řgens mani war dd-ttisen inni x uẓẓřen zi Ɛilam. 
Necc ad ssnexřɛeɣ ayt n Ɛilam zzat i řɛedyan nsen u zzat i yinni yarezzun tudart nsen. Necc ad dd-ɣeḍřeɣ řɣar xasen, řḥaduq n weɣḍab inu, ammu i iqqar SIDI. Necc ad asen sseḍfareɣ ssif ař ten teḥḥiɣ. 
Necc ad ssbeddeɣ řɛarc inu di Ɛilam uca ad teḥḥiɣ ajeǧid d řḥukkam ssenni, ammu i iqqar SIDI. 
Deg uneggar n wussan ad ssenqeřbeɣ tameḥbast n Ɛilam ammu i iqqar SIDI.’” 
