﻿Izehhiden.
119.
Alif. Sseɛd nsen i yinni ikemmřen abrid n tudart nsen břa řɛib, inni igguren x webrid n Ccariɛa n SIDI. 
Sseɛd nsen i yinni iḥeṭṭan cchadat nnes, inni xas yarezzun s marra uř nsen. 
Nitni war tteggen řɣecc, maca gguren deg ibriden nnes. 
A SIDI, cek tumared maḥend bnadem ad iḥḍa tiweṣṣa nnec nican. 
Mři qaɛ ibriden inu ttwaseggden, maḥend ad ḥḍiɣ tiweṣṣa nnec, 
xenni ɛemmarṣ ad seḍḥiɣ mařa xezzareɣ ɣar marra tiweṣṣa nnec. 
S wuř iqqur ad Cek qadiɣ, mařa necc řemdeɣ řeḥkamat nnec iseggden. 
Ad ḥḍiɣ tiweṣṣa nnec! War dayi semmeḥ marra! 
Bit. Mammec i ɣa issizdeg ijj n uḥudri abrid nnes? S wemnaɛ nnes deg wawař nnec. 
Necc arezzuɣ xak s wuř inu marra, war d ayi ttejji ad ffɣeɣ x řumurat nnec. 
Min teqqared Cek, xemmřeɣ t deg wuř inu, maḥend war kidek xeṭṭiɣ. 
Tᵉttwabarked Cek, a SIDI, seřmed ayi tiweṣṣa nnec. 
S iyencicen inu barrḥeɣ marra lfarayiḍ n uqemmum nnec. 
Aqa farḥeɣ s webrid n cchadat nnec, am s marra min iǧan iɣřa. 
Ad xarrṣeɣ di řumurat nnec, ad xezzareɣ ɣar imesraq nnec. 
Necc ttarreɣ meẓři di tiweṣṣa nnec, awař nnec war t ttᵉttuɣ. 
Gimel. Egg tcuni i umsexxar nnec, maḥend ad ddareɣ u ad ḥḍiɣ awař nnec. 
Arzem ayi tiṭṭawin inu, ḥima ad ẓareɣ lmuɛjizat n Ccariɛa nnec. 
Necc aqa ayi d abarrani x temmurt, war xafi teffar řumurat nnec. 
Řeɛmar inu ittwafna s uweḥḥec ɣar lfarayiḍ nnec, řebda. 
Cek tɛaqbed imɛeffaren ittwaneɛřen, inni itteffɣen x řumurat nnec. 
Ksi xafi řefḍiḥet d useḥqar, maɣar ḥḍiɣ cchadat nnec. 
Uřa d řḥukkam qqimen, ssawařen ak-d wayawya xafi, maca amsexxar nnec ittxarreṣ di tweṣṣa nnec. 
Cchadat nnec d meẓri inu, aqa atent d imcawaren inu. 
Dalit. Řeɛmar inu iřṣeq ɣar tɛejjajt, arr-dd dayi tudart ɛlaḥsab awař nnec. 
Necc neɛmeɣ i Cek x ibriden inu u Cek testajbed ayi. Seřmed ayi tiweṣṣa nnec. 
Arr ayi ad fehmeɣ abrid n řumurat nnec, ad xarrṣeɣ di lmuɛjizat nnec. 
Řeɛmar inu ifsi s wecḍan, seggem ayi ɣar webrid n wawař nnec. 
Siggʷej ayi x webrid n ixarriqen, ḥinn xafi s Ccariɛa nnec. 
Necc ixḍareɣ abrid n tidett, ssarseɣ lfarayiḍ nnec zzati. 
Necc cebbareɣ di cchadat nnec, a SIDI, war d ayi ttejji ad seḍḥiɣ. 
Necc ad azzřeɣ abrid n řumurat nnec, maɣar Cek teggid ttasiɛ i wuř inu. 
