﻿Izehhiden.
77.
I umeqqran n imeɣnajen. Sadu ufus n Yadutun. Azehhed n Asaf. 
Necc ssgeɛɛdeɣ tmijja inu ɣar AREBBI uca řaɣiɣ, ssgeɛɛdeɣ tmijja inu ɣar AREBBI, Netta ad ayi iseř. 
Deg wass n řeḥṣaret inu arzuɣ Sidi inu. S ǧiřet sswiẓẓḍeɣ afus inu břa ma ad as arxuɣ, řeɛmar inu yugi ad ittwaɛezza. 
Umi tuɣa ttidareɣ AREBBI, xenni ttzehhareɣ, ttxemmameɣ, uca yarxu buḥbeř inu. Silah. 
Cek tarred tiṭṭawin inu ad qqiment faqent, nnhewřeɣ, war ssiwřeɣ. 
Necc ttxemmameɣ deg wussan n wecḥař uya, deg iseggʷusa n zzmanat iɛdun. 
Necc ttidareɣ deg uzenzun x ifiřan inu s ǧiřet, xmi ttxemmameɣ deg wuř inu u buḥbeř inu yarezzu: 
Ma ad aneɣ inḍar Sidi inu i řebda, war xafi ittḥinni ɛad? 
Ma tbedd tmexsiwt nnes icewwaren i řebda? Ma ittwabḍeř wawař i iǧan zi jjiř i jjiř nneɣni awarni as? 
Ma ittu Arebbi aḥinni nnes? Ma deg weɣḍab nnes ibelleɛ arreḥmet nnes?” Silah. 
Nniɣ: “Wa d řeɛdab inu, aqa d iseggʷusa zeg ufus n Umɛuǧi x kuřci.” 
Necc ad idareɣ timegga n SIDi, ad ɛeqřeɣ x lmuɛjizat nnec n zic. 
Necc ad xemmameɣ di marra řexdayem nnec, ad ttxarraṣeɣ di marra min teggid. 
A AREBBI, abrid nnec aqa deg Uqeddas i yeǧa! Man wen i yeǧan d arebbi ameqqran am AREBBI? 
Cek d Arebbi nni itteggen lmuɛjizat, Cek tessecned tizemmar nnec jar řegnus. 
Cek tefdid řgens nnec s uɣiř nnec, tarwa n Yaɛqub d Yusuf. Silah. 
Aman ẓrin Cek, a AREBBI, aman ẓrin Cek uca arjijen, wah, aman ihewřen nnhewřen. 
Iseynuten ideqqřen farrɣen-dd aman nsen, ibarruten n iseynuten ssgeɛɛden tmijja nsen, u fřitcat n řqews nnec ḍwint da d diha.    
Tmijja nnec tegga am wajjaj di tḥaryaḍt, assamen ggin tafawt x ddunect, tammurt tenhezz tarjij. ` 
Abrid nnec icuq di řebḥar, amesraq nnec deg waman imeqqranen, maca iṣuraf n iḍaren nnec war binen ɛad. 
Cek tnedhed řgens nnec am ict n tḥimart n wuǧi, s ufus n Musa d Harun. 
