﻿Awařen Iweznen.
5.
Mmi inu, ewc taynit i tiɣit inu, ewc amezzuɣ i řefhamet inu, 
maḥend ad tewced ḥaḍur, u iyencicen nnec ad ḥḍan x tussna. 
Minzi iyencicen n temɣart tabarranit ttudumen s tamment n teɣraṣt, aneɣ nnes d ařeqqaɣ x zzect, 
maca ɣar uneggar aqa-tt d tamerzagt am cciḥ, teqḍeɛ am yijj n ssif s tnayen n wudmawen. 
Iḍaren nnes ttawyen ɣar řmewt, iṣuraf nnes neddhen ɣar řaxart. 
Ařami war tᵉṭṭifed ɛemmarṣ abrid n tudart, ggurent řatarat n iḍaren nnes ssa d ssa břa ma tessned cek. 
Xenni řexxu, a iḥenjiren, sřem-dd ɣari, war tḥeyyadem ca x wawařen n uqemmum inu. 
Siggʷej abrid nnec xas, war ttades tawwart n taddart nnes, 
ḥima war tᵉtticed ccan nnec i inneɣni, iseggʷusa nnec i wenni itteqsiḥen aṭṭas, 
ḥima ibarraniyyen war ttjawanen deg wagřa nnec, u marra řɣiǧet n umarret nnec war dd-tᵉttis di taddart n wenni war ittwissnen, 
u ad tzehhared ɣar uneggar, xmi ɣa tᵉttwacc arrimet nnec d weysum nnec, 
ad tinid: “Mammec ggiɣ necc carheɣ ttarbiyyet, mammec inḍar uř inu awebbex? 
Mammec war sřiɣ ɣar tmijja n yinni d ayi idarrben, war wciɣ amezzuɣ inu i imseřmaden inu? 
Ɛřaḥař tuɣa ufiɣ ixef inu di ɛřam kuř řɣar, di řwesṭ n wegraw n řgens u n tmesmunt!” 
Suw aman zeg wanu nnec, uřa d aman issizzřen zi řaǧaɣ n řɛunṣar nnec. 
Iři ad ssefyen waman n řɛunṣar nnec barra, am tɣezratin n waman x ibriden. 
Ejj i-ten ad iřin i cek weḥḥdek, war iǧi i ibarraniyyen i din zzatek. 
Ad ittwabarek řɛunṣar nnec, farḥ i temɣart zeg wussan n temẓi nnec. 
Tudadt iɛizzen uřa d tiɣeydet n wezɣar icewwaren nettat! Ejj ibbac nnes ad cek ssyiwyen di marra ussan, sellem ixef nnec řebda ɣar tayri nnes! 
Mayemmi, a mmi, ad cek teɣwa temɣart tabarranect, ad tdarrɛed i weḥsin n temɣart war tessined? 
Maɣar ibriden n bnadem aqa aten din zzat i tiṭṭawin n SIDI, Netta yarzu di marra imesraq nnes. 
Řmuɛsiyyet n yixef nnes ad tḥebbes aɛeffan, s iseɣwan n ddnub nnes ad ittwacedd. 
Netta ad immet umi war din tuɣi ttarbiyyet, ad iweddar s tubbuheřya nnes tameqqrant. 
