﻿Izehhiden.
118.
Ɣar beddu ... Qadam SIDI, maɣar Netta d aṣebḥan, maɣar tamexsiwt nnes icewwaren tᵉttɣima i řebda. 
Ejj Israil ad yini: “Tamexsiwt nnes icewwaren tᵉttɣima i řebda.” 
Ejj taddart n Harun ad tini “Tamexsiwt nnes icewwaren tᵉttɣima i řebda.” 
Ejj inni itteggʷeden SIDI ad inin: “Tamexsiwt nnes icewwaren tᵉttɣima i řebda.” 
Deg webrid ... Di řeḥṣaret řaɣiɣ ɣar SIDi. SIDi yarra-dd xafi, iwca ayi ttasiɛ. 
SIDI aqa-t akidi, war tteggʷedeɣ ca, maɣar min izemmar bnadem ad ayi igg? 
SIDI aqa-t akidi jar yinni d ayi iwcin afus. Necc ad xezzareɣ ɣar swadday x yinni d ayi icarrhen. 
Iḥřa ad arewřeɣ ɣar SIDI x utecři x bnadem. 
Iḥřa ad arewřeɣ ɣar SIDI x utecři x tarwa n taṣiřet. 
Marra řegnus nnḍen ayi-dd, necc ɣeḍřeɣ ten s Yisem n SIDI. 
Nnḍen ayi-dd, wah, quwwaren ayi. Necc ɣeḍřeɣ ten s Yisem n SIDI. 
Nitni nnḍen ayi am tzizwa, aqa am tmessi n isennanen xesyen. Necc ɣeḍřeɣ ten s Yisem n SIDI. 
Cek tɛarned ayi s řeqsaḥet ařami ɛřaḥař wḍiɣ, maca SIDI iwca ayi afus. 
SIDi d jjehd inu d azehhed inu, Netta idweř ayi d asenjem. 
Deg iqiḍan n imseggaden ittwaseř řḥess n usřiwřew d usenjem. Afus afusi n SIDI igga s jjehd. 
Afus afusi n SIDI ittwassgeɛɛed, afus afusi n SIDI igga s wemḥaḍ. 
Necc war ttmettiɣ ca, ad ddareɣ, ad barrḥeɣ timegga n SIDi. 
SIDi iwebbex ayi aṭṭas, maca war d ayi iwci i řmewt. 
Ɣar wadaf ... Arzmem ayi tiwwura n tsegda, ad zzaysent adfeɣ, ad qadiɣ SIDi. 
Inni yareḥḥben zeg yinni ittadfen qqaren ... Ta d tawwart n SIDI, imseggaden ad zzayes adfen. 
Necc ad ac qadiɣ umi d ayi tesřid, tdewřed ayi d asenjem. 
Aẓru i war xsen ibennayen, idweř d ixef n teɣmart. 
Wa yusa-dd zi SIDI u man aya d řeɛjeb di tiṭṭawin nneɣ. 
Wa d ass i igga SIDI, ejj aneɣ ad narceq u ad dayes nfarḥ. 
A SIDI, awi-dd asenjem, a SIDI, awi-dd afřaḥ. 
Lbaraka i wenni dd ɣa yasen s Yisem n SIDI! Neccin ad kenniw nbarek zi Taddart n SIDI. 
Arebbi d SIDI nni d aneɣ iggin tafawt. Qnem taɣarṣt n řɛid s iseɣwan ɣar waccawen n uɛalṭar, řmedbeḥ n wecmaḍ. 
Inni ittadfen qqaren ... Cek d Arebbi inu, s uya ad Cek qadiɣ, a AREBBI inu, ad Cek ssɛuǧeɣ. 
Marra jmiɛ ... Qadam SIDI, maɣar Netta iṣbeḥ, maɣar tamexsiwt nnes icewwaren tᵉttɣima i řebda. 
