﻿Ayub.
39.
Ma tessned meřmi ttarwent tɣaydin n tṣuḍar? Ma tḥeṭṭid tirwa n tudadin? 
Ma tzemmared ad tḥesbed iyuren n tkessit nsent, ma tessned řḥař n tirwa nsent? 
Nitenti tteqwisent, ttarwent imeẓyanen nsent, řewjeɛ n tarut nsent ssuffuɣen ten. 
Meḥḍen imeẓyanen nsent, meqqaren di řexřa, tteffɣen ɣar barra u war ɣarsent ttɛiqqiben. 
Man wen yarxun i weɣyuř n řexřa u tisarrifin n weɣyuř n řexřa, man wen tent ifesyen? 
Necc wciɣ as tanezruft d taddart, řewḍa ameǧaḥ d tizeddiɣin nnes. 
Netta iḍeḥḥec x řɣaci inhewřen n tendint, war ittesři iɣuyyan n yinni izeyyaren isemɣan. 
Jjwayeh n idurar d ddmani nnes n tarewsa, yarezzu daysen x qaɛ min iǧan d aziza. 
Ma ad ixs iɣayḍ n řexřa ak-d waccawen d iziraren ad xak isexxar? Ma ad issens ɣar řmedwed nnec? 
Ma tzemmared ad tmenɛed iɣayḍ n řexřa ak-d waccawen d iziraren s wesɣun nnes ɣar uɛeyyed n wecraz? Ma ad icarz tiysarin awarni ac? 
Ma tᵉttcařed xas, minzi netta ijhed aṭṭas, ma ad as tejjid řxedmet nnec? 
Ma ad xas tᵉttecřed ad ɣarek dd-yarr zzariɛet nnec, ad tt yawi ɣar unedrar nnec? 
Afriwen n nnɛamet ccaten s řxaḍar. Maca ma aqa-ten d afriwen d warric idařfen n ubellarj? 
Maɣar tᵉttejja timeǧařin nnes deg ucař n temmurt, tᵉttejja i-tent tteḥmant deg ijdi. 
Tᵉttᵉttu aqa ijj n uḍar izemmar ad tent iřbez, aqa řewḥuc n řexřa zemmaren ad xasent ɛefsen. 
Nettat tqesseḥ deg imeẓyanen nnes axmi war ǧin nnes. Baṭeř i tᵉttegg tizemmar nnes, maɣar nettat war tkessi s wemnus, 
maɣar Arebbi ijja i-tt ad tᵉttu tiɣit, war d as iwci bu tesɣart di řefhamet. 
Maca mařa teksi deg uḍar nnes, tessgeɛɛad ixef nnes, tḍeḥḥec x uyis d wenni xas inyin. 
Ma tzemmared ad tewced jjehd i uyis? Ma tzemmared ad tessyarḍed ijiman nnes s ssbib? 
Ma tzemmared ad t yarr ineṭṭu am uburxes? Řɛezz n usneḥneḥ nnes issaggʷad aṭṭas. 
Xebbcen iysan s iḍaren nsen am ttrajan di řewḍa n teɣzurt, ifarḥ uyis s jjehd nnes, itteffeɣ, maḥend ad immeřqa ak-d řesnaḥ. 
Iḍeḥḥec x marra min issaggʷaden, war ittnexřiɛ zi walu, war iddikkwiř ɣar ḍeffar zi ssif. 
Ittqarqub weqrab n fřitcat sennej nnes, lansa d fřitca ttissiqen. 
S ddriz n tceḍyin d zzɛamet iṣarreḍ tammurt, war izemmar ad ittwassbedd ɣar usuḍi n uyicc n icarri. 
Ɣar tmijja n usuḍi deg uyicc n icarri issneḥniḥ: ‘Heheh!’ Ittaca ak-d umenɣi zi řaggʷaj, zzga n řḥukkam d iɣuyyan n umenɣi. 
Ma iṭṭaw řbaz zi řefhamet nnec, aqa ittbezzaɛ afriwen nnes ɣar ljanub? 
Ma issgeɛɛad ugidar ixef nnes sennej qaɛ s řumur nnec, ittegg řɛucc nnes di řuɛřa? 
Izeddeɣ u issnusa x jjarf, x ucenqub n jjarf, aqa-t d lburj nnes. 
Ssenni iḥeṭṭa zzardet, tiṭṭawin nnes xezzarent i-tt-dd zi řaggʷaj. 
Imeẓyanen nnes sekkfen idammen u mani ǧan inni ittwanɣen, aqa-t din i yeǧa. 
