﻿Izehhiden.
27.
Azehhed n Dawud. SIDI d tafawt inu d usenjem inu, wi zi ɣa ggʷedeɣ? SIDI d lqelɛa ijehden i tudart inu, wi zi ɣa nnxeřɛeɣ ɛad? 
Umi ɣari dd-qarrben iɛeffanen ḥima ad ccen ddat inu, inni d ayi iḥeṣṣaren d řɛedyan inu, nnqarḍen nitni, wḍan ɣar temmurt. 
Waxxa ad xafi iḥjem ijj n řɛeskar, uř inu war itteggʷed ca. Waxxa ad xafi ikkar umenɣi, ɛad necc ttɣimiɣ ttecřeɣ. 
Ict n řḥajjet ttareɣ zi SIDI, ta ad xas arzuɣ: min ɣa kkeɣ ddareɣ ad qqimeɣ ad zedɣeɣ di Taddart n SIDI, ḥima ad ẓareɣ řeḍrafet n SIDI, ḥima ad beqceɣ di Zzawect nnes Tameqqrant. 
Maɣar Netta issdurruy ayi deg uɛucci nnes deg wass n řɣar. Netta issřeqqa ayi deg useřqi n Uqiḍun nnes, Netta issgeɛɛad ayi x ict n teṣḍart. 
Řexxu ad ittwassgeɛɛed uzeǧif inu x řɛedyan inu inni d ayi dd-innḍen, ɣar wesruddeḥ di řbuq ad awyeɣ tiɣarṣa ɣar Uqiḍun nnes, ad ɣennjeɣ, wah, ad zehhdeɣ i SIDI. 
Seř ɣar tmijja inu, a SIDI, xmi ɣa řaɣiɣ, ḥinn xafi u arr-dd xafi. 
Zzayek i issawař wuř inu: “Arzu x wudem inu!” Necc arezzuɣ x wudem nnec, a SIDI. 
War zzayi tteffar udem nnec, war ttxiyyab amsexxar nnec deg weɣḍab. Tuɣa Cek d amɛawen inu. War d ayi ttsemḥed u war d ayi ttejji, a AREBBI n usenjem inu. 
Maɣar baba d yemma aqa semḥen dayi, maca SIDI ad ayi iksi ɣares. 
Scen ayi abrid nnec, a SIDI, ndeh ayi ɣar webrid iseggmen, di ssibbet n yinni d ayi iḥeṣṣaren. 
War d ayi ttsellem ɣar meẓri deg řeɛmar n yinni d ayi iḥeṣṣaren, maɣar řechud issxarriqen kkaren xafi, inni i xafi ittsuḍen s řexcunet. 
Uh, mařa necc zeɛma war umineɣ ad ẓareɣ řxar n SIDI di temmurt n yinni iddaren! 
Raja SIDI, raja i-t, iři d aryaz, Netta ad dayek yegg uř, wah raja SIDI. 
