﻿Izehhiden.
35.
N Dawud. Mcubbec, a SIDI, ak-d yinni akidi ittemcubbucen, mneɣ ak-d yinni kidi ittmenɣan. 
Ṭṭef taseddart n useřqi d tseddart tameqqrant, uca kkar, ewc ayi afus. 
Jbed-dd lansa, qqen abrid i umsagar ak-d yinni dd ayi iḍaffaren, ini i řeɛmar inu: “Asenjem nnec aqa d Necc!” 
Arr inni yarezzun x řeɛmar inu ad ttwaxarewḍen u ad ttwafeḍḥen, ejj inni ittxarriṣen di řɣar xafi ad ttwaɛarrnen ɣar ḍeffar, ejj i-ten ad dewřen ttseḍḥan. 
Ejj i-ten ad dewřen am yicarfa deg usemmiḍ, ejj lmalak n SIDI ad ten iɛarn. 
Ejj ad idweř webrid nsen d taǧest, ad yiři itteḥřuǧuḍ, uca ejj lmalak n SIDI ad ten iḍfar. 
Maɣar břa ssibbet ssnuffaren xafi aḥfur n turṣuḍi d tracca nsen, břa ssibbet ɣzin t i řeɛmar inu. 
Ejj areddeǧ ad xas dd-yas břa ma issen, ejj tracca nnes nni issnuffar ad t tᵉṭṭef simant nnes, ejj i-t ad dayes dd-iwḍa simant nnes, s ijj n uweṭṭu i t i ɣa yareddǧen. 
Řeɛmar inu ad ifarḥ zi SIDI, ad yarceq deg usenjem nnes. 
Ad inin marra iɣsan inu: “A SIDI, man wen iǧan am Cek! Cek d wenni ittfekkan řmeskin zeg wenni xas ijehhden, řmeskin d umezřuḍ zeg inni d asen ikeccḍen.” 
Icehhaden iqṭaṭɛiyyen kkaren. Min war ssineɣ, ttseqsan ayi. 
Arrin ayi-dd řɣar di řxar, ggin dayi řeḥwej n yinni xafi iɛizzen. 
Necc maca arḍeɣ ict n txancet n wecḍan, řami tuɣa heǧcen nitni, ggiɣ ad iẓumm řeɛmar inu, uca taẓaǧit inu tᵉttɣima tᵉddekkwař-dd ɣari di daxeř inu. 
Axmi t tuɣa d ameddukkeř inu niɣ d uma, ammu i tuɣa ggureɣ, am ca n ijj iceṭṭ x yemmas, ammu tuɣa ayi ggureɣ ɣennseɣ deg warruḍ d abarcan. 
Maca xmi ttqejdiḥeɣ, farrḥen nitni, ttmunen ak-d wayawya. Ttmunen ḍidd inu inni n wadday, břa ma ad t ssneɣ. Ceqqfen dayi, war ssusmen. 
Am inni iɣeṭṭṣen bnadem i yijj n uřeqquz n weɣrum, ammu ɣezzan-dd ɣari tiɣmas. 
A Sidi inu, ař mecḥař i ɣa tekked txezzared waha? Senjem ayi zeg wareddeǧ nsen i iggin, ayenni inu zeg weyraden imeẓyanen. 
Necc ad Cek qadiɣ deg yijj n wegraw n řgens d ameqqran, ad Cek ṣebbḥeɣ jar ijj n řgens imɣar aṭṭas. 
Inni iǧan d řɛedyan inu di řbaṭer, war ten ttejji ad xafi farḥen, inni d ayi icarrhen, war ten ttejji ad xafi mmseɣmazen břa ssibbet. 
Maɣar nitni war ssiwiřen ca x řehna, maca ttxarriṣen deg inwayen ccuren s řɣecc ḍidd inni yarezzun řhudnet di temmurt. 
Nitni arezzmen aqemmum nsen qaɛ, qqaren: “Ha, ha, tiṭṭ nneɣ simant nnes teẓra i-tt!” 
A SIDI, Cek teẓrid tt, war ttesqara, Sidi inu, war xafi tteggʷij ca. 
Faq, kkar di ṭṭweɛ n řḥeqq inu, a AREBBI inu d Sidi inu, di ṭṭweɛ n ddeɛwet inu. 
Ḥkem xafi s řḥeqq ɛlaḥsab tasegda nnec, a SIDI, AREBBI inu, war ten ttejji ad xafi farḥen. 
War ten ttejji ad inin deg wuř nsen: “Ha, aqa aneɣ mliḥ!”, war ten ttejji ad inin: “Aqa nsarḍ i-t!” 
Ejj inni ifarrḥen x arẓiyyet inu, ad ttwaxarewḍen u ad ssnuffaren ixef nsen jmiɛ, ejj inni iggin ixef nsen mɣaren zzati, ad yarḍen s useḍḥi d řefḍiḥet. 
Ejj inni yarḍan di tsegda ad sřiweřwen u ad farḥen, ejj i-ten ad inin: “D ameqqran i yeǧa SIDI wenni yarḍan di řehna n umsexxar nnes.” 
Xenni iřes inu ad ibarreḥ tasegda nnec d uṣebbeḥ nnec ass marra. 
