﻿Ambarreḥ.
8.
Wi iǧan am umiɣis u wi issnen ad ifekk ict n tmesřact? Tiɣit n bnadem tᵉttarra aɣembub nnes ittnewwar uca tbeddeř tifras n řeqseḥ n uɣembub nnes. 
Necc qqareɣ: “Ḥḍa aḍebbar n ujeǧid!” u man aya di ssibbet n tjaǧit n AREBBI. 
War ttiggʷij s tazřa x wudem nnes, war ttegg azeǧif nnec di tmesřact taɛeffant, maɣar netta igga marra min xef yarḍa. 
Awař n ujeǧid dayes ṣṣulṭa temɣar. Man wen izemmaren ad as yini: “Min tᵉttegged cek?” 
Wenni iḥeṭṭan tawṣeyyet, war t iřeqqef walu n min iǧan d aɛeffan. Uř n umiɣis issen řḥař d řḥukm. 
Maɣar i kuř anway ijj n řḥař d ijj n řḥukm, maɣar tuɛeffna n bnadem tessedqař i-t. 
Maɣar netta war issin min ɣa imsaren, maɣar man wen i d as t i ɣa isscnen mammec ɣa yiři aya? 
War din iǧi uřa d ijj n bnadem izemmar x usuḍi n usemmiḍ ařami izemmar ad xas ibelleɛ. War din iǧi uřa d ijj ɣares ṣṣulṭa x wass n řmewt, u war din iǧi uřa d ijj izemmar ad iksi ttesriḥ deg umenɣi, u tuɛeffna war tejji ad nejmen aytbab nnes. 
Marra aya ẓriɣ t, umi ssenqeřbeɣ uř inu ɣar marra min ittwaggen sadu tfuct, di řweqt řami iṣelleṭ bnadem x bnadem nneɣni i druct nnes. 
Ammu i ẓriɣ iɛeffanen nni tuɣa ittwaneḍřen, udfen ɣar wenḍeř, umi yinni iggin min iǧan nican ffɣen zeg wemcan amqeddas, ttwattun di tendint. Uřa d man aya di řbaṭeř. 
Maɣar řḥukm x tɛeffant war ittwagg deɣya, x uya iccur wuř n tarwa n bnadem maḥend ad ggen min iǧan d aɛeffan. 
Waxxa amednub ittegg taɛeffant mya n twařawin u iddar aṭṭas, waxxa amenni ssneɣ aqa inni itteggʷeden AREBBI ad feřḥen, inni zzayes itteggʷeden. 
Aɛeffan maca war ittiři mliḥ u war ɣares tᵉttiři tudart d tazirart. Netta ad yiři am tiři, maɣar war itteggʷed AREBBI. 
Aqa din ca min ittwaggen x temmurt nni iǧan di řbaṭeř: aqa din imseggaden ittemmsar asen axmi tteggen am yiɛeffanen, u aqa din iɛeffanen ittemsar asen axmi tteggen tasegda. Necc nniɣ: uřa d man aya di řbaṭeř. 
S uyenni i ttṣebbaḥeɣ řefraḥet, maɣar war din iǧi i bnadem min iǧan ḥsen di tudart nnes sadu tfuct mɣir mařa netta ittett, isess u ifarreḥ. Iři aya ad t iɛacar deg umarret nnes di marra ussan n tudart nnes i d as yarzef AREBBI sadu tfuct. 
Umi tuɣa ggiɣ uř inu maḥend ad ssneɣ tiɣit u maḥend ad xzareɣ man tasebbabt i igguren x temmurt - maɣar am s wass am s ǧiřet bnadem war ittic ca arraḥet i tiṭṭawin nnes - 
ẓriɣ marra min igga AREBBI, aqa bnadem war izemmar ad yaf min ittwaggen, ixs ad yini min ittwaggen sadu tfuct. Maɣar mammec i ɣa imarret bnadem am yarezzu, war ittif walu. Waxxa amiɣis ad yini belli netta issen, netta war izemmar maca ad t yaf. 
