﻿Awařen Iweznen.
14.
Tiɣit n temɣarin tbenna taddart nnes, maca tubbuheřya theddem i-tt s ifassen nnes. 
Wenni igguren di řeṣfayet nnes, itteggʷed SIDI, maca wenni itteffɣen zeg ibriden nnes, isseḥqara i-t. 
Deg uqemmum n ubuhaři aqa din řmecɛeḍ i nnfaxet nnes, maca iyencicen n imiɣisen ḥeṭṭan ten. 
Mani war ǧin ifunasen, ittɣima řmedwed ixwa maca s jjehd n ufunas aqa din ṣṣabet temɣar. 
Acehhad d tidett war issxarriq ca, maca acehhad issxarriqen ittsuḍ ixarriqen. 
I umestehziy war din tiɣit xmi tt yarezzu, maca i ufehham ihwen xas, maḥend ad yaf tussna. 
Aggʷej x weryaz abuhaři, maɣar cek war ɣares tᵉttifed ca iyencicen i issawařen tussna. 
Tiɣit n wenni ifettnen aqa-tt d řefhamet n webrid n yixef nnes, maca tubbuheřya n ibuhařiyyen d acmat. 
Ibuhařiyyen stehzan s weɛdař n umarwas, maca jar inni igguren nican ittwaf řxaḍar. 
Uř issen tarzugi nnes, řbarrani war izemmar ad yaca s řefraḥet nnes. 
Taddart n iɛeffanen ad tᵉttwareddeǧ, maca taqiḍunt n inni igguren nican ad tᵉnnewwar. 
Ad taɣ ittɣiř as i ca n yijjen aqa abrid nican, maca aneggar nnes mɣir ibriden ittawyen ɣar řmewt. 
Waxxa ɣar weḍḥac uř ittegg řeḥriq, wah, aneggaru n řefraḥet tᵉttakkwaḍ-dd acḍan. 
Wenni ɣar iǧa wuř iffɣen zeg webrid, ad ittwassjiwen s ibriden nnes, u aryaz aṣebḥan s yixef nnes. 
Wenni iǧan d aḥafi, ittamen di kuř awař, maca wenni ifettnen iḥeṭṭa aṣurif nnes. 
Amiɣis itteggʷed u ittḥeyyad x řɣar, maca abuhaři iseɛɛar, umi ittɣiř as aqa-t di řaman. 
Wenni ittxeyyaqen deɣya, ad igg tubbuheřya, u aryaz inekkwan taḥraymect, ad ittwacarh. 
Iḥafiyyen ad warten tubbuheřya, maca inni ifettnen, ad asen qqnen s ijj n ttaj n tussna. 
Iɣeccacen ad aḍaren zzat i wudem n iṣebḥanen, iɛeffanen ad aḍaren zzat i tewwura n imseggaden. 
Amezřuḍ icarreh i-t ɛad umeddukkeř nnes, maca aṭṭas d inni ittexsen ayt n bu-wagřa. 
Wenni isseḥqaran jjar nnes, ittegg ddnub, maca sseɛd n wenni ittḥinnan x inni ittwaḥṣaren. 
Inni dd-ixeǧqen řɣar, ma war ttweddarin nitni? Tamexsiwt icewwaren d řaman aqa ɣar yinni ittxarraṣen di min iṣebḥen. 
Di marra řweḥřan n warber dayes řefḍeř, maca řhard n iyencicen ineddeh ɣar weḥwaj waha. 
Ttaj n imiɣisen d agřa nsen, tubbuheřya n ibuhařiyyen d tubbuheřya waha. 
Acehhad amtiqqi issenjam řeɛmur, maca wenni yarexxun i ixarriqen, icemmet. 
Di tiggʷudi n SIDI dayes ttiqet ijehden, Netta ad yiři d amcan n tarewřa i iḥenjiren nnes. 
Tiggʷudi n SIDI d řɛunṣar n tudart, i usenjem zeg iceddiyen n řmewt. 
Deg waṭṭas n řgens ixemmeř ucewwar n ujeǧid, maca di tikkest n cceɛb ixemmeř uhellek n řḥakem. 
Wenni ɣar iǧa ttasiɛ n řxaḍar, ɣares řefhamet temɣar, maca wenni di iǧa buḥbeř iḥṣaren issekkar tubbuheřya. 
Uř iṣṣeḥ, aqa d tudart i arrimet, maca tusmi d areṣṣuḍ n yeɣsan. 
Wenni iḥeṣṣaren ameḥdaj, isseḥqara wenni t i-dd-ixeřqen, maca wenni ittḥinnan x umezřuḍ, ittcenneɛ i-t. 
Aɛeffan ittaẓẓeř x yixef nnes s řɣar nnes i ittegg, maca amsegged ɣares mani i ɣa yarweř ɛad di řmewt nnes. 
Tiɣit tarsa deg wuř n ifehhamen, maca min iǧan daxeř deg ibuhariyyen ad ittwassnen. 
Tasegda tessɛuǧa řgens, maca řefḍiḥet n ccuɛub d ddnub. 
Řxaḍar n ujeǧid yarsa x umsexxar ifehhmen maca wenni ifeṭṭḥen iřeqqef i-t uduqqez nnes n ufugem. 
