﻿Irmiya.
21.
Awař nni dd-iffɣen zi SIDI ɣar Irmiya, umi ajeǧid Ṣidqiya issekk ɣares Facḥur, mmis n ukehhan Malkiya, d Ṣafanya, mmis n ukehhan Maɛasiya, inna: 
“Seqsa maca SIDI xaneɣ, maɣar Nabuxadraṣṣar, ajeǧid n Babil, ittmenɣa akidneɣ. Ad taɣ SIDI ad dayneɣ igg ict n lmuɛjiza am mammec marra lmuɛjizat nnes, maḥend ad xaneɣ iḥeyyed Nabuxadraṣṣar.” 
Xenni inna asen Irmiya: “Ammu i ɣa tinim i Ṣidqiya: 
‘Ammu i iqqar SIDI, AREBBI n Israil: Xzar, Necc ad ssenqeřbeɣ deg ifassen nwem řesnaḥ i zi ttmenɣam ak-d ujeǧid n Babil d Ikaldaniyyen, inni d awem dd-innḍen barra i řḥiḍ, u Necc ad ten ssmuneɣ di řwesṭ n tendint-a. 
Necc simant inu ad kidwem menɣeɣ s ufus isswiẓẓḍen d uɣiř ijehden, s weɣḍab d wesɛar u s uduqqez ameqqran n weɣḍab. 
Necc ad wteɣ imezdaɣ n tendint-a, am iwdan uřa d řmar: nitni ad mmten s ijj n ṭṭaɛun ameqqran. 
Awarni as, ammu i iqqar SIDI, Necc ad sseɛduɣ Ṣidqiya, ajeǧid n Yahuda, d imsexxaren nnes d řgens nnes nni iqqimen di tendint-a zi ṭṭaɛun, zi ssif u zi řaẓ, deg ufus n Nabuxadraṣṣar, ajeǧid n Babil, deg ufus n řɛedyan nsen u deg ufus n yinni yarezzun tudart nsen. Netta ad ten ineɣ s řeqḍeɛ n ssif u netta war ittḥinni, war issɛizzi u war yareḥḥem.’” 
“I řgens-a ad tinid: ‘Ammu i iqqar SIDI: Xzar, Necc ggiɣ awem abrid n tudart d webrid n řmewt. 
Wenni i ɣa iqqimen di tendint-a, ad ittwaneɣ s ssif, s řaẓ u s ṭṭaɛun, maca wenni zzayes i ɣa iffɣen uca ad iɛdu ɣar Ikaldaniyyen inni kenniw iḥeṣṣaren, ad iqqim iddar uca řeɛmar nnes ad as yiři am tkeccaḍt. 
Maɣar Necc arriɣ-dd s wudem inu ḍidd i wemcan-a, war iǧi i řxar, ammu i iqqar SIDI. Amcan-a ad ittwasseɛdu deg ufus n ujeǧid n Babil u netta ad as iqqed timessi.’” 
Zi jjihet n taddart n ujeǧid n Yahuda, sřem i wawař n SIDI: 
“A taddart n Dawud, ammu i iqqar SIDI: ‘Seggdem nican di teffut, fekkem wenni ittwakeccḍen zeg ufus n wenni iḥeṣṣaren, niɣ ad yarreẓ wesɛar inu am tmessi ařami war izemmar uřa d ijj ad tt issexsi ɛad zi ssibbet n tmegga nwem tiɛeffanin. 
Xzar, ad cem řeqfeɣ, cem tenni izeddɣen di teysart, cem, a taṣḍart n řwaṭa, ammu i iqqar SIDI. Kenniw teqqarem: Man wen izemmaren ad ɣarneɣ dd-ihwa, man wen izemmaren ad dd-yadef ɣar tzeddiɣin nneɣ? 
Necc ad kenniw ɛaqbeɣ ɛlaḥsab řɣiǧet n tmegga nwem, ammu i iqqar SIDI. Necc ad ggeɣ timessi deg wezɣar nnes nni i ɣa iccen marra min d as dd-innḍen.’”    
