﻿Icaɛya.
35.
“Ad ifarḥ řexřa d temmurt yuẓɣen, ad tesřiwřew řewḍa, ad tnewwar am tnewwact war zzayes wḍant tifray ɛemmarṣ. 
Ad tnewwar ad tcuwwar, wah, ad tesřewřiw řewḍa s řefraḥet d usřiwřew. Ad as immewc uɛuǧi n Lubnan, řɛezz n Karmil u n řewḍa n Carun. Nitni ad ẓaren aɛuǧi n SIDI, řɛezz n AREBBI nneɣ.” 
“Smeḥḍem ifassen arxun u sjehdem ifadden ittemraywan. 
Inim i yinni ɣar iǧa uř iggʷed: ‘Iřim d iryazen, war tteggʷedem! Xzarem, AREBBI nwem ad ixřef, ad dd-yas wexřaf n AREBBI, Netta ad dd-yas s Yixef nnes, ad kenniw issenjem.’ 
Xenni ad nnurzment tiṭṭawin n iḍarɣařen uca ad ttwarezmen imezzuɣen n iduhcar. 
Xenni ad ingez uqidar am udad uca iřes n uzinun ad isřiwřew, maɣar ad dduqqzen waman di řexřa uřa d tiɣzarin di řewḍa. 
Tammurt yuẓɣen ad tedweř d ssarij u tammurt iffuden d tařawin ittbeqbuqen. Di temmurt n wuccanen n řexřa, mani arreyḥen, ad yiři arbiɛ ak-d uɣanim d wezraf.” 
“Ad din yiři ijj n webrid iseggmen, abrid nni i ɣa řaɣan ‘Abrid amqeddas!’. Uřa d ijj n umexmuj war xas iggur, maca ad yiři i nitni: man wen ma igguren x webrid-a, ɛad ibuhařiyyen war ttweddirin. 
War dinni ittiři wayrad, wah, war xas ittgiɛɛid niɣ ad ittwaf din uřa d ijj n řweḥc ittcarreg, maca inni ittwafekken ad xas uyuren. 
Inni ittwaṣeřḥen zi SIDI ad ɛeqben, ad dd-asen sřiwřiwen ɣar Ṣihyun. Řefraḥet n řebda ad tarsa x izeǧifen nsen. Afarrej d řefraḥet ad ɣarsen awḍen, acḍan d wesḥissef ad zzaysen arewřen.” 
