﻿Izehhiden.
10.
Min iqqimen n Uzehhed 9 Lamid. A SIDI, mayemmi teqqimed tiggʷejed ammu? Mayemmi tessnuffared Ixef nnec di řweqt n řeḥṣaret? 
S nnfaxet iḍeffar uɛeffan řmeskin. Ad ttwaṭṭfen s tmeɛmač i di ttxarrṣen. 
Maɣar aɛeffan issɛuǧa ixef nnes ɣar meẓri n řeɛmar nnes, ittbarek aḍemmaɛ, ittceqqaf di SIDI. 
Aɛeffan am wenni issgeɛɛaden tinzart nnes ɣar ujenna, war ittbeqqec, iqqar. “War din AREBBI”, man aya d marra min di izemmar ad ittxarreṣ. 
Marra ibriden nnes tteffɣen as mliḥ kuř twařa. Řehkamat nnec ttuɛřant xas. Ittzawar marra inni t iḥeṣṣaren. 
Netta iqqar deg wuř nnes: “War ttenhezziɣ, zi jjiř ař jjiř war d ayi iřeqqef uřa d ijj n řɣar.” 
Aqemmum nnes iccur s nneɛřet d ixarriqen d ddeǧ. Sadu yiřes nnes aqa din tamara d řmuɛṣiyyet. 
Netta ittɣima ɣar wecbar di dcurat, deg imucan innuffaren ineqq inni war iggin s ca. Tiṭṭawin nnes mmenḍarent x řmeskin. 
Iřbet deg wemcan innufaren am weyrad deg udurri n uɛiccu nnes. Netta ittḥekkar ḥima ad yacar řmeskin. Ittacar řmeskin umi t ijebbed di tracca nnes. 
Netta ihekkwa-dd ɣar wadday, ittaḍar, aqa řmeskin iweṭṭa jar waccaren nnes ijehden. 
Iqqar deg wuř nnes: “Arebbi ittu, Netta issnuffar udem nnes, ɛemmarṣ ad t iẓar.” 
Quf. Kkar, a SIDI, Arebbi, sgeɛɛed afus nnec, war ttᵉttu řmusakin. 
Mayemmi ittceqqaf uɛeffan di AREBBI, mayemmi iqqar deg wuř nnes: “Cek war tᵉttbeqqaced!”? 
Rix. Aqa Cek teẓrid, minzi Cek tᵉttwařid tamara d wecḍan, maḥend ad ten tessarsed deg ufus nnec. Řmeskin ittarr-dd ɣarek s uzeǧif. Cek d amɛawen n uyujiř. 
Cin. Arẓ aɣiř n uɛeffan, xřef řɣar zeg wenni itteggen tuɛeffna, ař war tᵉttifed walu ɛad. 
SIDI d Ajeǧid i řebda qaɛ. Ttwateḥḥan řegnus zi temmurt nnes. 
Taf. A SIDI, Cek tesřid i meẓri n imwaḍɛen, ad tessjehded uřawen nsen, ad ɣarsen tmeyyřed amezzuɣ nnec, 
ḥima ad taɣed tasɣart i uyujiř u i wenni ittwaḥeṣṣaren, maḥend uřa d ijj n bnadem x temmurt war ittɣimi issaggʷad ɛad uřa d ijj. 
