﻿Izehhiden.
25.
Azehhed n Dawud. Alif. A SIDI, ɣarek i dd-ssgeɛɛadeɣ řeɛmar inu. 
Bit. A AREBBI inu, necc ttecřeɣ xak. Ejj ayi war ttseḍḥiɣ, ejj řɛedyan inu war xafi ttesřiwřiwen s řefraḥet. 
Gimel. Wah, marra inni Cek ittrajan war ttseḍḥin. Inni iggin s řeɣdar břa ssibbet, ad seḍḥen. 
Dalit. A SIDI, scen ayi ibriden nnec, sɣar ayi imesraq nnec. 
Hi. Ndeh ayi di tidett nnec u sɣar ayi, minzi Cek d AREBBI n usenjem inu, necc ssitimeɣ dayek ass marra. 
Zayin. Ɛqeř, a SIDI, x arreḥmet nnec, x tmegga n tmexsiwt nnec icewwaren, maɣar aqa atent ǧant zi řebda. 
Xit. War ttidar ca ddnub n temẓi inu uřa d ixeṭṭan inu. Xemm maca ɣari di tmexsiwt nnec icewwaren, di ṭṭweɛ n tcuni nnec, a SIDI. 
Tit. SIDI iṣbeḥ, icna, x uya ad issɣar abrid i imednab. 
Yud. Netta ad igewwed imhinen s řḥeqq, Netta ad isseřmed abrid nnes i imhinen. 
Kaf. Marra imesraq n SIDI aqa aten d tamexsiwt icewwaren d řaman, i yinni iḥeṭṭan Řɛahd nnes d ccahadat nnes. 
Lamid. Di ṭṭweɛ n Yisem nnec, a SIDI, ɣfar řmuɛṣiyyet inu, maɣar aqa-tt d aṭṭas. 
Mim. Man wen d aryaz i itteggʷeden SIDI? Netta ad as isseřmed abrid i ittxeṣṣa ad ixḍar. 
Nun. Řeɛmar nnes ad issens di řxir, tarwa nnes ad twart tammurt. 
Samix. Řaman i din n SIDI i yinni zzayes itteggʷeden, Řɛahd nnes aqa-t din maḥend ad asen t issargeb. 
Ɛayin. Tiṭṭawin inu řebda di SIDI, minzi Netta ad ifekk iḍaren inu zi tracca. 
Pi. Arr-dd ɣari s wudem nnec, ḥinn xafi, maɣar necc aqa ayi weḥḥdi u di řeɣben. 
Tsadi. Řeḥṣarat n wuř inu aqa mmarnint. Suffeɣ ayi zi ddiqat i d ayi. 
Rix. Xzar-dd ɣar řeɣben inu d warber inu, ksi xafi marra ddnub inu. 
Rix. Xzar ɣar řɛedyan inu, minzi ttwakettaren, nitni carrhen ayi s yijj n wecrah iqesḥen. 
Cin. Ḥḍa x řeɛmar inu u fekk ayi! War d ayi ttejji ca ad seḍḥiɣ, minzi ɣarek i ɣa arekkwařeɣ. 
Taf. Ad teḥḍa ayi řekmaret d řeṣfayet, maɣar ssitimeɣ dayek. 
A AREBBI, fdi Israil zi marra řeḥṣarat nnes. 
