﻿Awařen Iweznen.
23.
Mařa teqqimed ɣar ijj n řḥakem, maḥend ad tecced akides, ḥḍa mliḥ min iǧan zzatek. 
Egg ijj n řmus x yiři nnec, mařa cek d ijj n bu-řemɣaret n uɛeddis. 
War ttegg meẓri di macca nnes icnan, maɣar aqa-t d macca n tuxxuna. 
War ssiḥiř ixef nnec ḥima ad tdewřed d bu-wagřa, sarxu deg nneyyet nnec. 
Mařa ṭṭawent tiṭṭawin ɣares, aqa war din agřa ɛad! Maɣar ad igg afriwen i yixef nnes, ad iḍwa ɣar ujenna am yijj n ugider. 
War ttᵉtt aɣrum n wenni di teǧa tiṭṭ taɛeffant, war meẓri di macca nnes icnan. 
Maɣar am mammec t ittxarraṣ, ammu i t ittegg netta. Iqqar: “Ecc, teswed!”, maca uř nnes war akidek iǧi. 
Azeɛɛif i teccid, ad t-i-dd-tɛuqqed, awařen iṣebḥen nnec tḍeyyɛed ten. 
War siweř deg umezzuɣ n ijj n ubuhaři, maɣar netta ad isseḥqar awařen n weftan nnec. 
War smuṭṭuy aymir n wecḥař uya, war ttadef deg iyyaren n iyujiřen, 
maɣar Amefdi nsen d ameqqran, Netta ad dd-yaɣ tasɣart nsen zzayek. 
Arr uř nnec ɣar uwebbex, imezzuɣen nnec ɣar wawařen n tussna. 
War ttᵉṭṭef ttarbiyyet x uḥudri, waxxa teccated t s weɛmud, war ittmetti. 
Cek ad t tewted s weɛmud, u ad tessnejmed řeɛmar nnes zi řaxart. 
Mmi inu, mařa uř nnec d amiɣis, ad ifarḥ uřa d uř inu akides. 
Tiẓẓař inu ad negzent s řefraḥet, mařa iyencicen nnec ssiwřen min iǧan iseggden. 
Ejj uř nnec war ittisim zeg imednab, maca ejj i-t ad yarr azeǧif ɣar tiggʷudi n SIDI ass imun! 
Maɣar xenni aqa din tiwecca, u řayas nnec war ittareẓẓi. 
Seř-dd cek, a mmi, iři d amiɣis, ndeh uř nnec ɣar webrid. 
War ttɣimi ɣar iskarjiyyen, uřa ɣar inni ilehhfen deg weysum, 
maɣar askarjiy d amelhuf ad dewřen d imezřaḍ, u anudem issyiriḍ deg iḥřucen. 
Seř-dd cek ɣar babac wenni cek i dd-ijjin, u war sseḥqiri yemmac mařa tewsar. 
Seɣ-dd tidett, war tt teznuza ca, ammu uřa d tiɣit d uwebbex d řefhamet. 
Babas n umsegged ad ifarḥ s waṭṭas, wenni dd-ijjin ijj mmis d amiɣis, ad as ifarḥ. 
Ejj ad ifarḥ babac uřa d yemmac, ejj tenni cek i dd-yurwen ad tfarḥ. 
Ewc ayi uř nnec, a mmi, ejj tiṭṭawin nnec ad afent arḍa deg ibriden inu. 
Maɣar tamɣart farq-ccɣeř d ict n tesraft yuǧɣen, u tamɣart zi barra d ijj n řɛunṣar iḥsar. 
Wah, nettat tᵉttḥama am yijj n uxewwan, nettat tarenni deg iɣeddaren jar iwdan. 
Wi i ɣar iǧa wecḍan? Wi i ɣar iǧa zzeřḍ? Wi i ɣar iǧa umcubbec? Wi i ɣar iǧa ucetci? Wi i ɣar iǧan iyezzimen břa ssibbet? Wi i ɣar ǧant tiṭṭawin bbarewyent? 
Ɣar inni ittɣiman ɣar binu ař tameddit, ɣar yinni dd-yusin ḥima ad qqasen binu ixeǧḍen. 
War xezzar ɣar binu, xmi ittezwiɣ, ittřiqřiq di řkas u netta ihwen i tissit. 
Ɣar uneggar ittɣima izeɛɛef am yijj n ufiɣar, ittrucca ssem am třefsa. 
Tiṭṭawin nnec ad twařant timɣarin tibarraniyyin, u uř nnec ad issiweř s uxarweḍ. 
Cek ad tiřid am yijjen i itteṭṭṣen di řwesṭ n řebḥar, am ijjen i itteṭṭṣen di tqiccat n teḥnact n uɣarrabu 
ad tinid: “Wtin ayi, maca war yezmeɣ, dexmen ayi, maca war uciɣ ak-d walu. Meřmi i dd ɣa faqeɣ? Necc ad arzuɣ ɛawed ɣar binu!” 
