﻿Ambarreḥ.
6.
Aqa din ijj n řɣar nni ẓriɣ sadu tfuct nni imsaren aṭṭas jar iwdan: 
ijjen yarzef as AREBBI agřa d txubay d ccan. Aqa war ittxeṣṣi walu i řeɛmar nnes zi marra min dayes d meẓri, maca AREBBI war t ijji ad zzayes icc, maɣar ijj n ubarrani ad t icc. Aqa uřa d man aya di řbaṭeř d ijj n řɣar d aɛeffan. 
Mařa ijj n weryaz yejj-dd mya n iḥenjiren u iddar aṭṭas n iseggʷusa, ařami dewřen wussan n tudart nnes deg waṭṭas, maca řeɛmar nnes war ijjiwen ca s řxar u war ittwif wenḍeř i netta, necc ad iniɣ: ijj n weɣray icna as x netta. 
Maɣar yusa-dd di řbaṭeř uca iffeɣ di taǧest u s taǧest ittwařeḥḥef isem nnes. 
Netta ɛawed war iẓri tafuct u war tt issin. Ammu ɣar weɣray-a řhudnet ktar x weryaz nni, 
waxxa netta iddar ařfayen n iseggʷusa, maca břa ma ad iẓar řxar! Ma war igguren kuř ijj ɣar wemcan d ijj? 
Marra amarret n bnadem i uqemmum nnes, waxxa amenni ɛemmarṣ war ittccuri řeɛmar nnes. 
Maɣar man řefḍeř i umiɣis x ubuhaři? Man řefḍeř i umezřuḍ nni issnen ad yuyur qibač i yinni iddaren? 
Iḥřa ad teẓrid min iǧan zzat i tiṭṭawin x wetlaɛ n řeɛmar. Uřa d man aya di řbaṭeř d weḍfar n usemmiḍ. 
Min ma iǧa ca n ijjen, aqa isem nnes ittwařaɣa qbeř, u tuɣa ittwassen min ɣa yiři bnadem: netta war izemmar ad imcubbec ak-d Wenni xas ijehden. 
Maɣar aqa din aṭṭas n wawařen nni yarennyen di min iǧan di řbaṭeř. Man řefḍeř n uya i bnadem? 
Maɣar wi izemmaren ad issen min iḥřan i bnadem di tudart nnes di řweqt n řqedd n wussan n tudart nnes ifennan nni issɛeddu am tiři? Maɣar wi izemmaren ad isscen i bnadem min ɣa imsaren awarni as sadu tfuct? 
