﻿Ambarreḥ.
3.
Marra ɣares řmijař nnes u aqa din ɛawed tasaɛɛet ittwaggen i kuř anway sadu ajenna. 
Aqa din ict n tsaɛɛet n tarwa d ict n tsaɛɛet n řmewt, ict n tsaɛɛet n taẓẓut d ict n tsaɛɛet n weqřaɛ n min itwaẓẓun, 
ict n tsaɛɛet n tmenɣiwt d ict n tsaɛɛet n usgenfi, ict n tsaɛɛet n wehdam d ict n tsaɛɛet n řebni, 
ict n tsaɛɛet n imeṭṭawen d ict n tsaɛɛet n tḍeḥḥact, ict n tsaɛɛet n wecḍan d ict n tsaɛɛet n ccḍiḥ, 
ict n tsaɛɛet n uḥejjar n weẓru d ict n tsaɛɛet n wejraw n weẓru, ict n tsaɛɛet n udarreɛ d ict n tsaɛɛet n řaggʷaj x udarreɛ, 
ict n tsaɛɛet n tarezzut d ict n tsaɛɛet n uweddar, ict n tsaɛɛet n uxemmer d ict n tsaɛɛet n wenḍar, 
ict n tsaɛɛet n ucarreg d ict n tsaɛɛet n uxeyyeḍ, ict n tsaɛɛet n useɣdi d ict n tsaɛɛet n řhard, 
ict n tsaɛɛet n tayri d ict n tsaɛɛet n wecrah, ict n tsaɛɛet n garra d ict n tsaɛɛet n řehna. 
Man tizi ɣar wenni ixeddmen x min xef yarebber? 
Necc ẓriɣ ccɣeř nni iwca AREBBI i tarwa n bnadem maḥend ad zzayes ssiḥřen ixef nsen. 
Netta igga marra d aṣebḥan di řweqt nnes. Igga uřa d řweqt n řebda deg wuř nsen, břa ma izemmar bnadem ad iḥaka di tmegga nni igga AREBBI zeg umezwaru ař aneggaru. 
Necc ufiɣ war ɣarsen iǧi min iḥřan x minni farrḥen iwdan niɣ ad arren meẓri meřmi nitni ɛad di tudart nsen, 
u ɛawed aqa kuř bnadem ad icc, ad isu uca ad yarr meẓri di min iṣebḥen di marra amarret nnes. Aya d ict n tarzeft n AREBBI. 
Necc ssneɣ aqa marra min ittegg AREBBI, ad yiři i řebda. War izemmar ad ɣares ittmarni walu u war zzayes ittwassenqis walu. AREBBI igga i-t maḥend ad ggʷeden zzat i wudem nnes. 
Min iǧan, tuɣa iǧa qbeř uca min i ɣa yiřin, tuɣa iǧa qbeř. AREBBI yarezzu x min iɛdun ɛad. 
Aqa ẓriɣ sadu tfuct ɛawed amcan n řḥeqq: aqa iselleṭ din řɣecc, uca ẓriɣ uřa d amcan n tsegda: aqa iselleṭ din řɣar. 
Necc nniɣ deg wuř inu: “AREBBI ad iḥkem amsegged d uɛeffan, maɣar dinni ict n tsaɛɛet i kuř anway u i qaɛ řxedmet.” 
Necc nniɣ deg wuř inu: “Aqa di ṭṭweɛ n tarwa n bnadem, aqa AREBBI ad ten issifef u nitni ad twařan aqa nitni am řmař, nitni s yixef nsen.” 
Maɣar x tira n tarwa n bnadem u x tira n řmař: nitni ɣarsen tira d ict. Am mammec immut wa, immut uřa d wenneɣni, marra idsen ɣarsen d twarrit n nnefs d ijj. War din iǧi řefḍeř i bnadem x řmař, maɣar marra aqa-t di řbaṭeř. 
Marra idsen gguren ɣar ijj n wemcan, marra nitni zeg ucař uca ad dd-dewřen ɣar ucař. 
Wi issnen, ma buḥbeř n tarwa n bnadem ad igeɛɛed ɣar sennej u buḥbeř n řmař ad dd-ihwa ɣar temmurt? 
Ammu i ttwařiɣ, war iǧi min iḥřan x minni ifarreḥ bnadem di tmegga nnes, maɣar man aya d tasɣart nnes, minzi man wen izemmaren ad t yarr ař ɣa iẓar min ɣa yiřin awarni as? 