Hi. A SIDI! seřmed ayi abrid n tweṣṣa nnec, xenni necc ad dayes ṭṭfeɣ ař aneggar. 
Ewc ayi řefhamet, xenni ad ḥḍiɣ Ccariɛa nnec u ad dayes ṭṭfeɣ s wuř inu marra. 
Ndeh ayi x webrid n řumurat nnec, minzi farrḥeɣ zzayes. 
Arr uř inu ɣar cchadat nnec, war iǧi ɣar ṭṭmeɛ n arbeḥ. 
Sheyyeḍ tiṭṭawin inu x řbaṭeř, arr-dd dayi tudart s ibriden nnec. 
Ḍmen min tennid i umsexxar nnec, wenni Cek itteggʷden. 
Sḥeyyed xafi řefḍiḥet i zi tteggʷedeɣ, maɣar lfarayiḍ nnec cnant. 
Xzar, ttweḥḥceɣ řumurat nnec, arr ayi ddareɣ s tsegda nnec. 
Waw. Ejj ad ɣari dd-tas tmexsiwt nnec icewwaren, a SIDI, asenjem nnec aqa-t am mammec i tennid Cek. 
ḥima zemmareɣ ad arreɣ x wenni zzayi issbehdařen, maɣar ttecřeɣ x wawař nnec. 
War ttekkes awař n tidett qaɛ zeg uqemmum inu, maɣar ttrajiɣ lfarayiḍ nnec. 
Necc ad ḥḍiɣ Ccariɛa nnec břa qeṭṭu, i řebda qaɛ. 
Necc ggureɣ di ttasiɛ, maɣar arzuɣ x řumurat nnec. 
Ad ssiwřeɣ x cchadat nnec zzat i ijeǧiden, war zzatsen ttseḍḥiɣ ca. 
Ad arreɣ meẓri di řumurat nnec, tinni i ttexseɣ. 
Ad sgeɛɛdeɣ ifassen inu qibař i řumurat nnec, tinni i ttexseɣ, ad xarrṣeɣ di tweṣṣa nnec. 
Zayin. Ɛqeř x wawař i tennid i umsexxar nnec, min xef tuyřed asitem inu. 
D wa d afewwej inu di řeɣben inu, maɣar lwaɛd nnec yarra-dd dayi tudart. 
Imɛeffaren stehzan zzayi ař ṭṭarf, maca necc war ḥeyyideɣ ca x Ccariɛa nnec. 
Necc xarrṣeɣ di lfarayiḍ nnec n řebda, a SIDI, xenni aqa ttwafewwjeɣ. 
Tafqeḥt tᵉṭṭef ayi di ssibbet n iɛeffanen, inni isemmḥen di Ccariɛa nnec. 
Tiweṣṣa nnec tuɣa atent d izřan inu di taddart n tbarranect inu. 
Di ǧiřet tuɣa ttxarrṣeɣ deg Yisem nnec, a SIDI, u ḥḍiɣ Ccariɛa nnec. 
Ammu i d ayi imsar, maɣar ḥḍiɣ řumurat nnec. 
Xit. SIDI d tasɣart inu, necc nniɣ ad ḥḍiɣ awařen nnec. 
Ḥeccmeɣ zzat i wudem nnec s marra wuř inu, ḥinn xafi am mammec i d ayi tennid. 
Necc xarrṣeɣ deg ibriden inu, ad ssɛeqbeɣ iṣuraf n iḍaren inu ɣar cchadat nnec. 
Necc qeǧqeɣ, war ɛeṭṭařeɣ ca, ḥima ad ḥḍiɣ řumurat nnec. 
Iseɣwan n iɛeffanen carrfen ayi, maca war ttᵉttuɣ Ccariɛa nnec. 
Ɣar wezyen n ǧiřet ttnekkareɣ, ḥima ad Cek qadiɣ x lfarayiḍ nnec iseggden. 
