﻿Icaɛya.
60.
“Kkar, egg tfawt maɣar tafawt nnem tusa-dd u aɛuǧi n SIDI yareqq tiwa nnem. 
Maɣar xzar, taǧest ad tdeř tammurt u aseynu ibbumbes ad ideř ccuɛub, maca tiwa nnem ad igeɛɛed SIDI u aɛuǧi nnes ad dd-iḍhar tiwa nnem. 
Řegnus ad ɣarem dd-asen u ijeǧiden ɣar tissiqt n řefjar nnem.” 
“Sgeɛɛed tiṭṭawin nnem, xzar da d diha, xzar, marra nitni munen, ttasen-dd ɣarem. Iḥenjiren nnem ad dd-asen zi řaggʷaj, yessim ttwaksint i-dd x tmeṣṣaḍin. 
Xenni ad t tẓared u ad tsiqsiqed uca uř nnem ad inhezz s uweqqar u ad innurzem aṭṭas, maɣar agřa n řebḥar ad idweř ɣarem, afeyyec n řegnus ad ɣarem dd-yas. 
Ijj n ubarru n iřeɣman ad cem ideř, iřeɣman imeẓyanen zi Midyan d Ɛiyfa. Marra ad dd-asen zi Caba. Ad awyen ureɣ d jjawi, uca ad beccaren s wawařen n ccan i SIDI. 
Marra uǧi n Qidar ad ɣarem nnjarwen. Icarriyyen n Nabayut ad iřin i tsexxart nnem. Ad ten ssgeɛɛden s arḍa x uɛalṭar inu u Necc ad ssɛuǧeɣ Taddart n uɛuǧi inu s tidett.” 
“Man ina inni dd-iṭṭawen ɣar dinni am yiseynuten, am tedbirin ɣar řekwaza nsent? 
Wah, tigzirin ad ayi řajant, uca iɣarruba n Tarcic ad iřin d imezwura maḥend ad awyen iḥenjiren nnem zi řaggʷaj, ak-d nnuqart nsen d wureɣ nsen, i Yisem n SIDI, AREBBI nnem, i Umqeddas n Israil, minzi Netta issɛuǧa cem. 
Ibarraniyyen ad bnan řeḥyuḍ nnem uca ijeǧiden ad am sexxaren, maɣar deg uduqqez n weɣḍab inu wtiɣ cem, maca di arḍa inu tezziǧed ayi. 
Tiwwura nnem ad qqiment řebda arzment. Ass d ǧiřet war ttbelliɛent maḥend ad ɣarem ssidfen agřa n řegnus uca ad din ssqebbḍen uřa d ijeǧiden nsen nni dd-iwyen. 
Maɣar řgens d tgeldit nni war ttexsen ad am sexxaren, ad hellken, uca řegnus nni ad ttwaredǧen qaɛ.” 
“Acuwwar n Lubnan ad ɣarem dd-yas, tacejjart n umerzi, tacejjart n ddulb d tcejjart n tengelt munent, ḥima ad zewwqen amcan n Zzawect inu Iqeddsen, uca amcan n iḍaren inu ad t ssɛuǧeɣ. 
Iḥenjiren n yinni tuɣa cem iḥeṣṣaren ad ɣarem dd-asen s uwaḍeɛ, ad aḍaren ɣar iḍaren nnem marra inni zzayem istehzan, uca ad am řaɣan: ‘Tandint n SIDI, Ṣihyun n Umqeddas n Israil’.” 
“I umi, aqa cem tuɣa texřid d tᵉttwacarhed ařami uřa d ijj war d xam issijj, ad cem ggeɣ d řɛezz ittduman d řɛunṣar n řefraḥet zi jjiř ař jjiř. 
Ad tᵉṭṭḍed aɣi n řegnus u ad tᵉṭṭḍed ɣar iffan n ijeǧiden. Ad tessned aqa Necc d SIDI, Amsenjam nnem d Amefdi nnem, Amzemmar n Yaɛqub.” 
“Deg wemcan n nnḥas ad awyeɣ ureɣ, deg wemcan n wuzzař nnuqart, deg wemcan n ukeccuḍ nnḥas, deg wemcan n yeẓra uzzař. Necc ad ggeɣ řehna d iweqqafen nnem uřa d tasegda d imzeyyaren nnem. 
War ssiwřen ɛad x lɛunf di temmurt nnem, uřa x wareddeǧ d uxarreb di jjwayeh nnem. Řeḥyuḍ nnem ad asen inin: ‘Asenjem!’, u i tewwura nnem: ‘Taṣebbiḥt!’. 
War tᵉttiři ɛad tfuct d tafawt nnem deg uziř u taziri war d am tᵉttic ɛad tissiqt nnes, maca SIDI ad am yiři d tafawt n řebda, uca AREBBI nnem ad yiři d řehzuṭ nnem icnan qaɛ. 
Tafuct nnem war tɣeǧi ɛad u taziri nnem war tneqqeṣ, maɣar SIDI ad yiři d tafawt nnem n řebda uca ussan n wecḍan nnem ad qḍan. 
Řgens nnem aqa aten marra d imseggaden, nitni ad ṭṭfen tammurt d řwart i řebda: taɣeddut i ẓẓuɣ, řxedmet n ifassen inu, aqa-ten i řɛezz inu! 
Ameẓyan qaɛ ad idweř d ařef u amuqřiř qaɛ ad idweř d řgens ijhed, Necc, SIDI, ad t-i-dd-nedheɣ deɣya xmi dd ɣa yaweḍ řḥař.” 
