﻿Izehhiden.
48.
Izři, azehhed zeg ayt n Quraḥ. 
SIDI d ameqqran, isdaḥeǧa ad ittwassemɣar aṭṭas, di tendint n AREBBI nneɣ, x wedrar nnes iqeddsen. 
Řuɛřa nnes d řemřaḥet, adrar n Ṣihyun aqa-t d řefraḥet i marra tammurt, ɣar uɣezdis n ccamal n tendint n Ujeǧid d ameqqran. 
AREBBI aqa-t di řeqṣur nnes, Netta ittwassen am yijj n lburj yuɛřan. 
Maɣar xzar, ijeǧiden munen, aqa ffɣen jmiɛ. 
Řami t ẓrin, tbehten, aqa nnjerfan uca arewřen deɣya. 
Dinni tᵉṭṭef i-ten tarjijit, am řeḥriq n ict n temɣart tᵉttaru. 
S usemmiḍ zi ccarq tᵉttareẓẓid iɣarruba n Tarcic. 
Am mammec tuɣa tt nesřa, ammu i tt netwařa di tendint n SIDI n řɛeskarat, di tendint n AREBBI nneɣ. AREBBI ad tt issemten i řebda. Silah. 
A AREBBI, nidar tamexsiwt nnec icewwaren, di řwesṭ n Zzawect nnec Tameqqrant. 
Am Isem nnec, a AREBBI, ammu ittakkwaḍ uřa d ccan nnec ař tineggura n temmurt. Afus nnec afusi iccur s tsegda. 
Ejj adrar n Ṣihyun ad ifarḥ, jjem yessis n Yahuda ad arecqent zi ssibbet n řeḥkamat nnec. 
Kkem x Ṣihyun, nnḍem as-dd, ḥesbem ṣṣumɛat nnes! 
Ggem uř nwem x řḥiḍ nnes ijehden, xzarem mliḥ di řeqṣur nnes, ḥima ad tt ttɛawded i jjiř i dd ɣa yasen. 
Maɣar AREBBI wanita d AREBBI nneɣ i řebda qaɛ. Netta ad aneɣ indeh ɣar ujemmaḍ n řmewt. 
