﻿Icaɛya.
41.
“Seɣdem-dd zzati, a tigzirin x tma n řebḥar, uca jjem ccuɛub ad ṭṭfen jjehd n jdid, jjem ten ad dd-adsen, xenni ad ssiwřen, jjem aneɣ ad nqarreb ɣar řeḥkam marra nmun. 
Man wen i dd-issfaqen zi manis d tneqqar tfuct ijjen wenni akides temsagar tsegda ɣar iḍaren nnes? Man wen isellmen řegnus deg ufus nnes uca igga i-t ad yareyyes x ijeǧiden? Man wen yarrin řegnus i ssif nnes am tɛejjajt, i řqews nnes am uřum nni di ittsuḍ usemmiḍ? 
Netta iḍfar i-ten, ikemmeř ɣar zzat di řehna x webrid war t iḥidi ɛemmarṣ s iḍaren nnes. 
Man wen isseqfeř uca igga aya? Netta, wenni zeg umezwaru ibarrḥen i jjiřat: ‘Necc, SIDI, d Amezwaru u ɣar ineggura Necc Necc.’ 
Tigzirin ẓrint t, ggʷedent, ineggura n temmurt arjijen, nitni udsen-dd, iwḍen-dd. 
Ijjen iwca afus i umeddukkeř nnes, inna i umas: ‘Iři d aryaz!’” 
“Aṣnayɛi igga uř deg wemziř n wureɣ nni t isserɣen s wefḍis, wenni iwettin x ẓẓebra, am iqqar x mammec ssřesqen iziynan: ‘D lemliḥ!’. Xenni issemten wemziř i řexyař s imesmar, ařami war ittenhezzi.” 
“Maca cek, a Israil, amsexxar inu, a Yaɛqub nni ixḍareɣ, zzariɛet n Ibrahim, ameddukkeř inu iɛizzen, 
ṭṭfeɣ cek zeg ineggura n temmurt uca řaɣiɣ-dd xak zi ṭṭrufa nnes qaɛ, nniɣ ac: ‘Cek d amsexxar inu, ixḍareɣ cek, war cek nḍareɣ.’ 
War tteggʷed ca, maɣar Necc ǧiɣ akidek, war sḥissif, maɣar Necc d AREBBI nnec. Necc ad cek ssjehdeɣ, ad ac wceɣ afus, wah, Necc ad dayek menɛeɣ s ufusi iccur s tsegda inu.” 
“Xzar, nitni ad seḍḥan, ad dewřen i řefḍiḥet, marra inni xak issḥemman. Iryazen nni akidek ittemcubbucen, ad dewřen d walu, ad ttwahellken. 
Cek ad xasen tarzud, maca war ten tᵉttifed. Iryazen nni kidek ittemcubbucen ad dewřen d walu d řbaṭeř, wah, iryazen nni ittmenɣan akidek. 
Maɣar Necc d SIDI, AREBBI nnec, wenni iṭṭfen afus afusi nnec d wenni d ac iqqaren: ‘War tteggʷed ca, Necc ad ac wceɣ afus! 
War teggʷed ca, a cek akeccaw Yaɛqub, a yeryazen n Israil! Necc ad ac wceɣ afus, Amefdi nnec d Amqeddas n Israil!’, ammu i iqqar SIDI. 
Xzar, Necc ggiɣ cem d tařwiḥt itteḥřuǧuḍen i usarwet d tamaynut, s teɣmas iqeḍɛen ɣar tnayen n iɣezdisen. Idurar ad ten tssarwted u ad ten teddzed u tiwririn ad tent tegged d řum. 
Cek ad ten tezzuzared, ad ten yawi usemmiḍ, ad ten tareyyec tḥaryaḍt. Cek maca ad tesřiwřewed x SIDI, ad tcennɛed ixef nnec deg Umqeddas n Israil.” 
“Inni ittwaḥṣaren d imezřaḍ arezzun x waman, maca walu da. Iřes nsen yuẓeɣ s ufadi. Necc, SIDI, ad asen sřeɣ, Necc, AREBBI n Israil, war daysen semmḥeɣ. 
X tewririn tiqeccura ad jjeɣ iɣezran ad dduqqzen uřa d řɛunṣarat di řwesṭ n řewḍat. Necc ad arreɣ řexřa d ayeřmam n waman uřa d tammurt yuẓɣen d tinedwin. 
Di řexřa ad ẓẓuɣ tacejjart n tengelt d tcejjart n ukasiya d tcejjart n tariḥant d uzemmur, di tnezruft ad ggeɣ tacejjart n umerzi d tcejjart n dulb d tayda ak-d wayawya, 
ḥima ad ẓaren, ad neɛmen, ad argben, ad fehmen jmiɛ, aqa afus n SIDI igga aya, aqa Amqeddas n Israil ixřeq i-tt-i-dd.” 
“Qeddmem ddeɛwet nwem zzati, iqqar SIDI, awyem-dd burhanat nwem ijehden qaɛ, iqqar Ujeǧid n Yaɛqub. 
Ejj i-ten ad awyen u ad aneɣ barrḥen min ɣa imsaren. Sargbem aneɣ x tmesřayin timezwura qaɛ, mammec ǧant, ḥima ad tent neksi ɣar wuř uca ad nessen aneggar nsent, niɣ ejj aneɣ ad nseř x tmesřayin i dd ɣa yasen ɛad. 
Barrḥem timesřayin i ɣa yiřin daweḥda ɛad, maḥend ad nessen aqa kenniw d irebbiten. Ggem ca d řxar niɣ d řɣar, ḥima ad nxezzar deg wayawya s řxezrat ibeqqcen, ad tt nẓar jmiɛ. 
Xzar, kenniw qell x walu u min tᵉtteggem war dayes bu nnfaɛ, wenni kenniw ixḍaren aqa-t d nnɛi.” 
“Necc ad dd-ssekkareɣ ijjen zi ccamal u netta ad dd-iffeɣ zi manis dd-tneqqar tfuct, ad iřaɣa x Isem inu. Netta ad dd-yas am bu-třaxt nni iɛeffsen x ubeǧaɛ, ad iɛfes x ayt n jjehd am x tarrist.” 
“Man wen i-tt ibarrḥen zeg umezwaru qaɛ, ḥima ad tt nessen, niɣ xenni man wen i-tt ibarrḥen qbeř, ḥima nzemmar ad nini: ‘Aqa netta dayes řaman!’ Maca war din wi tt ibarrḥen, war din wi d aneɣ ittarran ad nseř ca, uřa d ijj war isři awem tneṭqem s ca. 
Am Umezwaru nniɣ Necc i Ṣihyun: ‘Aqa-ten da!’, u i Urcalim: ‘Necc ad awyeɣ ijj n ureqqas s řexbar aṣebḥan.’ 
Necc xzareɣ, maca war din tuɣi uřa d ijj! War din tuɣi uřa d ijj zzaysen wenni izemmaren ad iwc ccwar, ařami zemmareɣ ad sseqsiɣ u nitni ad xafi dd-arren. 
Xzar, nitni marra di řbaṭeř, řexdayem nsen war daysen nnfaɛ, řexyařat ifesyen nsen d řeɛwin waha u xwant.” 
