﻿Izehhiden.
2.
Mayemmi tthajen řegnus, ttxarriṣen ccuɛub di řbaṭer? 
Kkaren ijeǧiden n temmurt, ayt n bu-ṣṣulṭa mcawaren ḍidd i SIDI u ḍidd i Lmasiḥ nnes: 
‘Ejj aneɣ ad nqess iceddiyyen nsen, ad xaneɣ nessbeɛɛed tiseɣwin nsen!’ 
Wenni izeddɣen deg ujenna iḍeḥḥec, Sidi inu ad zzaysen isstehza. 
Xenni ad kidsen issiweř s weɣḍab nnes, s řḥaduq n weɣḍab nnes ad ten issiggʷed. 
“Necc aqa dehneɣ Ajeǧid inu, x Ṣihyun, adrar inu iqeddsen!” 
Necc ad barrḥeɣ tikkest n wawař! SIDI inna ayi: “Cek d Mmi, ass-a jjiɣ-dd Cek! 
Ttar zzayi u Necc ad ac wceɣ řegnus d řwart, tineggura n temmurt ad ɣarek iřint d agřa i Cek. 
Ad ten třebzed s yijj n weqḍib n wuzzař, ad ten tarẓid d tareẓẓit am yijj n uɣarraf n třaxt.” 
Řexxu xenni, a ijeǧiden, iřim d ifehhamen, tebbtem ixef nwem, a řquḍat n temmurt! 
Sexxarem i SIDI s teggʷudi, farḥem s tarjijet. 
Sudmem Mmis, ḥima Netta war iseɛɛar u ad tᵉttwahellkem deg webrid, waxxa ittwassarɣ weɣḍab nnes mɣir drus waha. Sseɛd nsen i yinni ɣares yarekkwařen. 
