﻿Ambarreḥ.
12.
Idar Wenni cek dd-ixeřqen deg wussan n temẓi nnec, qbeř i dd ɣa yawḍen wussan n řɣar i zi ɣa tinid: “War daysen ufiɣ řefraḥet!”, 
qbeř ad tᵉttwabarcen tfuct d tfawt d tziri d itran uca ad dd-ɛeqben iseynuten awarni i wenẓar, 
ɣar wass min di iɛessasen n taddart ad arjijen, iryazen ijehden ad qewsen, tinni iḥarryen tasirt ad ssbeddent tawwuri nsent, minzi nitenti qqiment drus idsent, uca timɣarin nni dd-issajjan zi řkwazi, ad ttwařeḥḥfent s taǧest, 
u tnayen n tewwura ɣar zzenqqet ad ttwabellɛent, xmi ddriz n tsirt ad isseɣd uca řḥess n ujḍiḍ ad t issiggwed deg yiḍes u marra yessis n uɣennij ad dewřent qewsent, 
u bnadem ad iggʷed zi marra min iǧan yuɛřan, uca ad din iřint ɛřam kuř řeḥwayej inexřiɛen deg webrid, u tacejjart n ǧewz ad tnewwar u aburxes ad idweř d tamara u tanewwact n ‘ukebbas’ war d as dd-yusi ɛad ɣar řbař - maɣar bnadem iggur ɣar taddart nnes n řebda u inni iceṭṭnen ad raḥen ad dd-tasen deg ibriden - 
qbeř i ɣa tᵉttwarxu tesɣunt n nnuqart, ad tᵉttwarẓ ṭṭawyyet n wureɣ, ad innefrar weqbuc ɣar tařa uca ad teqḍu tjarrart deg wanu, 
uca ucař ad dd-iɛqeb ɣar temmurt am mammec t-tuɣa, u buḥbeř ad dd-iɛqeb ɣar AREBBI, wenni t iwcin. 
D ibeṭṭařen qaɛ, iqqar Umbarreḥ, aqa kuřci di řbaṭeř. 
Sennej i uya, minzi Ambarreḥ tuɣa-t d amiɣis, isseřmed ɛawed tussna i řgens, tuɣa ittbařu, ittbeqqac mliḥ, uca iɛdeř aṭṭas n wawařen iweznen. 
Yarzu Umbarreḥ maḥend ad yaf awařen iɛedřen, u min yura, aqa-t nican, awařen n tidett. 
Awařen n imiɣisen am yisennanen u amecnaw imesmiren ittwassidfen, i zzaysen i-dd-ttasent aṭṭas n tmesřayin, aqa-ten mmewcen zeg uyenni n Umeksaw. 
Sennej i marra aya, a mmi, ḥḍa ixef nnec: war din aqeṭṭu n tira n waṭṭas n idlisen u aṭṭas n tɣuri tessaḥař arrimet. 
Awař aneggaru n marra min tesřid, aqa t d wa: “Ggʷed AREBBI u ḥḍa tiweṣṣa nnes!”, maɣar man aya i yurin i kuř ijj n bnadem. 
Maɣar SIDI ad yawi kuř tameggit zzat i taddart n ccreɛ x marra min innuffaren, ma tuɣa iṣbeḥ niɣ tuɣa war iḥři. 