Necc d aɛcir n marra inni Cek itteggʷeden, n yinni iḥeṭṭan řumurat nnec. 
Zi tmexsiwt nnec icewwaren teccur temmurt marra, a SIDI, seřmed ayi tiweṣṣa nnec. 
Tit. Cek teggid s tcuni i umsexxar nnec, a SIDI, ɛlaḥsab awař nnec. 
Seřmed ayi maḥend ad meyyzeɣ u ad ssneɣ mliḥ, minzi ttecřeɣ x řumurat nnec. 
Qbeř ma ttwaḥṣareɣ, weddareɣ, maca řexxu ḥeṭṭiɣ min teqqared Cek. 
Cek d aṣebḥan, tᵉttegged min iṣebḥen, seřmed ayi tiweṣṣa nnec. 
Imɛeffaren arexxun-dd xafi ixarriqen, maca necc ḥeṭṭiɣ řumurat nnec s marra uř inu. 
Uř nsen war ittacan am tadunt, maca necc, aqa Ccariɛa nnec ttafeɣ dayes meẓri. 
Tuɣa i necc mliḥ umi ttwaḥṣareɣ, maɣar ammu i řemdeɣ tiweṣṣa nnec. 
Ccariɛa zeg uqemmum nnec ɣari iḥřa aṭṭas x wařaf n uqiyyat n wureɣ niɣ n nnuqart. 
Yud. Ifassen nnec ggin ayi, kewwnen ayi. Ewc ayi řeɛqeř, maḥend ad řemdeɣ řumurat nnec. 
Inni Cek itteggʷeden ad ayi ẓaren uca ad farḥen, maɣar ttrajiɣ awař nnec. 
Necc ssneɣ, a SIDI, aqa seggdent řeḥkamat nnec, u aqa Cek teḥṣared ayi s řaman. 
Ejj ad tiři tmexsiwt nnec icewwaren d afewwej i necc, am mammec i tennid i umsexxar nnec. 
Ad xafi dd-tas arreḥmet nnec, maḥend ad ddareɣ, maɣar Ccariɛa nnec dayes meẓri inu. 
Ejj ad seḍḥan imɛeffaren, maɣar s ixarriqen ssfarrɣen ayi ṣṣifet inu, maca necc txemmameɣ di řumurat nnec. 
Ejj ad ɣari dd-dewřen inni Cek itteggʷeden, inni issnen cchadat nnec. 
Ejj ad yiři uř inu imun ɣar tweṣṣa nnec, ḥima war ttseḍḥiɣ ca. 
Kaf. Řeɛmar inu isxef zi meẓri ɣar usenjem nnec, aqa ttrajiɣ awař nnec. 
Tiṭṭawin inu deqqřent zi meẓri ɣar min teqqared Cek, umi nniɣ: ‘Meřmi i xafi i ɣa tessfewwjed?’ 
Maɣar dewřeɣ am yict n txancet n yiřem tuyeř di ddexxan, maca tiweṣṣa nnec war tent ttuɣ. 
Mecḥař n wussan ɛad i iqqimen i umsexxar nnec? Meřmi i ɣa tcarrɛed inni d ayi iḍeffaren? 
Imɛeffaren ɣzan ayi iḥufar, min war dd-yusin ak-d Ccariɛa nnec. 
Marra řumurat nnec d tidett. Nitni ttdarracen ayi s ixarriqen, ewc ayi afus! 
Ɛřaḥař iři aqa teḥḥan ayi zi temmurt, maca necc war ḥeyydeɣ x řumurat nnec. 
Arr-dd dayi tudart ɛlaḥsab tamexsiwt nnec icewwaren, xenni ad ḥḍiɣ cchadet i dd-iffɣen zeg uqemmum nnec. 
Lamid. A SIDI, awař nnec ittɣima i řebda imten deg ujenna. 
