﻿Izehhiden.
75.
I umeqqran n imeɣnajen. ‘War ttareddeǧ!’ Azehhed n Asaf. Izři. 
Neccin nettqada Cek, a AREBBI, nettqada! Aqa Isem nnec yudes, aqa lmuɛjizat nnec ssawařen x man aya. 
Maɣar Necc ad xḍareɣ řḥař ittwaggen, ad ggeɣ ccreɛ s řḥeqq. 
Tammurt ak-d marra imezdaɣ nnes tefsiy, maca Necc ssmettneɣ ipilaren nnes. Silah. 
Necc nniɣ i ibuhařiyyen: “War tteggʷedem ca!”, i iɛeffanen: “War ssgeɛɛadem icc nwem! 
War ssgeɛɛadem icc nwem ammu sennej, war ssawařem s nnfaxet!” 
Maɣar asgeɛɛed war dd-ittas zi ccarq, niɣ zi řɣarb uřa zi řexřa. 
Maɣar AREBBI d řqaḍi. Netta issᵉhekkʷa ijjen u issgeɛɛad wenneɣni. 
Maɣar aqa din ijj n řkas deg ufus n SIDI, binu ittegg kuffu, ittwaxeǧaḍ marra. Netta ittkebba zzayes. Marra iɛeffanen n temmurt ad ẓemmen uřa d řexmira nnes umi zzayes i ɣa swen. 
Necc ad t barrḥeɣ i řebda qaɛ, ad zehhdeɣ i AREBBI n Yaɛqub. 
Necc ad zedmeɣ marra accawen n iɛeffanen, accawen n imseggaden ad ttwassgeɛɛden. 
