﻿Izehhiden.
92.
Azehhid. Ijj n izři i wass n ssebt. 
Mammec iṣbeḥ maḥend ad nqada SIDI, ad nzehhed i Yisem nnec, a Amɛuǧi x kuřci, 
maḥend ad nbarreḥ s tmexsiwt nnec icewwaren ɣar tuffut, řaman nnec di ǧyaři, 
di lharpa s ɛecra n ifiřan u di lharpa, s tirart x ifiřan n řgambri. 
Maɣar Cek tessfarḥed ayi, a SIDI, s tmegga nnec, necc ad sřiweřweɣ x řefɛayeř n ifassen nnec. 
Mammec mɣarent tmegga nnec, a SIDI, mammec uǧɣen ixarriṣen nnec! 
Ijj n uqeffuḥ war ɣares min ɣa iɛawed, ijj n ubuhaři war ifehhem man aya. 
Mařa iɛeffanen ɣemmyen am arbiɛ, u marra inni itteggen řmuɛṣiyyet ttnewwaren, aqa aya ad issiweḍ ateḥḥi nsen i řebda qaɛ. 
Cek d Amɛuǧi x kuřci i řebda, a SIDI! 
Maɣar xzar, řɛedyan nnec, SIDI, řɛedyan nnec ad fnan, marra inni itteggen řɣecc ad ttwazeǧɛen. 
Cek ad tessgeɛɛded accaw inu am wenni n iɣayḍ n řexřa ak-d waccawen d iziraren, ttwadehneɣ s zzect n ṭri. 
Tiṭṭ inu ad tẓar inni xafi ittcekkmen, imezzuɣen inu ad sřen i iɣrimen inu inni xafi dd-ikkaren. 
Amsegged ad inewwar am tcejjart n tini, ad iɣmi am tcejjart n tengelt x idurar n Lubnan, 
inni ittwaẓẓun di Taddart n SIDI, ad nnuwaren di řemraḥat n AREBBI nneɣ. 
Nitni ad wcen řɣiǧet di tewsar, ad qqimen ṣeḥḥen d ṭri. 
maḥend ad barrḥen, belli SIDI aqa-t nican. Netta d Taṣḍart inu u war dayes bu řɣecc. 