Tamexsiwt nnec icewwaren tiweḍ zi jjiř ař jjiř. Cek teggid tammurt ad tbedd temten u ammu i ɣa teqqim tbedd. 
Ɛlaḥsab lfarayiḍ nnec ad qqimen bedden, maɣar marra nitni d imsexxaren nnec. 
Meɛlik war teǧi Ccariɛa nnec d meẓri inu, iři ttwahellkeɣ di řeḥṣaret inu. 
Ɛemmarṣ ad ttuɣ řumurat nnec i řebda, maɣar zzaysent tarrid ayi-dd tudart. 
Necc aqa ayi i Cek, senjem ayi, minzi arzuɣ x řumurat nnec. 
Iɛeffanen rajan ayi ḥima ad ayi teḥḥan, maca necc xezzareɣ ɣar cchadat nnec. 
Necc ẓriɣ aqa marra min teǧa řekmaret ɣares aneggar, maca řumur nnec ɣares ttasiɛ aṭṭas. 
Mim. Mammec i xafi tɛizz Ccariɛa nnec, ass ikmeř ttxarrṣeɣ dayes. 
S řumurat nnec tarrid ayi d amiɣis x řɛedyan inu, maɣar aqa aten ɣari i řebda. 
Necc ɣari řeɛqeř ktar x marra imseřmaden inu, maɣar ttxarrṣeɣ deg ibriden nnec. 
Necc ɣari řefhamet ktar x iwessura, maɣar ḥḍiɣ řumurat nnec. 
Menɛeɣ iḍaren inu zi qaɛ ibriden iɛeffanen, ḥima ad ḥḍiɣ awař nnec. 
Necc war ḥeyydeɣ ca x lfarayiḍ nnec, maɣar Cek d wenni d ayi issɣaren. 
Mammec i ɣa yiři d miẓid min teqqared Cek i waneɣ inu, x tamment i uqemmum inu! 
Zi řumurat nnec ttarriɣ-dd řeɛqeř, x uya carrheɣ kuř amesruq n ixarriqen. 
Nun. Awař nnec d řefnar i uḍar inu d tafawt i umesruq inu. 
Necc jjuǧeɣ u ad t ggeɣ, aqa ad ḥḍiɣ marra lfarayiḍ nnec iseggden. 
Necc ttwaḥṣareɣ aṭṭas, a SIDI, arr-dd dayi tudart ɛlaḥsab awař nnec. 
Ttzawgeɣ, ksi s arḍa tiwhibin n řxaḍar zeg uqemmum inu, a SIDI, u seřmed ayi lfarayiḍ nnec. 
Tudart inu aqa-t řebda di lxaṭer, maca ɛemmarṣ ad ttuɣ Ccariɛa nnec. 
Iɛeffanen ggin ayi ijj n řfex, maca necc war ffɣeɣ ca x řumurat nnec. 
Cchadat nnec d tasɣart inu i řebda, maɣar nitenti ssfarrḥent uř inu. 
Ḥezzmeɣ uř inu maḥend ad ggeɣ ɛlaḥsab tiweṣṣa nnec, i řebda, ař aneggar. 
Samix. Ayt n tnayen n iɣembab carrheɣ ten, maca ttexseɣ Ccariɛa nnec. 
Cek d adurri inu d taseddart n useřqi inu, necc ttrajiɣ awař nnec. 
Beɛɛdem xafi, a iɛeffanen, ḥima ad ḥḍiɣ řumurat n AREBBI inu. 
Senned ayi ɛlaḥsab lwaɛd nnec, maḥend ad ddareɣ u war ttseḍḥiɣ di řayas inu. 
Ɛemmed ayi, xenni ad ttwassnejmeɣ, u ad arreɣ meẓri di tweṣṣa nnec řebda. 
Marra inni ittaggʷejen x tweṣṣa nnec, sseḥqareɣ ten, maɣar řɣecc nsen mɣir d ixarriqen. 
