﻿Izehhiden.
123.
Izři n ugeɛɛed. Necc ssgeɛɛdeɣ tiṭṭawin inu ɣarek, Cek i iqqimen x řkursi nnes deg ujenna. 
Xzar, am tiṭṭawin n isemɣan ɣar ufus n bab nsen, am tiṭṭawin n tayya ɣar ufus n lallas, ammu i xezzarent tiṭṭawin nneɣ ɣar SIDI, AREBBI nneɣ, ař xaneɣ i ɣa iḥinn. 
Ḥinn xaneɣ, a SIDI, ḥinn xaneɣ, maɣar yuza ɣarneɣ useḥqar. 
Řeɛmar nneɣ yuza ɣares aṭṭas zeg ustehzi n ayt n bu-nnfaxet, uřa zeg useḥqar n iɣebbanen. 
