﻿Awařen Iweznen.
12.
Wenni ittexsen ttarbiyyet, ittexs tussna, maca wenni icarrhen awebbex aqa netta d aqeffuḥ. 
Bnadem d aṣebḥan ittaf arḍa n SIDI, maca aryaz inekkwan taḥraymect ad t ibarreḥ d bu-umarwas. 
Bnadem war izemmar ad iqqim ibedd umi ittegg řɣar, maca aẓwar n imseggaden war izemmar ad inhezz. 
Tamɣart imeḥḍen d ttaj n weryaz nnes, maca tenni t yarrin ittseḍḥa, d tenni am wareṣṣuḍ deg iɣsan nnes. 
Ixemmimen n imseggaden d řḥeqq, ixarriṣen n iɛeffanen d řɣecc marra. 
Awařen n iɛeffanen řebten deg idammen, maca aqemmum n yinni igguren nican ad ten issenjem. 
Iɛeffanen ttneqřaben u war ǧin ɛad, maca taddart n imseggaden ad teqqim tbedd. 
Ittwassemɣar bnadem ɛlaḥsab řqedd n řeɛqeř nnes, maca wenni di iǧa wuř ifarɣen, ad ittwasseḥqar. 
Iḥřa wenni war iḥessben x ixef nnes aṭṭas, maca ɣares ijj n umsexxar, x wenni ittcennɛen s ixef nnes, maca aɣrum war ɣares yeǧi. 
Amsegged issen řeɛmar n řebhimet nnes, maca arreḥmat n uɛeffan qesḥent. 
Wenni icarrzen tammurt nnes, ad ijjawen s weɣrum, maca wenni yareddfen min iǧan ixwan, war ɣares ca wuř imten. 
Aɛeffan ittexs min iǧan di tracca n yinni itteggen řɣar, maca aẓwar n imseggaden ittɣima ittic. 
Deg uxeṭṭu n iyencicen dayes ijj n řfex d aɛeffan, maca amsegged ad injem zi řeḥṣaret. 
Zi řɣiǧet n uqemmum nnes ittwassjiwen bnadem s řxir, min dd-ttawyen ifassen n bnadem ad ɣares dd-idweř. 
Abrid n ubuhaři nican di tiṭṭawin nnes, maca wenni ittesřan i ccwar, aqa netta d amiɣis. 
Abuhaři isscana řhemm nnes deg wass d ijj, maca wenni ifettnen, ittdařa řeḥya nnes. 
Wenni dd-ineṭṭqen tidett, isscana tasegda, maca acehhad issxarriqen isscana acmat. 
Aqa din wenni ittharwaḍen am tejjut n ssif, maca iřes n imiɣisen ittawi-dd agenfu. 
Iyencicen iccuren s tidett ad ttwaḍmen i řebda, maca iřes issxarriqen mɣir i yijj n umur waha. 
Acmat aqa-t deg wuř n yinni inekkwan tuɛeffna, maca i yinni inessḥen řehna, aqa din řefraḥet. 
Amsegged war t iřeqqef řɣecc, maca iɛeffanen ad ttwaccuren s řɣar. 
Iyencicen isxarriqen d nnɛi i SIDI, maca inni ittemṣurrufen s řaman yarḍan as. 
Bnadem ifetnen issdurruy tussna nnes, maca uř n ibuhařiyyen isɣuyyu s tubbuheřya di řexřa. 
Afus n wenni imeḥḍen ad iḥkem, maca řeɛgez ineddeh ɣar tesmuɣi. 
Amnus deg wuř n bnadem isshekkwa i-t, maca awař iṣebḥen issfarraḥ i-t. 
Amseggad isscana abrid i jjar nnes, maca abrid n uɛeffan yarra i-ten ad weddaren. 
Ameɛguz war iḍeffar ca aneymar nnes. maca agřa iɣřan n iwdan aqa d amḥaḍ. 
Deg umesruq n tsegda teǧa tudart, abrid n řatar nnes war dayes bu řmewt. 
