﻿Awařen Iweznen.
30.
Awařen n Ajur, mmis n Yaki, zi teqbič n Massa. Necc arbeřeɣ, a Arebbi, necc arbeřeɣ, a Arebbi, u kemmřeɣ. 
Maɣar necc d aqeffuḥ, war iǧi d bnadem, řefhamet n bnadem war ɣari teǧi. 
Necc war řmideɣ tiɣit, maḥend ad ɣari tiři tussna n Umqeddas Ameqqran. 
Wi igeɛɛden ɣar ujenna uca ihwa-dd? Man wen iyarrwen asemmiḍ deg ifassen nnes? Wi issennḍen aman deg warruḍ? Wi yarekknen marra tineggura n temmurt? Man Isem nnes u man Isem n Mmis? Cek tessned t, ma war iǧi amenni? 
Kuř awař n Arebbi ittwaṣeffa, aqa Netta d adurri i yinni ɣares dd-yarekkwařen. 
War arenni ɣar wawařen nnes, ḥima Netta war cek ittwebbex, u ad tbaned-dd cek d bu-ixarriqen. 
Necc ttareɣ ac tnayen n tmesřayin, war xafi tent qeṭṭeɛ qbeř i ɣa mmteɣ. 
Siggʷej xafi min ibeḍřen d řhard ixarriqen, war d ayi ttic zzeřḍ uřa d wagřa, carreg ayi tasɣart inu i d ayi dd-ittasen zeg weɣrum, 
mařa lla, xmi ɣa jjiwneɣ, ad taɣ ad Cek nkareɣ, ad iniɣ ‘Wi iǧan SIDI?’, niɣ xenni, mařa zeřḍeɣ, ad acareɣ, u ad ggeɣ řɛib deg Yisem n AREBBI inu. 
War ceqqef deg ijj n umsexxar ɣar sidis nnes, ḥima netta war cek ineɛɛeř u xenni cek ad dayek yiři řɛib. 
Aqa din ijj n jjiř i ineɛɛřen babas, u war ittbarek yemmas, 
ijj n jjiř i yeǧan d amezdag di tiṭṭawin nnes, maca war ittwasird zi řexmej nnes, 
ijj n jjiř s řxezrat inefxen, s wabřiwen nnes igeɛɛden, 
ijj n jjiř s teɣmas am řesyuf d teɣmas n teɣmart am řemwas, ḥima ad ṣarḍen inni ittwaḥṣaren zi temmurt d imezřaḍ zeg iwdan. 
Tadda ɣares tnayen n yessis: ‘Ewc!’ ‘Ewc!’ Aqa din třata nni ɛemmarṣ ad jjiwnen. Arebɛa ɛemmarṣ ad inin: “Cfa!” 
Řaxart d řemřawet ibellɛen, tammurt i war ijjiwnen ɛemmarṣ zeg waman, uřa d tmessi war qqarent ɛemmarṣ: “Cfa!” 
Tiṭṭ i isstehzan zi babas, u tesseḥqar ṭṭaɛet i yemmas, ad tt qeřɛen ibaɣřiwen ɣar teɣzart, u imeẓyanen n ugider ad tt ccen. 
Třata-ya n tmesřayin ɛdunt ayi s řeɛjeb, arebɛa war tent ssineɣ: 
abrid n ugider deg ujenna, abrid n ufiɣar x teṣḍart, abrid n uɣarrabu deg wuř n řebḥar, u abrid n weryaz ak-d teɛzarect. 
Ammu i ittegg abrid n ict n temɣart izennan: nettat tᵉttett, tessirid aqemmum nnes, teqqar: “Necc war ggiɣ walu d řɣecc!” 
Sadu třata n tmesřayin-a tenhezz temmurt, sadu arebɛa i war tzemmar ad tarbu: 
sadu ijj n umsexxar mařa netta idweř d ajeǧid, sadu ijj n ubuhaři mařa netta ijjiwen aɣrum, 
sadu ict n temɣart tᵉttwasseḥqar mařa nettat tᵉttwassemřec, u sadu ict n tayya mařa tᵉṭṭef řwart n lallas. 
Arebɛa-ya d imeẓyanen qaɛ x temmurt, ɛad nitni d imiɣisen qaɛ: 
Tikeḍfin war ǧint d řgens ijehden, maca ɛad nitenti ssewjadent macca nsen deg unebdu. 
Ikawkawen n teṣḍart d ijj n řgens nhřa jjhed, maca nitni bennan tazeddiɣt nsen di teṣḍart. 
Tamuɣri war ɣares bu ajeǧid, waxxa amenni iffeɣ s usettef marra. 
Azermummi tzemmared ad t tᵉṭṭfed s tnayen n ifassen, ɛad aqa-t netta di řeqṣur n ijeǧiden. 
Třata-ya ṣṣurufen s řɛezz, arebɛa gguren s tecři tecneɛ: 
Ayrad, bu-teɣruḍt jar řmar, wenni war ittwexxiren zzat i ḥed, 
ijj n uɣiřas s tejɛinnatin nnes beysent, niɣ ijj n umyan, u ijj n ujeǧid nni ɣar iǧa uřaɣi n umenɣi. 
Mařa cek teggid s tubbuheřya umi tessgeɛɛded ixef nnec, niɣ txemmemed di teḥraymect: sars afus x uqemmum! 
Maɣar asendu n uɣi ittawi-dd trussi, u asendu n wenzaren ittawi-dd idammen, u asendu n uxeyyeq, ittawi-dd amcubbec. 
