﻿Izehhiden.
52.
I umeqqran n imeɣnajen. Axemmi n Dawud. 
Řami dd-yusa Duwaɛ, zi Idum, ixebbar Cawul, inna as: “Aqa Dawud yusa-dd ɣar taddart n Aximalik.” 
Mammec tfeyyced zi tɛeffant, a jjiheř? Tamexsiwt icewwaren n Arebbi tᵉttekk ass imun. 
Iřes nnec ittxarreṣ di řɣar, am mammec řmus iqeḍɛen i uḥeffi yiwyi druct s řɣefřet. 
Cek tᵉttexsed taɛeffant aṭṭas x tṣebḥant, řhard s ixarriqen ktar x řhard n tsegda. Silah. 
Cek tᵉttexsed awařen ittakkʷaren, uřa d iřes iccur s wecmat. 
Maca Arebbi ad cek yareddeǧ i řebda, Netta ad cek iṭṭef, ad cek ikkes zi tzeddiɣt. Netta ad cek iqřeɛ zeg iẓewran nnec zi temmurt n yinni iddaren. Silah. 
Imseggaden ad t ẓaren ad ggʷeden. Ad xas ḍeḥcen, ad inin: 
“Xzar aryaz ijehden wenni umi war iggi AREBBI jjehd nnes, maca tuɣa ittceř x wagřa nnes ameqqran. Tuɣa idweř ijhed s ṭṭbiɛet nnes iɣeccen.” 
Necc ad iřiɣ am yict n tzitunt tazeyzawt di Taddart n AREBBI. I řebda qaɛ i ɣa ttiqqeɣ di tmexsiwt icewwaren n AREBBI. 
Necc ad Cek qadiɣ i řebda qaɛ, maɣar Cek teggid t. Ad ssitimeɣ deg Yisem nnec, maɣar Netta d aṣebḥan i imtiqqan nnec. 
