﻿Awařen Iweznen.
27.
War ttfeyyec zeg wass n tiwecca, maɣar war tessined ca min dd ɣa yawi wass. 
Ejj ijj n ubarrani ad cek icenneɛ, war iǧi aqemmum nnec, ijj n midden, war iǧi iyencicen nnec. 
Aẓru idqeř, ijdi iwezzen, maca afugem n ubuhaři idqeř xasen s tnayen idsen. 
Asɛar d uduqqez n weɣḍab aqa aten qesḥen, maca man wen izemmaren ad iqqim ibedd ɣar tusmi? 
Teḥřa ttarbiyyet s bṭayṭay x tayri innuffaren. 
Iyezzimen n wenni cek ittexsen aqa d řeɛřamat n řaman, maca isudimen n yinni cek icarrhen aqa d aṭṭas. 
Wenni ijjiwnen, iɛejjen x tamment n teɣraṣt, maca i wenni iǧuẓen marra min yarezgen d amiẓid. 
Am ijj n wejḍiḍ iṭṭaw, iggʷed zi řɛucc nnes, ammu i iǧa weryaz nni i ɣa iṭellɛen barra x wemcan nnes. 
Zzect d řebxur ssfarraḥen uř, ammu ɛawed tamseɛɛaft icnan n ijj n umeddukkeř zi ccwar n wuř. 
War semmeḥ deg umeddukkeř nnec, uřa deg umeddukkeř n babac, war ttidef ca ɣar taddart n umac deg wass n arẓiyyet nnec. Iḥřa ijj n wajjar yudes x ijj n tewmat yiggʷej. 
Iři d amiɣis, a mmi, u sfarḥ uř inu, maḥend zemmareɣ ad dd-arreɣ x wenni d ayi ɣa isseḥqaren. 
Wenni ifettnen ittwařa řɣar uca issnuffara ixef nnes, maca iḥafiyyen arennin gguren uca ittxeṣṣa ad ttwaɛaqaben. 
Ksi arruḍ nnes, maɣar iddakkwař d aḍman i yijj n ubarrani, ksi t d ddiyyet i yict n temɣart zi barra. 
Wenni ittbarken ameddukkeř nnes zic ɣar tuffut s tmijja ijehden, aqa man aya ad as ittwaḥseb d nneɛřet. 
Amecnaw tuddimt war ittbeddin deg wass n wenẓar ijehden, ammu i teǧa temɣart ittemcubbucen. 
Wenni ittexsen ad as ibelleɛ, aqa-t am wenni ittexsen ad iqala i usemmiḍ, u afus nnes afusi ad iṭṭef zzect itteḥruǧuḍen. 
Am wenni isseqḍaɛen uzzař s wuzzař, ammu i isseqḍaɛ weryaz timegga n wenni t yudsen. 
Wenni iḥeṭṭan x ijj n wartu, ad icc řɣiǧet nnes, wenni iḥeṭṭan bab nnes, ad ittwacenneɛ. 
Am dd-ittban uɣembub deg uɣembub deg waman, ammu dd-ittban wuř n bnadem x bnadem ɛawed. 
Am řaxart d ushellek war ttyiwinen, ammu uřa d tiṭṭawin n iwdan war ttiwḍent ad jjiwnent. 
Aṭenjir n usefsi i nnuqart d ufarran i wureɣ, ammu i iǧa uřa d aryaz am mammec t ttmeddaḥen. 
Mařa teddzed abuhaři s wezduz di řmehraz jar řḥebb n imendi, tubbuheřya nnes war xas tḥeyyid. 
Ḥḍa maḥend ad tessned mammec dd-ittban wuǧi nnec, wejjeh uř nnec ɣar tḥimriwin. 
Maɣar řeksibet war tᵉttɣimi i řebda, niɣ ma ad iqqim ttaj n weɛzař zi jjiř ař jjiř nneɣni? 
Mařa iruḥ arbiɛ uca iban-dd uɣemmuy aziza, ittwaḥtec afsu x idurar, 
xenni ad iřin izmaren i warruḍ nnec, uřa d iɣayḍen i tmesɣiwt n yijj n yeyyar. 
uca ad ɣarek yiři min teḥwajed n uɣi n tɣayṭin i macca nnec, ad yiři d macca i taddart nnec, uřa d řeɛweč i temsexxarin nnec timeẓyanin. 
