﻿Irmiya.
48.
X Mu’ab “Ammu i iqqar SIDI n řɛeskarat, AREBBI n Israil: ‘Uct x Nabu, maɣar aqa tandint tᵉttwaxarreb, tandint n Qaryatayim tᵉṭṭef i-tt řeḥya, aqa tᵉttwaṭṭef. Lburj yuɛřan tᵉṭṭef i-tt řehya u tᵉttenhezza. 
Řɛezz n temmurt n Mu’ab war iǧi ɛad. Di Ḥacbun xarrṣen di řɣar ḍidd nnes, nnan: Ejj aneɣ ad tt nekkes zi jar řegnus. Uřa d cek, Madmin, ad cek ssbekmen, ssif ggur ad cek iḍfar. 
Teffeɣ ict n tɣuyyit n řeḥriq zi Ḥurunayim: Axarreb d lmuṣiba d tameqqrant! 
Tammurt n Mu’ab tᵉttwarẓ, iḥenjiren nnes imeẓyanen ggin ad tᵉttwaseř tɣuyyit tejhed. 
Wah, am ittru ittgeɛɛad netta tsawent n Luḥit, maɣar ɣar uhekkwu ɣar Ḥurunayim sřin aduqqez n iɣuyyan n txessart. 
Arewřem, snejmem tudart nwem, dewřem am yijj n uxeccab di tnezruft. 
Minzi cem tᵉttecřed x tmegga nnem d řeknuz nnem, uřa d cem ad tᵉttwaṭṭfed. Kamuc ad yuyur di lmenfa, ikehhanen nnes jmiɛ ak-d řḥukkam nnes. 
Amteḥḥay ad dd-yas ɣar kuř tandint uca uřa d ict n tendint war tzemmar ad tenjem. Ad tᵉttwabḍeř řewḍa n teɣzurt uca řwaṭa ad tᵉttwaxarreb, am mammec t inna SIDI.’” 
“Wcem afriwen i Mu’ab, maɣar nitni ad ffɣen s tazřa uca tineddam nnes ad dewřent d ict n řqecɛet n unexřiɛ, mani war ittɣimi izeddeɣ ɛad uřa d ijj. 
Ittwanɛeř wenni yarxun di tsexxart n SIDI, ittwanɛeř wenni issbedden ssif nnes x usizzeř n idammen. 
Tuɣa Mu’ab di řaman zi temẓi nnes, yarsa am binu x řexmira nnes, war t farrɣen zeg uqdiḥ ɣar uqdiḥ nneɣni u ɛemmarṣ war iffiɣ ɣar lmenfa. X uya iqqim as uředdi nnes d řefwaḥ nnes war ibeddeř. 
S uya, xzar, ad dd-asen wussan, iqqar SIDI, ad ɣares dd-ssekkeɣ inni i ɣa ifarrɣen iqdiḥen uca nitni ad t farrɣen. Nitni ad ssexwan řeqcuɛ nnes u ad arẓen iɣarrafen nnes. 
Mu’ab ad innefḍeḥ zi ssibbet n Kamuc, am mammec tennefḍeḥ taddart n Israil zi ssibbet n Bayt-Il, i xef tuɣa ttᵉtcřen nitni. 
Mammec tzemmarem ad tinim: ‘Neccin d ayt n bu-teɣruḍt, iryazen imeḥḍen, iwejden i umenɣi?’ 
Mu’ab ittwaxarreb uca igeɛɛed řeɛdu ɣar tneddam nnes. Acewwar n iḥudriyyen nnes hwan-dd ɣar tɣarṣt, ammu i iqqar Ujeǧid, Isem nnes SIDI n řɛeskarat.” 
“Aḍeyyeɛ n Mu’ab yudes-dd aṭṭas u řɣar nnes yiweḍ-dd deɣya. 
Cetcam xas, marra kenniw i d as dd-innḍen u marra inni issnen isem nnes. Inim: ‘Mammec igga yarreẓ uzeǧaḍ n ṣṣulṭa ijehden, taseṭṭa nni iṣebḥen aṭṭas?’ 
Hwa-dd zeg wemcan nnem yuɛřan, qqim deg ict n jjihet n ufadi, cem tenni din izeddɣen, yeǧis n Dibun, maɣar amteḥḥay n Mu’ab ihejjem-dd xam, aqa yareddeǧ lqelɛat nnem. 
Beddet ɣar webrid uca xzaret, cem tenni izeddɣen di Ɛaruɛir! Seqsat aryaz nni yarewřen, tamɣart nni inejmen, ini: ‘Min imsaren?’ 
Innefḍeḥ Mu’ab, minzi ittwařbez. Cetca, sɣuyy, ejj ad ssnen di Arnun aqa Mu’ab ittwaxarreb. 
Yiweḍ-dd řḥukm x řwaṭa, x Ḥulun, x Yaḥṣa, x Mayfaɛat, 
x Dibun, x Nabu, x Bayt-Dablatayim, 
x Qaryatayim, x Bayt-Jamul, x Bayt-Maɛun, 
x Qaryut u x Buṣra, u x marra tineddam n temmurt n Mu’ab, tinni iggʷejen d tinni yudsen. 
Ittwaqḍeɛ yicc n Mu’ab, yareẓ uɣiř nnes, iqqar SIDI.” 
