﻿Izři x izřan.
5.
“Necc usiɣ-dd ɣar weḥwic inu, a učma, a tasřit inu, řeqḍeɣ mirru inu ak-d balsam. inu, cciɣ aɣrum n tzizwa ak-d tamment inu, swiɣ binu inu d uɣi inu. Imeddukkař, eccem, swem, scarem, a imɛizzen!” 
“Necc ṭṭseɣ, maca uř inu ifaq. Aqa da tmijja n llif inu, wenni issqarqben: ‘Arzem ayi, a učma, tameddukkeč inu, tadbirt inu, a kuřci inu, maɣar azeǧif inu iccur s nnda, imuzaren inu ccuren s tuddimin n ǧiřet!’ 
Aqa kkseɣ arruḍ inu, mammec i t ɣa yarḍeɣ ɛawed? Iḍaren ssirdeɣ ten, ma ad ten ssxemjeɣ ɛawed? 
Llif inu issekk-dd afus nnes zeg unuqqib n tewwart, uca inhezz wuř inu zzayes. 
Necc beddeɣ ḥima ad arzmeɣ i llif inu, ifassen inu udumen s mirru, zeg iḍewḍan inu issizzeř mirru x ifassen n zzekrun. 
Necc arzmeɣ i llif inu, maca llif inu tuɣa yuyur, iɛdu. Iffeɣ řeɛmar inu umi tuɣa issawař! Necc arzuɣ xas, maca war t ufiɣ. Necc řaɣiɣ as, netta war xafi dd-yarri. 
Ufin ayi iɛessasen ɣar wenneḍ nsen di tendint, nitni wtin ayi, yezmen ayi, aqendur inu kksen ayi t iɛessasen n řeḥyuḍ.” 
“Necc ad kennint ssjaǧaɣ, a yessis n Urcalim, mařa kennint tufint llif inu, min d as ɣa tinint? Aqa tesseḥřec ayi tayri.” 
“Min ɣares ɣar llif nnem ktar x llif nneɣni, a cem i di iǧa waẓri qaɛ zi temɣarin? Min ɣares ɣar llif nnem ktar x inneɣni, aqa cem ammu i d aneɣ tᵉssjaǧad?” 
“Llif inu d acemřař ittissiqen d azeggʷaɣ am idammen, ittban am ubandu sennej x ɛecra n řuřuf. 
Azeǧif nnes d ureɣ iqqur iṣfan, imuzaren n ucuwwaf nnes d tiwririn itteggen am řemwaj, d ibarcanen am yibaɣřiwen. 
Tiṭṭawin nnes ggint am tedbirin ɣar tseǧyawin n waman, ɛumment deg uɣi, qqiment di tcuyar nsen am iẓra iɣřan. 
Imeggizen nnes ggin am yiḥwicen n řeɛṭur, ccuren s řeɛcub ittfuḥen, iyencicen nnes am tlillicin, ttudumen s mirru ifesyen. 
Iɣaǧen nnes am yiqeḍban n wureɣ, ɛemmarent s iẓra n texrisulit, aɛeddis nnes igga am řɛaj ittissiqen, řeḥḥfen t s tyaqutin n ṣaffir. 
Imesḍan nnes d ipilaren n řmarmur, x dsusa n wureɣ ittwaṣeffan. Iban-dd netta am Lubnan, ittwafarz am tcejjart n tengelt. 
Aneɣ nnes iccur s taẓyudi, marra i ɣares icuwwar. Wa d llif inu, wa d ameddukkeř inu, a kennint yessis n Urcalim!” 
