﻿Izehhiden.
148.
Hallilu-Yah! Ṣebbḥem i SIDI zeg ijenwan, ṣebbḥem t di řuɛřa. 
Ṣebbḥem t, marra lmalakat nnes! Ṣebbḥem t, marra řɛeskarat nnes! 
Ṣebbḥent t, tafuct d tziri! Ṣebbḥem t, marra itran yareqqen! 
Ṣebbḥet, ajenna x ijenwan, uřa d aman nni iǧan tiwa i ujenna. 
Ejj i-ten ad ṣebbḥen Isem n SIDI, maɣar Netta yumur u ammu ttwaxeřqen-dd. 
Netta idekken i-ten din i řebda, iwca asen ict n tewṣeyyet i war zemmaren ad tt ɛeddan ɛemmarṣ. 
Ṣebbḥem i SIDI, zi temmurt, kenniw řhaycat n řebḥar d marra aman ihewřen, 
timessi d tebrurri d wedfeř d ddexxan, asemmiḍ n tḥaryaḍt nni itteggen awař nnes, 
idurar d marra tiwriririn, ticejjura n fruta d marra ticejjura n tengelt, 
řewḥuc n řexřa d marra řmar, imuddaren ittbuɛen d ijḍaḍ s wafriwen nsen, 
kenniw ijeǧiden n temmurt d marra ccuɛub, kenniw řḥukkam d marra řquḍat x temmurt, 
ibřiɣen uřa d tiɛzariyyin, iwessura jmiɛ ak-d imeẓyanen! 
Ejj i-ten ad ṣebbḥen Isem n SIDI, maɣar Isem nnes waha yuɛřan qaɛ, tissiqt nnes tařeqq x temmurt d ijenwan. 
Netta issgeɛɛed icc n řgens nnes, aṣebbeḥ n marra imtiqqan nnes, n ayt n Israil, n řgens i dd as yudsen. Hallilu-Yah! 