“Scarem t maɣar netta tuɣa ittɛeffar ḍidd i SIDI s wawařen n ukebbar. Ad iwḍa Mu’ab deg iɛuqqan n yixef nnes uca ad idweř simant nnes i tseḍḥact. 
Niɣ ma war tuɣi Israil i tseḍḥact i cek? Ma ṭṭfen t zeɛma jar iceffaren aqa cek tᵉttɛeyyabed t am tessenhezzid azeǧif meřmi ma iwḍa ac-dd x yiřes? 
Ffɣem zi tneddam, zedɣem di řejruf, kenniw imezdaɣ n Mu’ab! Ggem am tedbirt i iggin řɛucc x ujemmaḍ n uqemmum n yefri ittfan. 
Neccin nesřa x nnfaxet n Mu’ab, dayes nnfaxet aṭṭas: nnfaxet nnes, aɛeffar nnes d wuř nnes ittuɛřan.” 
“Necc ssneɣ zzɛamet nnes, iqqar SIDI, uřa d řɣecc n řhard nnes. Nitni war tteggen min qqaren. 
X uya i ɣa wteɣ agejdur x Mu’ab, x marra Mu’ab ad sɣuyeɣ, ad zehharen x iryazen n Qir-Ḥaris. 
S imeṭṭawen aṭṭas x imeṭṭawen n Yaɛzir ad xam ruɣ, a cem tzayart n Sibma. Řefruɛ nnem ɛdun řebḥar, iwḍen-dd ař řebḥar n Jaɛzir. Yusa-dd maca umteḥḥay ihjem x tini nnem n unebdu uřa x řɣiǧet nnem n uḍiř. 
Truḥ řefraḥet d wercaq zi temmurt isseɣ̮mayen, zi temmurt n Mu’ab, minzi ssbeddeɣ binu zi teysirin n uḍiř. War ttɣimin ad ddzen ɛad aḍiř s usřiwřew. Asřiwřew? Cfa usřiwřew. 
Zi ssibbet n tɣuyyit n Ḥacbun ař Aliɛala, ař Yahaṣ, wah, nitni tteggen ad sřen tmijja nsen zi Ṣuɛar ař Ḥurunayim, taɛejmit nni n třata n iseggʷusa. Maɣar ɛad aman n Nimrim ad dewřen d iyermamen ittwaxarrben. 
Wenni iqeddmen taɣarṣt di řegɛudi d wenni ittawyen tiwhibin n řebxur i irebbiten nnes, ad t arreɣ ad ibedd zi man aya di Mu’ab, ammu i iqqar SIDI.” 
“X uya ittɛeffar wuř inu x Mu’ab am temja, uř inu ittɛeffar x yeryazen n Qir-Ḥaris am yict n temja, minzi afeyyeḍ nni ikseb, aqa iweddar. 
Qaɛ izeǧifen d iqeccura u qaɛ timira ttwaqeḍɛent, di marra ifassen nsen aqa iqessiten n wecḍan u i tejɛinna nsen aqa taxancet n wecḍan. 
X marra tizeɣwin n Mu’ab u x marra wazzayen nnes, wah, mani ma aqa din tɣuyyit n wecḍan, maɣar Necc arẓiɣ Mu’ab am yict n řqecɛet war dayes bu arḍa ɛad, ammu i iqqar SIDI. 
Mammec ittwawwet Mu’ab, mammec ssɣuyyun nitni. Mammec i d asen d yarra Mu’ab s weɛrur s useḍḥi! Mu’ab idweř d ict n řqecɛet n ustehzi d ijj n umedya n usnexřiɛ i marra inni d as dd-innḍen.” 
“Maɣar ammu i iqqar SIDI: ‘Xzar, am yijj n ugider ad iḥewwem netta uca ad ibezzeɛ afriwen nnes tiwa n Mu’ab. 
Qaryut ṭṭfen t uca ɣeřben x lqelɛat deg idurar. Deg wass nni ad yiři wuř n ayt n bu-teɣruḍt n Mu’ab am wuř n ict n temɣart ittarun. 
Mu’ab ad ittwareddeǧ ařami war ittiři ɛad d řgens maɣar issemɣar ixef nnes x SIDI. 
Tiggʷudi d wenday d řfex ad xak iřin, a cek wenni izeddɣen di Mu’ab, ammu i iqqar SIDI. 
Wenni i ɣa yarewřen zi tiggʷudi, ad iwḍa di tesraft, u wenni dd ɣa igeɛɛden zi tesraft, ad innaɣ di řfex, maɣar Necc ad awyeɣ x Mu’ab aseggʷas n wexřaf nnes, iqqar SIDI.’” 
“Di tiři n Ḥacbun qqimen imarwařen ttbeddan břa jjehd, maɣar timessi teffeɣ-dd zi Ḥacbun, ijj n uhaduq zi Siḥun, uca wanita icca lḥenkat n uzeǧif Mu’ab d aceqquf n marra ayt n bu-řexcunet. 
Uct xak, Mu’ab, aqa ixsar řgens n Kamuc, maɣar iḥenjiren nnec ttwanedhen di tmeḥbast uca uřa d yessic ttwaḥebbsen. 
Deg uneggar n wussan ad ssenqeřbeɣ tameḥbast n Mu’ab!’, ammu i iqqar SIDI.” Ař danita iǧa wawař i yurin x řḥukm x Mu’ab. 
