﻿Izehhiden.
39.
I umeqqran n imeɣnajen. I Yadutun. Azehhed n Dawud. 
Nniɣ: “Necc ad kkareɣ ad ḥḍiɣ ibriden inu zi ddenb n yiřes inu, ad ṭṭfeɣ aḥeṭṭu ɣar uqemmum inu s ict n tecmant, min ɣa yekk uɛeffan zzati.” 
Necc dewřeɣ am weynaw, řeḥḥfeɣ ixef inu s useɣd, bekmeɣ uřa x řxar, maca řeḥriq inu tuɣa yarenni. 
Uř inu idweř iḥemma di daxeř inu, tᵉttwassareɣ ict n tmessi ɣar unixses inu. Xenni ssiwřeɣ s yiřes inu: 
“A SIDI, scen ayi aneggar inu, man iǧa řqedd n wussan inu, ḥima ad ssneɣ mammec arexfeɣ. 
Xzar, Cek tarrid ussan inu am yicbaren n ufus, řmijař n tudart inu zzat i Cek axmi d walu. Kuř bnadem, mammec ma ibedd imten, nican am yict n tayyut.” Silah. 
Iwa, bnadem iggur am yijj n řexyař, wah, am ict n tayyut ammu i ittraḥ ittas-dd. Netta issmun, war issin man wen t i ɣa iksin ɣares. 
U řexxu, min ɣa ssitmeɣ, a Sidi inu? Aqa necc ttrajiɣ Cek! 
Fekk ayi zi marra ixeṭṭan inu, war d ayi ttegg ca d tiseḍḥac i ubuḥaři. 
Necc dewřeɣ am weynaw, war arezzmeɣ aqemmum inu, maɣar d Cek i iggin aya. 
Ksi zzayi jjriḥect nnec, aqa fenniɣ s uṭeffu iḥeṣṣaren n ufus nnec. 
Mařa tseggded ca n weryaz s tiyyita di ssibbet n řmuɛṣiyyet nnes, xenni tessfesyed acewwar n waddud nnes am tcinda. Iwa kuř bnadem ad ifna am yict n tayyut. Silah. 
Seř i tẓaǧit inu, a SIDI, sḥess i uɣuyyi inu. War ttebkim ɣar imeṭṭawen inu, maɣar aqa ayi d abarrani, d amɛezzeb ɣarek, am marra řejdud inu. 
Sḥeyyed xafi maḥend ad ceɛceɛeɣ ɛad s řefraḥet, qbeř ad raḥeɣ u war da ttiřiɣ ɛad. 
