﻿Izři x izřan.
1.
Izři x izřan nni iǧan n Suliman. 
“Ejj i-t ad ayi issudem s isudimen n uqemmum nnes, minzi usḥinneb nnec ḥsen zi binu. 
Řefwaḥet n zzect nnec tecna, isem nnec am zzect izeǧɛen, x uya ttexsent cek teɛzariyyin. 
Jbed ayi awarni ac, neccin ad nazzeř awarni ac! Ajeǧid indeh ayi deg ixammen nnes. Ejj aneɣ ad narceq u ad zzayek nfarḥ, ad neɛqeř x usḥinneb nnec ktar x min ɣa neɛqeř x binu. Nican ttexsent cek.” 
“D tabarcant necc, u ṣebḥeɣ, a yessis n Urcalim, am tqiḍunin n Qidar, am řizarat n Suliman. 
War d ayi xezzarent ammu, minzi necc bbarcneɣ, minzi tessecmeḍ ayi tfuct, iḥenjiren n yemma tuɣa xeyyqen xafi, ggin ayi ad ḥḍiɣ imarjaɛen n uḍiř. Amarjeɛ n yixef inu war t ḥḍiɣ ca.” 
“Cek, wenni ittexs buḥbeř inu, ini ayi, mani tarekkwesed, mani tessareyyaḥed taḥimart ɣar ṭḥa n uziř, minzi i umi ɣa iřiɣ am tenni iḥejben ɣar tḥimriwin n imɛacaren nnec?” 
“Mařa cem war t tessined, cem tenni icnan qaɛ jar temɣarin, xenni ffeɣ, ḍfar řatar n wuǧi, arwes tiɣaḍtin nnem mani zeddɣen imeksawen.” 
“Ssemquddiɣ cem ak-d řɛewda inu zzat ikarruten n firɛun, a tameddukkeč inu. 
Mecḥař ṣebḥen imeggizen nnem jar tseddyin, iri nnem jar ifiřan s tyaqutin. 
Ad am negg tiseddyin n wureɣ, ak-d tneqqiḍin n nnuqart.” 
“Min ɣa yekk ujeǧid iqqim ɣar ṭṭabřa nnes taqurarit, itticc ṣṣenbel inu řefwaḥet nnes. 
Llif inu ittegg ayi am tecyart n mirru, tenni issensen jar idmaren inu. 
Llif inu i necc am tqebbiḍt n newwac n řḥenni, deg imarjaɛen n uḍiř n Ɛayn-Jadi.” 
“Xzar, tecnid cem, tameddukkeč inu! Xzar, cem tecnid, tiṭṭawin nnem d idbiren.” 
“Xzar, cek tecnid, a llif inu, wah, tḍarfed, tuzzizewt d tassut nneɣ, 
Tiḥenya n tudrin nneɣ d tineglin, tiḥenya n tzeqqa aqa atent d ticejjura n umerzi.” 
