﻿Izehhiden.
81.
I umeqqran n imeɣnajen. S teɣnint n Ujitti, aryaz zi Jat. N Asaf. 
Sřiwřem i AREBBI, jjehd nneɣ, duqqzem s usřiwřew i AREBBI n Yaɛqub. 
Sgeɛɛdem ict n yezři n uṣebbeḥ, awi abendir, řgambri miẓid d lharpa. 
Suḍem deg uyicc n icarri ɣar ubeddi n uyur, ɣar tziri iqefřen, ɣar wass n řɛid nneɣ. 
Maɣar ta d tawṣeyyet i Israil, ict n lfariḍa n AREBBI n Yaɛqub. 
Igga i-tt d cchadet di Yusuf, řami dd-iffeɣ ḍidd i temmurt n Miṣra. Aqa sřiɣ ijj n yiřes war d as fehmeɣ. 
Taɣruḍt nnes fekkeɣ tt zi ddqeř, ifassen nnes arxun zi tsuǧet i tuɣa yarebbu. 
Cek třaɣid di řeḥṣaret u Necc fekkeɣ cek zzayes. Necc arriɣ-dd xak am ttnuffareɣ deg wajjaj, ɣar waman n Mariba qeǧbeɣ cek. Silah. 
Seř, řgens inu, xenni Necc ad cehdeɣ di řwesṭ nnec, a Israil, mařa xenni tuɣa texsed ad ɣari dd-tesřed. 
War ɣarek ittiři ijj n arebbi d aɣrib, war sᵉjed uřa i yijj n arebbi i war tessined. 
Necc d SIDI, AREBBI nnec, wenni cek dd-issuffɣen zi Miṣra. Arzem aqemmun nnec u Necc ad t ccureɣ. 
Maca řgens inu war isři ca ɣar tmijja inu, Israil war d ayi ixs. 
S uyenni jjiɣ ten i wuř nsen iqesḥen, ařami i ɣa uyuren di řecwar n uzeǧif nsen. 
Mři dd-isřa ɣari řgens inu, mři Israil ixs ad yuyur deg ibriden inu! 
Xenni mammec deɣya iři qḍiɣ x řɛedyan nsen, arriɣ afus inu ḍidd i yinni ten iḥeṣṣaren. 
Inni icarrhen SIDI ad ɣares dd-dewřen ttmuruden deǧen, řweqt n uxeǧeṣ nsen ad yiři i řebda. 
Iři aqa iwca as macca zi lemliḥ n yirden, wah, iři s tamment zi jjarf aqa Necc ssjjiwneɣ cek. 
