﻿Icaɛya.
1.
Řewḥiy n Icaɛya, mmis n Amuṣ, nni iẓra x Yahuda d Urcalim, deg wussan n Ɛuzziya, Yutam, Aḥaz d Ḥizqiya, ijeǧiden n Yahuda. 
“Sřem, a ijenwan, uca sseɣd, a tammurt, minzi SIDI issawař: ‘Necc sseymeɣ iḥenjiren u ssemɣareɣ ten, maca nitni ɣewwɣen xafi. 
Afunas issen bab nnes d usnus řmedwed n sidi nnes, maca Israil war ɣares bu tussna, řgens inu war dayes teǧi řefhamet. 
Uct x řgens i ixḍan, řgens i x iǧa ddqeř n řmuɛṣiyyet, zzariɛet n iɛeffanen, tarwa n usnexřiɛ. Nitni jjin SIDI, sseḥqaren Amqeddas n Israil, arrin as-dd s weɛrur. 
Mani tᵉttexsem ad tᵉttwawtem ɛad, umi kenniw teqqimem tᵉttɣewwaɣem. Azeǧif marra ihřec, uř marra yuheř aṭṭas. 
Zi třeqqa n uḍar ař azeǧif war dayes tᵉttifed min iṣebḥen! Mɣir iyezzimen, ṭṭeɛbayar d iyezzimen yarezmen, war ten hennḍen, war ten ssyarḍen, war ten ssareḍben s zzect. 
Tammurt nwem texřa, tineddam nwem sscemḍen tent s tmessi, tammurt nwem ṣṣarden tt ibarraniyyen zzat i tiṭṭawin nwem, aqa-tt d řxirbet axmi ssenqeřben tt ibarraniyyen. 
Yeǧis n Ṣihyun teqqim ɣar ḍeffar am yict n tɛiccut deg umarjeɛ n uḍiř, am texxant n uɛessas deg iyyar n řexyar, am tendint ittwaḥṣaren. 
Mři SIDI n řɛeskarat war d aneɣ ijji drus min yarewřen, iři nedweř am Sadum, iři negga am Ɛamurra.’” 
“Sřem i wawař n SIDI, a řḥukkam n Sadum! Wcem amezzuɣ i Ccariɛa n AREBBI, a řgens n Ɛamurra! 
Min ɣa ggeɣ s tɣarṣi nwem, iqqar SIDI. Necc jjiwneɣ zi tɣarṣa n wecmaḍ n icarriyyen u zi tadunt n řmař iṣeḥḥen. Idammen n ifunasen imeẓyanen d yezmaren d iɣayḍen war d ayi tteɛjiben. 
Xmi dd-tᵉttasem ḥima ad tbanem zzat i wudem inu, wi kenniw iɛarḍen i uya, maḥend ad tɛefsem x řemraḥat inu? 
War d ayi dd-tawyem ɛad tawhibt ibeḍřen. Řebxur ɣari d nnɛi. Ussan n iyuren n jdid d wussan n ssebt d uřaɣi i tmesmunin iqeddsen war zemmareɣ ad ḥemřeɣ marra aya, aqa-t d řmuɛṣiyyet, ɛad uřa d amuni ifarzen. 
Řeɛmar inu icarreh ussan n uyur n jdid nwem d řeɛyudat nwem ittwaggen. Aqa aten dewřen ɣari d řeḥmeř, Necc uḥřeɣ ad ten arbuɣ. 
Xmi tᵉttsarraḥem ifassen nwem, ttřeḥḥfeɣ i tiṭṭawin inu zzaywem. Ɛad mařa kenniw tarnim di tẓaǧit, Necc war tt ttesřiɣ, maɣar ifassen nwem ɛemmaren s idammen. 
Sirdem, sizdegem ixef nwem, ssiggʷejem tuɛeffna n tmegga nwem zi zzat n tiṭṭawin inu. Sbeddem zi řɣar i tᵉtteggem. 
Řemdem ad teggem min iṣebḥen, arzum x řḥeqq, wcem afus i wenni iḥsaren, ggem tasɣart i uyujiř, wtem x tajjač.” 
“Asettiw-dd u ejj aneɣ ad nᵉttemḥakem ak-d wayawya!, iqqar SIDI. Waxxa ddnub nnec d izeggʷaɣen am uzeggʷaɣ iḥedqen, ad dewřen d icemřaren am wedfeř, waxxa d izeggʷaɣen am uzeggʷaɣ yuǧɣen, ad dewřen d icemřařen am tḍuft. 
Mařa kenniw tɛewwřem, u ad tesřem, xenni ad teccem min iṣebḥen n temmurt, 
maca mařa kenniw tugim uca ad tɣewwɣem, ad kenniw yecc ssif, maɣar aqemmum n SIDI aqa issiweř!” 
“Mammec tedweř tendint nni dayes řaman d tamɣart n farq-ccɣeř! Nettat tuɣa teccur s řḥeqq, tasegda tuɣa tᵉttnusa dayes, maca řexxu iqettařen. 
Nnuqart nnem tedweř d kuffu, binu nnem ṣṣuren t ak-d waman. 
Řḥukkam nnem ttɣewwɣen, aqa ggin ixewwanen d imeddukkař nsen, marra ttexsen tirzifin uca arezzun x arrecwet. Nitni war ttiɣen i uyujiř tasɣart nnes, ddeɛwet n tijjař war ten tᵉttikkwiḍ.” 
“S uya iqqar Sidi, SIDI n řɛeskarat, Amzemmar n Israil: ‘Uct xawem! Necc ad ssfewwjeɣ ixef inu s iɣrimen inu, Necc ad xeřfeɣ ixef inu zi řɛedyan inu. 
Necc ad wteɣ afus inu xawem, ad kenniw ṣeffiɣ ak-d llixiyya uca marra řexfif nnem ad t weddareɣ. 
Necc ad am wceɣ ɛawed řquḍat nnem am ɣar umezwaru, d ayt n ccwar nnem am ɣar umezwaru. Awarni aya ad am řaɣan: ‘Tandint n tsegda!’ d ‘Tendint dayes řaman!’ 
Ṣihyun ad tᵉttwassenjem s řḥeqq d yinni zzayes ittuben ad ttwassenjmen s tsegda, 
maca imɣewwɣen d imednab ad ttwarẓen jmiɛ, uca inni i ɣa iḥeyyden x SIDI, ad ttwaqḍan. 
Nitni ad seḍḥan zi ssibbet n tcejjura n l’aṣnam nni di temmeẓrem uca kenniw ad tseḍḥam zi ssibbet n iḥwicen nni tixḍarem kenniw. 
Maɣar kenniw ad tiřim am tcejjart n yigg i zi afar nnes isřaw, u am weḥwic i war ɣar ǧin waman. 
Ad idweř wenni ijehden d ijj n ufiřu n tiffest u řxedmet nnes d ict n tfeṭṭut, ad arɣen s tnayen idsen munen uca war din iǧi uřa d ijj wi ɣa issxesyen.’” 