Am kuffu tmeḥḥid marra iɛeffanen zi temmurt, s uya ttexseɣ cchadat nnec. 
Zi tiggʷudi zzayek teccirruw arrimet inu, ammu i ggʷedeɣ zi řeḥkamat nnec. 
Ɛayin. Necc ggiɣ řḥeqq d tsegda, war d ayi ttsellem i řmargeḥ n yinni d ayi iḥeṣṣaren. 
Egg řɛarbun di ṭṭweɛ n umsexxar nnec, war ttejji imɛeffaren ad ayi ḥṣaren. 
Tiṭṭawin inu deqqřent zi meẓri ɣar usenjem nnec, ɣar lwaɛd n tsegda nnec. 
Egg s tmexsiwt nnec icewwaren ak-d umsexxar nnec, seřmed ayi tiweṣṣa nnec. 
Necc d amsexxar nnec, ewc ayi řeɛqeř, maḥend ad ssneɣ cchadat nnec. 
Aqa yiweḍ as-dd řḥař i SIDI, ḥima ad ibedd x iḍaren nnes, maɣar nitni arẓin Ccariɛa nnec. 
Minzi ttexseɣ tiweṣṣa nnec x wureɣ, wah aṭṭas x wureɣ ittwaṣeffan, 
x uya ḥesbeɣ marra řumurat nnec di kuř tamesřact nican, maca carheɣ kuř amesruq n ixarriqen. 
Pi. Cchadat nnec d lmuɛjizat, x uya iḥeṭṭa tent wuř inu. 
Anurzem n wawařen nnec isscan tafawt, i iḥafiyyen ittic asen řeɛqeř. 
Arzmeɣ aqemmum inu aṭṭas u ssaḥrateɣ zi meẓri ɣar řumurat nnec. 
Arr udem nnec ɣari u ḥinn xafi, am mammec dd-tekkar i yinni ittexsen Isem nnec. 
Semten iṣuraf inu am mammec i d ayi tennid, war ttejji ad xafi iḥkem řɣecc walu. 
Fekk ayi zi řeḥṣaret n iwdan, maḥend ad ḥḍiɣ řumurat nnec. 
Ejj udem nnec ad yarɣ x umsexxar nnec, seřmed ayi tiweṣṣa nnec. 
Tiɣezratin n waman hwant-i-dd zi tiṭṭawin inu, maɣar nitni war ḥeṭṭan Ccariɛa nnec. 
Tsadi. Aqa Cek d amsegged, a SIDI, uřa d lfarayiḍ nnec seggdent. 
Cek tumured tasegda n cchadat nnec, řmanet nsen d tameqqrant aṭṭas. 
Tusmi inu iqeddsen inu tecca ayi, maɣar inni d ayi iḥeṣṣaren ttun awařen nnec. 
Lwaɛd nnec iqqur aṭṭas, amsexxar nnec ittexs i-t. 
Necc d amuqřiř u ttwasseḥqareɣ, maca war ttᵉttuɣ řumurat nnec. 
Tasegda nnec d tasegda i řebda, Ccariɛa nnec d tidett. 
Ddiqet d teggʷudi řeqqfent ayi, maca řumurat nnec daysent meẓri inu. 
Tasegda n cchadat nnec i řebda i teǧa. Sefhem ayi tent, xenni ad ddareɣ. 
Quf. Řaɣiɣ s marra uř inu, arr-dd xafi, a SIDI, xenni ad ḥḍiɣ tiweṣṣa nnec. 
Necc řaɣiɣ-dd xak, fekk ayi, xenni ad ḥḍiɣ marra cchadat nnec. 
Qbeř tuffut tuɣa ttřaɣiɣ ḥima ad ayi dd-tewced afus, rajiɣ awař nnec. 
Tiṭṭawin inu faqent qbeř řweqt n wuḍuf n wecbar, ḥima ad xarrṣeɣ deg wawařen nnes. 
