﻿Icaɛya.
21.
Řḥukm issaggʷaden x řexřa n řebḥar. “Am mammec ttazzřent tḥaryaḍin di Temmurt n Ljanub, ammu i ɣa iffeɣ netta zi řexřa, zi temmurt issaggʷaden. 
Tusa-dd ɣari ijj n řewḥiy iqseḥ: ‘Aɣeddar ittegg s řeɣdaret u amteḥḥay ad iteḥḥa. Geɛɛed-dd, a Ɛilam, ḥṣar, a Maday!’ Necc ad ssbeddeɣ marra azehhar nnes. 
X uya tteksent dayi tejɛinnatin inu, u ṭṭfen ayi řewjeɛ n tarut am řewjeɛ n ict n temɣart ittarwen. Necc ttnezbareɣ xmi d as ttesřiɣ, nnxeřɛeɣ umi t ttwařiɣ. 
Uř inu innejref, aqarqeb nnes issenhezza dayi tiggʷudi. Tbambast n tmeddit nni wehhceɣ aṭṭas, igga ayi tt d řɛurret.” 
“Srusa-dd ṭṭabřa, sbedd aɛessas, ecc, su!” “Kkarem, a řḥukkam, dehnem taseddart n useřqi!” 
Maɣar ammu i d ayi inna Sidi: “Uyur, egg ijj n uɛessas, ejj i-t ad ixebbar min ittwařa!” 
Aqa iẓra iryazen nni inyin x yeysan, tyuya n imnayen ak-d tyuya nneɣni, ijj n ukaravan n yeɣyař d ijj n ukaravan n iřeɣman. Tuɣa iḥeṭṭa mliḥ, mliḥ aṭṭas. 
Xenni iřaɣa wenni tt iẓrin: “A Sidi inu, deg wass ttbeddiɣ břa qeṭṭu x wecbar n tɛessast u kuř ǧiřet ttɛesseɣ. 
Xzar, diha usin-dd iryazen nni inyin x yeysan, tyuya n imnayen ak-d tyuya nneɣni!” Ɛawed iṭṭef netta deg wawař, inna: “Tewḍa tendint n Babil, tewḍa, d marra řexyařat ineqcen n irebbiten nnes iřbez i-ten x temmurt!” 
A asarwat inu, a mmis n unedrar inu! Min sřiɣ zi SIDI n řɛeskarat, AREBBI n Israil, xebbareɣ kenniw xas. 
Řḥukm issaggʷaden x Duma. “Zi Saɛir řaɣan ayi-dd: ‘Aɛessas, mecḥař ɛad ɣa tekk ǧiřet? Aɛessas, mecḥař ɛad ɣa tekk ǧiřet?’ 
Inna uɛessas: ‘Yusa-dd uteffu n řḥař, uřa d ǧiřet tusa-dd. Mařa kenniw texsem ad tesseqsam, seqsam! Dewřem-dd, asem-dd!’” 
Řḥukm issaggʷaden di tmeddit. “Deg wezɣar di temmurt n Weɛraben ad tessensem, a kenniw, ikaravanen n ayt n Dadan! 
Uyurem ɣar wumsagar ak-d wenni iffuden ḥima ad as tawyem aman! Imezdaɣ n temmurt n Tayma ffɣen-dd ɣar umsagar ak-d umarwař s weɣrum. 
Maɣar nitni arewřen zi řesyuf, zi ssif i dd-ittwajebden, zi řqews ittwameḥden u zi řeɣben n umenɣi. 
Maɣar ammu i d ayi inna Sidi inu: ‘Ɛad deg ijj n useggʷas, ɛlaḥsab iseggʷusa n ucewwař, xenni ad iqḍa marra x uɛuǧi n Qidar! 
Řqedd n ayt n bu-řqews iqqimen, ayt n bu-teɣřudṭ n Qidar, ad yiři drus waha, maɣar SIDI, AREBBI n Israil d wenni innan aya.’” 
