﻿Icaɛya.
24.
“Xzar, SIDI ad issexwa tammurt, ad tt issxarreb, ad iqeǧeb udem nnes uca ad ibezzeɛ imezdaɣ nnes. 
Am mammec iǧa řgens, ammu i ɣa yiři uřa d akehhan, am umsexxar uřa d sidi nnes, am tayya uřa d llalas, am umsewweq uřa d amzenzi, am areṭṭař uřa d wenni zzayes iksin arḍař, am bab n umarwas uřa d bu-umarwas nnes. 
Ad ssexwan tammurt marra, ad tt keccḍen qaɛ, maɣar SIDI inna awař-a!” 
“Tammurt tecḍen, tisřaw, ddunect teftuttes, tisřaw. Imcennɛen n řgens n temmurt teftuttusen. 
Tammurt tᵉttwassɛiǧet zeg imezdaɣ nnes, maɣar nitni ttɛeddan x izerfan, ttbeddařen tiweṣṣa, ttareẓẓan Řɛahd n řebda. 
X uya tᵉttett nneɛřet tammurt u yinni xas izeddɣen aqa daysen řɛib. S uyenni ad ttwasscemḍen imezdaɣ n temmurt, ad ceṭṭen drus n iwdan waha.” 
“Binu n jdid icḍen, tazayart teftuttes, marra inni tuɣa ifarḥen deg wuř, zehharen. 
Ṣafi ticti issfarraḥen n ibendiren, ddriz n yinni ineggzen s řefraḥet, ṣafi tinext issfarraḥen n řgambri. 
War sessen binu ɛad di řweqt n uɣennej, ccrab ad yiři d amerzag i yinni t isessen. 
Tandint ittwajjen d řxarbet, marra tudrin bellɛent i wadaf. 
Deg imesraq ttweɛɛḍen iwdan x binu, marra řefraḥet tweddar, asřiwřew iffeɣ zi tammurt. 
Min iqqimen n tendint d řxirbet issaggʷaden waha, u tawwart tᵉttwařbez. 
Ammu i ɣa tiři tendint din di řwest n temmurt, jar řegnus. Ad tiři am ɣar wezwaḍ n uzemmur, am ɣar weřqaḍ n uḍiř xmi ɣa teɛdu ṣṣabet.” 
“Nitni ad ssgeɛɛden tmijja nsen, ad sřiwřewen. Umi SIDI iɛuǧen aṭṭas, ad ssɣuyen nitni s řefraḥet zi mani tɣeǧi tfuct. 
X uya, sɛuǧem xenni SIDI di temmura n tfawt, sɛuǧem Isem n SIDI, AREBBI n Israil, di tegzirin n řebḥar! 
Zi tmuwwa qaɛ n temmurt nᵉttesřa i izřan, i uɛuǧi n Umsegged!” Xenni nniɣ: Necc fenniɣ, fenniɣ, uct xafi! Imkeccaḍen ttkeccaḍen, u imkeccaḍen ttkeccaḍen min ma xsen ad keccḍen. 
Tiggʷudi d tesraft d řfex ad xak iřin, a amezduɣ n temmurt! 
Wenni i ɣa yarewřen zi ddriz issaggʷaden, ad iwḍa di tesraft, d wenni i ɣa igeɛɛden zi tesraft, ad innaɣ di řfex, maɣar tiburjatin di řuɛřa ad nnurzment, dsusa n temmurt ad nhezzen. 
Tammurt ad tcarreg qaɛ, ad tfeǧeq temmurt d ifeǧaqen, ad tenhezz temmurt aṭṭas. 
Ad tmeyyeř temmurt ssa ɣar da am yijjen iscar, ad temraywa am yijj n uɛcuc i tmensiwt. Iɛeddiyen nnes ad xas ziyyaren aṭṭas, uca nettat ad tewḍa, war tzemmar ad tekkar ɛad.” 
“Deg wass nni ad ixřef SIDI x řɛeskar n řuɛřa di řuɛřa, uřa x ijeǧiden nni iǧan x wudem n temmurt ad zzaysen ixřef x wudem n temmurt. 
Ad ttwassmunen am yimeḥbas deg ict n tesraft u ad ttwaḥebdsen di řeḥbes u awarni i waṭṭas n wussan ad ɣarsen arzfen. 
Taziri ad tezweɣ s useḍḥi u tafuct tseḍḥa xmi ɣa yiři SIDI n řɛeskarat d Ajeǧid x wedrar n Ṣihyun u di Urcalim, uca zzat i imɣaren nnes ad dinni yiři uɛuǧi.” 