Seř-dd ɣar tmijja inu ɛlaḥsab tamexsiwt nnec icewwaren, a SIDI, arr-dd dayi tudart ɛlaḥsab lfarayiḍ nnec. 
Inni yarezzun ad ggen řefḍayeḥ, udsen ayi, aqa nitni ttaggʷejen aṭṭas x Ccariɛa nnec. 
Cek tudsed, a SIDI, marra řumurat nnec d tidett i ǧan. 
Uřa d aṭṭas zeg wami tuɣa ssneɣ cchadat nnec, maɣar Cek teggid tent i řebda. 
Rix. Xzar ɣar řeɣben inu u tessnejmed ayi, maɣar war ttuɣ Ccariɛa nnec. 
Aɣ ayi tasɣart uca fekk ayi, arr-dd dayi tudart am mammec i d ayi tennid. 
Iggʷej usenjem x iɛeffanen, maɣar war arezzun tiweṣṣa nnec. 
A SIDI, arreḥmet nnec d aṭṭas, arr-dd dayi tudart ɛlaḥsab lfarayiḍ n nnec. 
Inni d ayi ittdarracen d yinni d ayi iḥeṣṣaren aqa aten s waṭṭas, maca necc war ḥeyydeɣ ca x cchadat nnec. 
Ẓriɣ inni d ayi iɣdaren uca ɛiffeɣ ten, maɣar nitni war ṭṭifen deg wawař nnec. 
Xzar, mammec ttexseɣ řumurat nnec, a SIDI, arr-dd dayi tudart ɛlaḥsab tamexsiwt nnec icewwaren. 
Beddu n wawař nnec aqa-t d tidett, kuř řeḥkam iseggden zzayek aqa-t i řebda. 
Cin. Řḥukkam darrcen xafi x walu, maca uř inu tuɣa itteggʷed zeg wawař nnec. 
Necc farḥeɣ x lwaɛd nnec, amecnaw ijjen i ittaf ict n tkeccaḍt tameqqrant. 
Necc carrheɣ axarriq u ɛiffeɣ t, maca ttexseɣ Ccariɛa nnec. 
Sebɛa n twařawin deg wass ṣebḥeɣ Cek x řeḥkamat n tsegda nnec. 
Inni ittexsen Ccariɛa nnec, aqa ɣarsen řehna tameqqrant, war din aẓru n uneqraḍ zzatsen. 
A SIDI, ttrajiɣ asenjem nnec, u tteggeɣ ɛlaḥṣab tiweṣṣa nnec. 
Řeɛmar inu iḥeṭṭa cchadat nnec, ttexseɣ tent aṭṭas. 
Necc ḥeṭṭiɣ řumurat nnec d cchadat nnec, maɣar marra ibriden inu arzmen zzatek. 
Taf. A SIDI, ejj ad ɣarek dd-yaweḍ uřaɣi inu zzat i wudem nnec, ewc ayi řeɛqeř ɛlaḥsab awař nnec. 
Ejj ad dd-tas tutra inu ɣar wudem nnec, fekk ayi am mammec i d ayi tennid. 
Iyencicen inu ad ucruren aṣebbeḥ am yijj n řɛunṣar, maɣar Cek tesseřmaded ayi tiweṣṣa nnec. 
Iřes inu ad yarr min tennid Cek, maɣar marra řumurat nnec seggden. 
Ejj afus nnec ad ayi igg twiza, maɣar ixḍareɣ řumurat nnec. 
A SIDI, ttmeẓreɣ ɣar usenjem nnec, Ccariɛa nnec aqa dayes meẓri inu. 
Ejj řeɛmar inu ad iddar, ad Cek iṣebbeḥ, ad ayi ɛawnent lfarayiḍ nnec. 
Necc weddareɣ am yijj n uhuři iweddaren. Arzu x umsexxar nnec, maɣar war ttuɣ řumurat nnec. 
