﻿Izři x izřan.
8.
“Ax, meɛlik qaɛ cek d uma, tᵉṭṭeḍed di tbibbicin n yemma. Mařa ufiɣ cek di barra, ad cek ssudmeɣ, břa ma d ayi sseḥqaran. 
Iři ad cek nedheɣ, ad cek awyeɣ ɣar taddart n yemma, cek ad ayi tessřemded din. Ad ac wceɣ binu ittfuḥen s řeɛṭur ad teswed, aẓemmi n tcejjart inu n waremman. 
Azeřmaḍ nnes sadu uzeǧif inu, afusi nnes idarreɛ ayi-dd. 
Necc ad kennint ssjaǧaɣ, a yessis n Urcalim: Mayemmi ɣa thewřent tayri niɣ ad tt-i-dd-tessekkarent, qbeř ma tᵉttexs nettat?” 
“Min teɛna nni din ittgeɛɛaden zi řexřa, tᵉttɛemmed x llif nnes?” “Sadu tcejjart n tteffaḥt arreɣ meẓri nnem, mani cem dd-tejja yemmam s řeḥriq n tarwa, mani cem dd-tejja tenni cem dd-yurwen.” 
“Sars ayi am ṭṭabeɛ x wuř nnec, am ṭṭabeɛ x uɣiř nnec, maɣar tayri tejhed am řmewt, tusmi teqseḥ am řaxart, tifeṭṭutin nnes d tifeṭṭutin n tmessi, aqa atent am uceɛɛař n SIDi. 
Aṭṭas n waman war zemmaren ad ssxesyen tayri, uřa d iɣezran war tt ttiwyen. Waxxa iwca ijjen i tayri marra agřa n taddart nnes, ad t sseḥqaren d aseḥqar.” 
“Neccin ɣarneɣ ict n učmatneɣ tameẓyant, ɛad war d as dd-ffiɣen idmaren. Min ɣa negg i učmatneɣ deg wass i di xas i ɣa ssiwřen?” 
“Mařa nettat d řḥiḍ, ad xas nessbedd acbar am ijj n ttaj n nnuqart. Mařa nettat d tawwart, ad tt neqqen s tfeřwin n ukeccuḍ n tengelt.” 
“Necc d řḥiḍ u idmaren inu am lburjat. Xenni dewřeɣ necc di tiṭṭawin nnes am tenni yufin řeḥna.” 
“Suliman tuɣa ɣares ijj n umarjeɛ n uḍiř di Baɛl-Hamun. Iwca amarjeɛ nni i iɛessasen. I řɣiǧet nnes qaɛ ijj yiwi-dd ařef n řewzen n nnuqart.” 
“Aḥwic n uḍiř inu, aqa-t zzat i tiṭṭawin inu. Ařef n řewzen n nnuqart aqa aten i cek, a Suliman, u ařfayen i iɛessasen n řɣiǧet zzayes.” 
“A cem tenni izeddɣen deg iḥwicen, iɛciren nnem ttesřan s imezzuɣen nsen i tmijja nnem, qqaren: ‘Ejj ayi ad tt sřeɣ!” 
“Deɣya, a llif inu, egg am yiɣayḍ n wezɣar niɣ am umeẓyan n udaden, x idurar iccuren s řeɛcub ittfuḥen.” 
