﻿Izehhiden.
101.
Azehhed n Dawud. Necc ad ɣennjeɣ x tmexsiwt icewwaren d řḥeqq, ad zehhdeɣ i Cek, a SIDI! 
Necc ad ggeɣ s řeɛqeř ɛlaḥsab ijj n webrid ikemmřen. Meřmi ɣari i dd ɣa tased? Necc ad uyureɣ s wuř nican di řwesṭ n taddart inu, 
Necc war neṭṭareɣ tiṭṭawin inu di min ifeḍḥen. Necc carrheɣ min tteggen inni xak iḥeyyden man aya war d ayi iřeṣṣeq. 
Uř ittefriɣen ittxeṣṣa ad xafi yaggʷej, war xseɣ ad ssneɣ min war iḥřin. 
Wenni iceqqfen deg jjar nnes s tnuffra, ad t teḥḥiɣ. Wenni ittkebbaren s tiṭṭawin nnes d wenni ittɛeffaren s wuř nnes, war t kessiɣ. 
Tiṭṭawin inu arezzunt x imtiqqan di temmurt, ḥima nitni ad ɣari qqimen. Wenni igguren deg ijj n webrid ikemmřen, ad ayi isexxar. 
Wenni itteggen řɣecc, war ittɣimi di taddart inu, uřa d bu-ixarriqen war ittwaḍmen zzat i tiṭṭawin inu. 
Kuř ṣṣbeḥ ad teḥḥiɣ marra iɛeffanen zi temmurt, ḥima ammu i ɣa mḥiɣ marra inni itteggen řmuɛṣiyyet zi tendint n SIDI. 
