﻿Awařen Iweznen.
3.
Mmi inu, war ttᵉttu taɣuri inu n Ccariɛa, ejj uř nnec ad iḥḍa tiweṣṣa inu, 
maɣar nitenti ad ac dd-iwyent aṭṭas n wussan, uřa d iseggʷusa n tudart d řehna. 
Tamexsiwt icewwaren d řaman war ten tejjid ad zzayek ffɣen, qqen i-ten ɣar yiri nnec, ari ten x teřwiḥt n wuř nnec, 
xenni ad tafed arḍa d řefhamet iṣebḥen di tiṭṭawin n AREBBI u n bnadem. 
Tiqq di SIDI s wuř nnec kuřci, war ttcařa x řefhamet n yixef nnec. 
Ssen i-t di marra ibriden nnec, xenni Netta ad iseggem imesraq nnec. 
War ttegg ixef nnec d amiɣis. Ggʷed SIDI u beɛɛed x min iǧan d aɛeffan. 
Aya ad yiři d agenfu i iẓewran n tudart nnec, d wenɛac i iɣsan nnec. 
Weqqar SIDI s wagřa nnec, s tmezwarut n marra ṣṣabet nnec. 
Xenni ad ttwaccuren řehrit nnec s ufeyyeḍ, u tisirin nnec n uḍiř ad dduqqzen s binu n jdid. 
Mmi inu, war neṭṭar ttarbiyyet n SIDI, war ttarra aɛrur x uwebbex nnes, 
maɣar wenni issɛizza SIDI, ad t iɛaqeb ɛawed, am ittegg babas ak-d mmis wenni x yarḍa. 
Sseɛd n bnadem nni ittafen tiɣit, uřa d bnadem nni ittkessaben řefhamet, 
maɣar min tᵉttawi nettat, teḥřa x tsebbabt di nnuqart, u řɣiǧet nnes teḥřa x wureɣ ittissiqen. 
Nettat tiɣřa x řmarjan, u marra min di tzemmared ad temmeẓred, war izemmar akides ittemqudda. 
Tuzzeggart n wussan ɣares deg ufus nnes, agřa d ccan aqa aten x uzeřmaḍ nnes. 
Ibriden nnes d ibriden n řeḍrafet, u marra imesraq nnes aqa aten d řehna. 
Nettat d tacejjart n tudart i yinni ɣares iřesqen, kuř ijjen wenni dayes itteṭṭfen, ad yiři d amesɛud. 
SIDI igga dsas n temmurt s tiɣit nnes, s řefhamet nnes igga ijenwan. 
Zi tussna nnes dduqqzen-dd waman ihewřen, ttnecnicen-dd iseynuten nnda. 
Mmi inu, war tent tejjid ad ffɣent zi tiṭṭawin nnec, ḥḍa aftan d uḥaḍur, 
maɣar ad iřin d tudart i řeɛmar nnec uřa d arḍa i yiri nnec. 
Xenni ad tuyured abrid nnec di řaman, war tᵉttneqriḍed deg uḍar nnec. 
Mařa truḥed ad tezzřed, war tennxeřɛid, u xmi i ɣa tezzřed, ad yiẓid yiḍeṣ nnec. 
War tteggʷed zeg unexřiɛ n deɣya uřa zeg wareyyeb s ufus n iɛeffanen xmi dd ɣa yas. 
Maɣar SIDI ad ac yiři d asenned nnec, Netta ad iḥḍa afus nnec zi tsarrift. 
War qeṭṭeɛ řxar x bab nnes, mařa aqa-t deg ufus nnec maḥend ad tegged řxar. 
War qqar i jjar nnec: ‘Ruḥ uca ɛqeb-dd, tiwecca ad ac tt wceɣ!’, mařa tamesřact aqa-tt akidek. 
War nekkwi řɣar ak-d jjar nnec, umi akidek izeddeɣ di řaman. 
War temcubbuc ak-d ijj n bnadem břa ssibbet, mařa netta war d ac iggi řɣar. 
War ttasem zeg ijj n bu-řexcunet, ḥḍa maḥend war tᵉttixḍared uřa d ijj zi marra ibriden nnes. 
maɣar wenni itteffɣen zeg webrid, aqa-t d nnɛi i SIDI, maca Netta ittegg řaman nnes deg inni igguren nican. 
Nneɛřet n SIDI aqa-tt x taddart n uɛeffan, maca tazeddiɣt n imseggaden ad tt ibarek. 
Mařa d imestehzayen, ad zzaysen isstehza Netta, maca mařa d inni ittwaḥṣaren, ad asen iscen arḍa nnes. 
Imiɣisen ad warten ccan, maca ibuhařiyyen ad ssarbun řefḍiḥet x yixef nsen. 
