﻿Izehhiden.
71.
Arekkwařeɣ ɣarek, a SIDI, ejj ayi ɛemmarṣ war ttseḍḥiɣ i řebda. 
Fekk ayi s tsegda nnec u arxu ayi. Arr-dd ɣari amezzuɣ nnec u senjem ayi. 
Iři d ict n teṣḍart i tzeddiɣt i necc, ḥima ad ɣares dd-aseɣ řebda. Cek tweṣṣid ḥima ad ttwassnejmeɣ, maɣar Cek d Tasḍart inu d lburj inu. 
AREBBI inu, senjem ayi zeg ufus n uɛeffan, zeg ufus n mmis n řmuɛṣiyyet u zi bu-ɣezzu. 
Maɣar Cek d řayas inu, Sidi inu, SIDI, Cek d atecři inu zi temẓi inu. 
Zeg uɛeddis n yemma, tuɣa ayi ɛemmdeɣ xak. Zeg uɛeddis n yemma, aqa Cek d Wenni d ayi iḥuzen, necc ṣebḥeɣ Cek řebda. 
I waṭṭas necc am yict n řeɛřamet n řeɛjeb, maca Cek d amcan inu ijhed i tarewřa. 
Ejj aqemmum inu ad iccur s uṣebbeḥ nnec, ass imun s ccan nnec. 
War xafi ttmenḍar deg wussan n tewsar inu, war d ayi semmeḥ mařa jjehd inu iruḥ. 
Maɣar řɛedyan inu ssawařen xafi, inni yarezzun řeɛmar inu, mcawaren xafi jmiɛ. 
Nitni qqaren: “AREBBI ismeḥ dayes. Ḍfarem t u menɛem t, maɣar war din wenni i ɣa ifekken. 
A AREBBI, war ttɣimi tiggʷejed xafi, a AREBBI inu, ewc ayi deɣya afus. 
Ejj iɣrimen n tudart inu ad ttwaseḍḥan u ad ttwaccen, ejj inni yarezzun ad ayi ggen řɣar ad ttwadřen s useḥqar d řefḍiḥet. 
Necc maca ad qqimeɣ ttrajiɣ Cek řebda, u ad arniɣ ɛad ɣar uṣebbeḥ nnec. 
Aqemmum inu ad ibarreḥ s tsegda nnec, asenjem nnec, ass imun, maɣar war ssineɣ řqedd nnes. 
Necc ad dd-aseɣ s tmegga timeqqranin n Sidi inu, SIDI, ad idareɣ tasegda nnec, mɣir tenni Nnec waha. 
A AREBBI, Cek tuɣa tesseřmaded ayi zi temẓi inu, u necc ař ass-a ttbarrḥeɣ s lmuɛjizat nnec. 
A AREBBI, war d ayi semmeḥ ca, waxxa wsareɣ cabeɣ, ař ɣa ḥajiɣ i jjiř-a x tmegga n ufus nnec uřa x tmegga nnec timeqqranin, i marra min i dd ɣa yasen. 
A AREBBI, tasegda nnec tiweḍ ař sennej qaɛ, maɣar Cek teggid timegga timeqqranin, a AREBBI, man wen iǧan am Cek! 
Aqa Cek tejjid tekka xafi aṭṭas n řeḥṣarat d řɣar, maca waxxa amenni Cek ad ayi tesseddared ɛawed, Cek ad ayi tessuffɣed zeg waman ihewřen n temmurt. 
Cek ad tarrid řemɣaret inu ad temɣar, ad ayi dd-tennḍed s ufewwej nnec. 
Ad Cek qadiɣ ɛawed s lharpa, x řaman nnec, a AREBBI, ad Cek zehhdeɣ s řgambri, a Amqeddas n Israil. 
Iyencicen inu ad sřiwřewen, aqa ad zehhdeɣ i Cek, uřa d řeɛmar inu nni tefdid Cek. 
Uřa d iřes inu ad iḥaja x tsegda nnec ass marra, maɣar inni yarezzun ad ayi ggen řɣar, seḍḥan, iwa, ttwafeḍḥen. 
