﻿Awařen Iweznen.
29.
Aryaz, wenni isseqsḥen yiri nnes awarni řami t ɛaqben aṭṭas n twařawin, ad yarẓ deg ijj n umur, xenni war din iǧi ɛad ugenfu. 
Mařa dewřen imseggaden s ṣṣulṭa, xenni ifarreḥ řgens, maca mařa iḥekkem uɛeffan, iweɛɛeḍ řgens. 
Bnadem ittexsen tiɣit, issfarraḥ babas, maca wenni ittmunan ak-d temɣarin n farq-ccɣeř, yareddeǧ agřa nnes. 
Ajeǧid issbedda tammurt s řḥeqq, maca aryaz nni issgeɛɛaden ḍḍariba aṭṭas n twařawin, iheddem i-tt. 
Aryaz nni isswaṭan jjar nnes, ittbezzaɛ ict n tracca i iḍaren nnes. 
Deg uɛeddi n ijj n weryaz aɛeffan innuffar dayes ijj n řfex, maca amsegged ittesřiwřew u ifarreḥ. 
Amsegged issen ddeɛwet n imarxa, aɛeffan war ifehhem walu di tussna. 
Imestehzayyen ssekkaran aɣewweɣ di tendint, maca imiɣisen ssneqřaben aɣḍab. 
Mařa amiɣis iksi-dd tanfuč i yijj n ubuhaři, xenni netta ggur ad ixeyyeq wanita u ad iḍḥec, maca war din řhudnet. 
Iryazen umi itteɛjib idammen carrhen wenni ikemmřen, maca inni igguren nican xezzaren ɣar řeɛmar nnes. 
Abuhaři iḍeǧeq i marra buḥbeř nnes, maca amiɣis ittqemmeɛ i-t. 
Řḥakem nni itticen taynit i řhard n ixarriqqen, zzayes ad iřin marra imsexxaren nnes d iɛeffanen. 
Amezřuḍ d weryaz ittwaḥsaren řebda, msagaren, SIDI issnewwar tiṭṭawin nsen s tnayen idsen. 
Ajeǧid nni itticen s tidett tasɣart i imarxa di ccreɛ, řkursi nnes ad iqqim ibedd i řebda. 
Aɛmud d uwebbex tticen tiɣit, maca aḥenjir jjin t i yixef nnes, yarra yemmas ad tseḍḥa. 
Mařa dewřen iɛeffanen jehden, xenni yarenni uxeṭṭu, maca imseggaden ad ẓaren weṭṭu nsen. 
Arebba mmic u netta ad cek issareyyeḥ, netta ad iwc lbarakat timiẓidin i řeɛmar nnec. 
Mařa war din řewḥiy, ittfuccuḥ řgens, sseɛd n wenni iḥeṭṭan Ccariɛa. 
Ijj n ismeɣ war ittejji ad t arrebban s wawařen, maɣar waxxa netta ifehhem xak, war xak dd-ittarri ca. 
Ma cek ɛemmarṣ war teẓrid ijj n weryaz ittqeǧiq s wawařen nnes? Aqa din řayas ktar i ubuhaři uřa xas. 
Mařa ijjen issubeḍ ismeɣ nnes zi temẓi, ad idweř ɣar uneggar war t ittqidi. 
Aryaz ittarrujduden issekkara-dd amcubbec, u bab n wesɛar ittegg aṭṭas n ixeṭṭan. 
Nnfaxet n bnadem ad t isswaḍeɛ, maca amwaḍeɛ n buḥbeř ad as ittwagg ccan. 
Wenni ibeṭṭan ak-d uxewwan, icarreh ixef nnes, maɣar netta ittesřa i nneɛřet, maca war t iqqar ca. 
Tiggʷudi zeg iwdan tneddeh ɣar řfex, maca wenni ittcařan x SIDI, ad ittwassgeɛɛed di řaman. 
Aṭṭas arezzun udem n řḥakem, waxxa tasɣart n kuř ijj tᵉttas-dd zi SIDI. 
Aryaz aɣeccac d nnɛi i imseggaden, maca wenni igguren nican deg webrid nnes, aqa-t d nnɛi i uɛeffan. 
