﻿Izehhiden.
31.
I umeqqran n imeɣnajen. Azehhed n Dawud. 
Necc arekkwařeɣ ɣarek, a SIDI, war ttejji ad seḍḥiɣ i řebda, fekk ayi s tsegda nnec. 
Ewc ayi amezzuɣ nnec, fekk ayi deɣya. Iři d Taṣḍart ijehden i necc, ijj n lburj ḥima ad ayi tessnejmed. 
Maɣar Cek d Taṣḍart inu d lburj inu. Ndeh ayi, thilla dayi di ṭṭweɛ n Yisem nnec. 
Fekk ayi zi tracca nni xafi ggin s tnuffra, maɣar Cek d jjehd inu. 
Deg ufus nnec i ggiɣ buḥbeř inu. Cek tefdid ayi, a SIDI, Arebbi, d amtiqqi i teǧid. 
Necc carrheɣ inni ittceɣřen ixef nsen s řexyařat ibeṭṭřen. Necc ttecřeɣ x SIDI. 
Necc ad arecqeɣ u ad farḥeɣ zi tmexsiwt nnec icewwaren, minzi Cek tᵉttwařid řeɣben inu u tareggbed x řeḥṣarat inu, 
minzi war d ayi tarrid ɣar ufus n řeɛdu inu, maca teggid ayi ttasiɛ ɣar iḍaren inu. 
Ḥinn xafi, a SIDI, maɣar ttwaḥeṣṣareɣ, tiṭṭ inu d řeɛmar inu d tekrict inu aqa fecřen. 
Maɣar tudart inu tkemmeř s wecḍan, iseggʷusa inu s uzehhar. Jjhed inu iheyyef zi řmuɛṣiyyet inu, ixsan inu aqa arcan. 
I marra inni d ayi iḥeṣṣaren dewřeɣ d astehzi, i jjiran inu qaɛ aṭṭas, i yinni d ayi issnen dewřeɣ d ijjen i issnexřiɛen. Inni d ayi ittwařin deg webrid, ttrakkwařen zzayi. 
Ttun ayi s wuř am yijj n umettin, dewřeɣ am yiceqfan n weqdiḥ, 
maɣar sřiɣ aqa aṭṭas ceqqfen dayek, assiggʷed tuɣa ittenneḍ ayi-dd umi xafi ggin tameɛmuč. Tuɣa arezzun ad kksen tudart inu. 
Maca necc ttecřeɣ xak, a SIDI, qqareɣ: ‘Cek d AREBBI inu!’ 
Řweqt inu aqa-tt deg ufus nnec. Fekk ayi zeg ufus n řɛedyan inu u zeg inni d ayi iḍeffaren, 
Ejj udem nnec ad yarɣ x umsexxar nnec, senjem ayi s tmexsiwt nnec icewwaren. 
A SIDI, war ttejji ad dewřeɣ ttseḍḥiɣ, maɣar xak i ttřaɣiɣ. Arr iɛeffanen ad dewřen ttseḍḥan, arr i-ten ad ssusmen di řaxart. 
Ejj ad sqaren iyencicen issxarriqen, inni issawařen s nnfaxet ḍidd i umsegged, s uɛeffar d useḥqar. 
Mecḥař imeqqar řxar nnec i txemmřed i yinni Cek itteggʷeden, nni tesswejded i yinni ɣarek yarekkwařen zi tarwa n bnadem! 
Cek tessdurruyed i-ten s uřeḥḥaf n wudem nnec, zi nnfaxet n bnadem. Cek tessnuffared i-ten di texzant, zeg umcubbec n iyencicen. 
Ad ittwabarek SIDI, maɣar Netta yarra ayi-dd tamexsiwt nnes icewwaren d řeɛjeb, deg ict n tendint ifaryen. 
Necc deɣya nniɣ: “Necc ttwaqesseɣ zi zzat i tiṭṭawin nnec!’ Maca ɛad Cek tesřid i tmijja inu, umi dd xak řaɣiɣ. 
Sɛizzem SIDI, marra imtiqqan nnes, maɣar SIDI iḥeṭṭa x yinni ittamnen, u wenni itteggen s nnfaxet, ittxeǧeṣ i-t s aṭṭas. 
Iřim d iryazen u Netta ad daywem yegg uř, wah, marra inni ittrajan SIDI. 
