﻿Izehhiden.
59.
I umeqqran n imeɣnajen. ‘War t ttareddeǧ!’ N Dawud. Tira ineqcen. Umi Cawul ijja ad ḥḍan taddart n Dawud ḥima ad t nɣen. 
Fekk ayi zi řɛedyan inu, a AREBBI, sgeɛɛed ayi sennej ɣar uḥeṭṭu zeg inni xafi ittekkaren. 
Fekk ayi zeg inni itteggen řɣecc, senjem ayi zeg iryazen n idammen. 
Aqa, xzar, nitni ggin ijj n řfex i řeɛmar inu, ayt n bu-ṣṣulṭa munen xafi. War din axeṭṭu uřa d ddenb ɣari, a SIDI! 
Waxxa war ggiɣ ljarima, aqa nitni zeɛma usin-dd ttazzřen-dd ɣari u sswejjaden ixef nsen. Faq, as-dd ɣar umsagar akidi u xzar. 
Cek, a SIDI, AREBBI n řɛeskarat, AREBBI n Israil, faq ḥima ad třeqfed marra řegnus. War ttḥinni x uřa d ijj zi marra iɣeddaren inni itteggen řɣecc. Silah. 
Aqa ttɛeqben ɣar tmeddit, ttzun am weqzin, ttennḍen i tendint. 
Xzar, s uqemmum nsen ssusufen qaɛ, řesyuf nsen aqa aten x iyencicen nsen, minzi man wen i ɣa isřen? 
Cek maca, a SIDI, ad xasen tḍeḥced, Cek ad tḥecced x marra řegnus. 
A jjehd nnes, necc ad t rajiɣ, maɣar AREBBI d lburj inu yuɛřan. 
Tamexsiwt icewwaren n AREBBI inu ad ayi tizwar, AREBBI ad ayi yarr ad ẓareɣ inni d ayi iḥeṣṣaren. 
War ten neqq ca, maḥend řgens inu war t ittettu. Ejj i-ten ad weddaren s jjehd nnec, menḍar i-ten swadday, maɣar Cek d taseddart nneɣ i useřqi, a Sidi inu. 
X ddnub n uqemmum nsen, x wawařen i dd-itteffɣen zeg iyencicen nsen, x uya ejj i-ten ad ttwaḥebbsen di nnfaxet nsen, uřa x nneɛřet u x uxarriq nni xef ttḥarden. 
Keḥḥeḍ i-ten deg wesɛar nnec, keḥḥeḍ i-ten ařami war ǧin ɛad, arr i-ten ad ssnen, aqa AREBBI d řḥakem di Yaɛqub, ař tineggura n temmurt. Silah. 
Aqa ad ɛeqben ɣar tmeddit, ttzun am weqzin u ttennḍen i tendint. 
Ejj i-ten ttemhafan da d diha x macca, ejj i-ten xenni ad qqimen ssnusan, mařa war jjiwnen, 
Necc ad ɣennjeɣ x jjhed nnec, ɣar teffut ad sřiwřeweɣ x tmexsiwt nnec icewwaren, maɣar tuɣa Cek d ijj n lburj yuɛřan i necc, d amcan n tarewřa deg wass n řeḥṣaret inu. 
Jjehd inu, necc ad zehhdeɣ i Cek, maɣar Cek AREBBI d lburj inu yuɛřan, AREBBI n tmexsiwt inu icewwaren. 
