﻿Awařen Iweznen.
22.
Isem aṣebḥan iḥřa x waṭṭas n wagřa, aḥinni iḥřa x nnuqart d wureɣ. 
Bu-wagřa d umezřuḍ ttemsagaren, SIDI i-ten iggin marra. 
Bnadem ifettnen ittwařa řɣar uca ittnuffar, maca iḥafiyyen arennin gguren uca ad ttwaɛaqaben. 
Řmunet i uwaḍeɛ d tiggʷudi n SIDI, d agřa d ccan d tudart. 
Isennanen d řefxux aqa aten x webrid n wenni ifarɣen, wenni iḥeṭṭan řeɛmar nnes, ittɣima ɣar řaggʷaj nsen. 
Darreb aḥudri ɛlaḥsab řeqyas n webrid nnes, waxxa netta iwsar, war xas ittḥeyyid ca. 
Bu-wagřa ittṣeǧaḍ x imezřaḍ, bu-umarwas d ismeɣ n wenni d as yareṭṭřen. 
Wenni izarrɛen řɣecc, ad imjar řeɣben, aɛmud n uduqqez nnes n ufugem ad ifna. 
Wenni ɣar iǧa řxezrat ṣebḥent, ad ittwabarek, minzi netta ittic i imezřaḍ zeg weɣrum nnes. 
Aẓẓeř x umestehziy, ad iffeɣ řhemm, aqa ibedd umḥarwaḍ d řefḍiḥet. 
Wenni ittexsen řeṣfayet n wuř, wenni ɣar iǧa iyencicen iccuren s arḍa, ajeǧid ad yiři d ameddukkeř nnes. 
Tiṭṭawin n SIDI ḥeṭṭant x tussna, maca awařen n uɣeddar ad ten ibḍeř. 
Ameɛguz iqqar: “Aqa din ijj n wayrad di barra! Ad taɣ balak ad ttwanɣeɣ di řwesṭ n wazzayen!” 
Aqemmum n temɣarin tibarraniyyin d ict n tesraft yuǧɣen, wenni x iffugem SIDI, ad dayes iwḍa. 
Tubbuheřya tᵉttɣima třesseq deg wuř n uḥudri, aɛmud n uwebbex ad tt issuffeɣ zzayes. 
Wenni iḥeṣṣaren amarxu, ad yarni di řemɣaret nnes, wenni itticen i bu-wagřa, ad iḥwaj waha. 
Ewc amezzuɣ nnec, uca seř ɣar wawařen n imiɣisen, arr uř nnec ɣar tussna inu. 
Maɣar aqa mliḥ mařa txemmřed ten di daxeř nnec, mařa ad ten tesswejded jmiɛ x iyencicen nnec. 
Maḥend ad yiři utecři nnec x SIDI, ad ac ten ssecneɣ řexxu, wah i cek. 
Ma zeɛma war d ac uriɣ awařen ifarzen aṭṭas, ccuren s ccwar d tussna, 
ḥima ad ac ssecneɣ řemten n wawařen n tidett, maḥend tzemmared ad dd-tarred s řaman x wenni cek dd-issekken. 
War ttkeccaḍ amarxu maɣar netta d amarxu, war řebbez řmeskin ɣar tewwart, 
maɣar SIDI ad asen yaɣ tasɣart nsen, Netta ad ikecceḍ řeɛmar n yinni i-ten ittkeccaḍen. 
War ttemddukkuř ak-d aryaz ittarrujduden, war ttidef ɣar bab n wesɛar, 
maḥend cek war tᵉttnimid ca ak-d imesraq nnes, ad tegged řfex i řeɛmar nnec. 
War ttadef jar inni itticen awař s tmewciwt n ifassen, jar inni iǧan d aḍman i imarwusa. 
Mařa war ɣarek min zi ɣa txeǧṣed, mayemmi ijebbed qama nnec zi sadu nnec? 
War smuṭṭuy aymir n wecḥař uya, wenni ggin řejdud nnec. 
Ma teẓrid ijj n weryaz imeḥḍen di řḥirfa nnes? Ad t ssbedden zzat i wudem n ijeǧiden, war iǧi ad ibedd zzat i wudem n midden war di iǧi řaman. 
