﻿Ambarreḥ.
10.
Izan ineqqen ttarran zzect n wedhan n uɛeṭṭar ad tarṣuḍ u ad tesmem. Drus n tubbuheřya twezzen aṭṭas x tiɣit d ccan. 
Uř n umiɣis aqa-t i netta afus nnes afusi, maca uř n ubuhaři i wanita afus nnes azeřmaḍ. 
Uřa deg webrid min xef iggur ubuhaři, uř nnes war imtin, iqqar i marra aqa netta d abuhaři. 
Mařa xak ixeyyeq buḥbeř n bu-jjehd, war tteggʷij x wemcan nnec, maɣar man aya d ddwa, yaressa ddnub imeqqranen. 
Aqa din ijj n řɣar nneɣni nni ẓriɣ sadu tfuct, aqa-t d ijj n uweddar i dd-iffɣen zeg ijj n bu-ṣṣulṭa: 
asgeɛɛad aṭṭas n tubbuheřya, am ttɣiman ayt n bu-wagřa swadday. 
Necc ẓriɣ imsexxaren nyin x yeysan uřa d řḥukkam nni igguren am yimsexxaren x iḍaren nsen x temmurt. 
Wenni itteqqazen aḥfur, ad dayes iwḍa s yixef nnes, wenni issnuqqben řḥiḍ, izemmar ad as iqqes ufiɣar. 
Wenni ikksen iẓra, ad zzaysen iyzem ixef nnes, wenni ittfettqen akeccuḍ, ad yiři di lxaṭar. 
Mařa uzzař n ccaqur idweř iḥfa u bab nnes war t isseqḍeɛ, xenni ittxeṣṣa as jjhed ktar, maca tiɣit tecna aṭṭas ḥima ad ifřeḥ bnadem. 
Mařa izɛef ufiɣar qbeř aɛezzem, war din řefḍeř i uɛezzam. 
Awařen zeg uqemmum n umiɣis daysen arḍa, maca iyencicen n ubuhaři ṣarḍen t simant nnes. 
Beddu n wawařen zeg uqemmum nnes d tubbuheřya u aneggaru n min dd-iffɣen zeg uqemmum nnes d aṭemmes aɛeffan. 
Abuhaři ittkettar řhard aṭṭas, maca bnadem war issin min ɣa imsaren, u min ɣa imsaren awarni as, wi d as t i ɣa iɛawden? 
Amarret n ibuhařiyyen ittarra i-ten uḥřen, maɣar nitni war ssinen mammec ɣa yuyuren ɣar tendint. 
Uct xam, a tammurt, mařa ajeǧid nnem d aḥenjir ɛad, u řḥukkam nnem ɣar teffut ttᵉtten! 
Sseɛd nnem, a tammurt, mařa ajeǧid nnem d mmis n tarwa n taṣiřet, u řḥukkam nnem ttᵉtten ɣar řweqt ittwaggen, maḥend ad ttwameḥden, war iǧi maḥend ad skaren. 
S řeɛgez i hekkwant tiḥenya u s ifassen yarehfen ad tudum taddart. 
Bnadem ittegg aɣrum maḥend ad iḍḥec, binu issfarraḥ inni iddaren u tmenyat neffɛent i marra min iǧan. 
War neɛɛeř ajeǧid ɛad di řbař nnec, deg wexxam n yiḍeṣ war neɛɛeř bu-wagřa, maɣar ijḍaḍ n ujenna zemmaren ad ssuyuren řḥess n wawařen nnec u ammu marra wi ɣar ǧan wafriwen izemmar ad isseɛdu awař. 
